Read Yucateco Hechos 18 Bible Online

Hechos 18 - Yucateco bible

Hechos 18

¹Cu dzo'ocol lela', Pabloe' j luk tu caajil Atenase' ca j bin tu caajil Corinto.

²Te tu yilaj jun túul Judío u kaaba'e' Aquila máax Pontoil. Aquila yéetel Priscila u yatane' táant u kuchulo'obe'. J luko'ob Italiae' tumen Claudio u noj méektáanile' tu ya'alaj ca láaj jóokoc le judíob ti' u noj caajil Roma. Pabloe' j bin u xíimbalto'ob,

³ca p'áat tu yéetelo'ob u ti'al u múuch' meyajo'ob, tumen le meyaj cu beetico'obo' u yojel u beet Pablo xan, u meeyjul u beeta'al pasel nooko'ob.

⁴Ti' u kiinil sábadoe' Pabloe' cu bin Sinagogao', tu'ux cu t'aan yéetel cu sutic u tuuculo'ob le judíob bey xan le máaxo'ob j ma' judíobo'.

⁵Le ca j kucho'ob Silas yéetel Timoteo tac Macedoniae', Pabloe' tu dzaj u yóol u tze'ect le ma'alob péectzilo' yéetel u ya'alic jach t'áalcab ti' le judíobo' Jesuse' leti' le Cristo cu pa'atico'obo'.

⁶Ba'ale' leti'obe' jo'op' u ba'atel t'aantico'ob yéetel u pooch'ico'ob. Pablo túune' tu tíitaj u nook bey jun p'éel u chíiculal ma' utz ba'ax cu beetico'obe', ca tu ya'alaj ti'ob: Te'ex ca bin a cuche'ex u si'ipil a quíimile'ex, tene' mina'an in si'ipil ti' lelo', bejela'e' bin in ca'aj ti' le máaxo'ob ma' judíobo'.

⁷Jóok ti' le sinagogao', ca j bin tu yotoch jun túul máac u kaaba'e' Justo, ti' caja'an tu tzéel le sinagogao'; leti'e' cukultic Junab Ku.

⁸Crispo u nojochil le sinagogao' yéetel tuláacal u láaktzilo'obe' tu yocsaj óolto'ob Yuumtzil. Bey ya'ab ti' u cajnáalilo'ob Corinto, le ca tu yu'ubajo'ob le ma'alob péectzilo', tu yocsaj óolto'ob, caj ocja'anajo'ob.

⁹Ti' jun p'éel áakabe' Yuumtzile' chíicpaj ti' Pabloe' ca tu ya'alaj ti': Ma' a ch'a'ic sajaquil, tze'ecnen, ma' a maquic a chi'.

¹⁰Tumen tene' ti' yanen ta wéetele' yéetel mix máac cu páajtal u beetic teech loob, tumen ya'ab máaco'ob yaan teen te j caaja'.

¹¹Bey túuno' Pabloe' j p'áat Corinto jun ja'ab ca'atac táancoch, táan u ca'ansic ichilo'ob u ma'alob péectzil Ku.

¹²Ba'ale' tu kiinilo'ob Galión, le ca tu beetaj u méektáanil tu caajil Acayae' le judíobo' tu much'juba'ob tumen ma' utz u yóolo'ob tu yo'olal Pabloi'. Ca tu bisajo'ob te tu cúuchil p'is óolo'

¹³ca tu ya'alajo'ob ti' le j méektáano': Le máaca' táan u kexic u tuucul le máaco'obo', tumen táan u ya'alique' unaj u kulta'al Ku jela'an ti' le bix cu ya'alic le a'almaj t'aano'.

¹⁴Bin u ca'aj t'aan ca'ach Pablo, ca tu ya'alaj Galión ti' le judíobo': Judíoex, wa tu yo'olal wa ba'ax nojoch si'ipile', je'el in wu'uyique'exe';

¹⁵ba'ale' tumen chéen tu yo'olal t'aano'ob yéetel kaaba'ob, yéetel u ba'alubáilo'ob a wa'almaj t'aane'exe', lelo' ile'ex te'ex, tumen tene' ma' in káat in wocsinbáa ti' le ba'alo'oba'.

¹⁶Ca tu tojolch'intajo'ob ti' le cúuchil p'is óolo'.

¹⁷Tuláacal le griego'ob túuno'tu machajo'ob Sóstenes u nojochil le sinagogao' ca tu ja'ajadzo'ob te'elo' tu táan le j méektáano'. Ba'ale' Galione' ma' tu táan óoltaj mix ba'al ti' lela'.

¹⁸Pabloe' láili' j p'áat ya'abcach kiin te'elo'. Cudzo'ocole' tu ya'alaj ti' le sucu'uno'obo': Táan in bin. Ca j bin ti' cheem tac tulu'umil Siria, yéet binac Priscila yéetel Aquila, tu caajil Cencreae', ma'ili' ococ ti' le cheemo' tu kosaj u tzo'otzel u pool, u ti'al u dzo'ocbesic ba'ax u ya'almaj u beetic.

¹⁹Le ca j kucho'ob tu caajil Efesoe', Pabloe' tu p'ataj Priscila yéetel Aquilae' ca j bin te j sinagogao' ca j t'aanaj yéetel le judíob cu much'talo'ob te'elo'.

²⁰Leti'obe' tu káat óoltajo'ob ti' ca p'áatac u láak kiino'obi', ba'ale' leti'e' ma' tu yóoltaji'.

²¹J luk tu yicnalo'ob táan u ya'alic: Yaan in wantal Jerusalén u ti'al in kiinbes le kiinbesaj cu taalo'; ba'ale' yaan in suut in wile'ex tu ca'a téen, wa Ku u káate. J ooc ti' le cheemo' ca j luk Efeso.

²²Le ca j kuch cesareae', Pabloe' j bin Jerusalén u ti'al u te'escunt le yano'ob te j iglesiao', cu dzo'ocole' ca j bin Antioquía.

²³Cu dzo'ocol u beetic dze'edzec kiino'ob te'elo', jóok tu ca'a téen u xíimbalt jujun p'éelil tuláacal u caajilo'ob Galacia yéetel Frigia, u ti'al u cux óoltic le ocsaj óolo'obo'.

²⁴Ti' le kiino'obo' j kuch Efeso jun túul Judío u kaaba'e' Apolos, Alejandría u caajal, lela' jach ma'alo'ob u tze'ec yéetel u kajóol jach ma'alo'ob le Quili'ich Dzíibo'obo'.

²⁵Caanbalnaja'an ti' u bejilo'ob Yuumtzil, cu t'aan yéetel chuca'an óolal, jach t'áalcab u ca'ansaj tu yo'olal Jesús, quex chéen u kaj óol u dzaa ocja' Juan.

²⁶Apolose' tu dzajubáa t'aan ti' le sinagogao' yéetel chuca'an óolal; ba'ale' le ca j u'uya'ab tumen Priscila yéetel Aquilae', j bisa'ab jun páayile' ca j tzo'ol t'áalcab u bejilo'ob Ku ti'.

²⁷Bey túuno' le ca tu yóoltaj Apolos, bin tu lu'umil Acayae', le sucu'uno'obe' tu tac mukto'obe' ca tu dzíibtajo'ob jun p'éel ju'un u ti'al le j ocsaj óolo'ob yano'ob te'elo' u ti'al ca u kamo'ob ma'alob. Le ca j kuch Acayae', tu yáantaj jach ya'ab le máaxo'ob dzo'oc u yocsajóolo'ob tu yo'olal u yutzil Kuo',

²⁸tumen tu ye'esaj tu táan tuláacalo'obe' u tuuso'ob le judíobo', yéetel ca'ansajo'ob ma' tu páajtal u mix ba'altal tumeno'ob, táan u jaajcuntic yéetel le Quili'ich Dzíibo'obo' Jesuse' leti' le Cristo cu pa'atico'obo'.