Read Yucateco Hechos 19 Bible Online

Hechos 19 - Yucateco bible

Hechos 19

¹Ca'aliquil ti' yaan Apolos Corintoe', Pabloe' j máan ti' le caajo'ob yaano'ob te j pu'uco'obo' ca j kuch Efeso', tu'ux tu yilaj dze'edzec j ocsaj óolo'ob.

²Ca tu káat chi'itaj ti'ob: ¿Ta kamaje'ex wa Quili'ich Pixan le ca j ocsaj óolnaje'exo'? Ca tu núucajo'ob ti': Mix c u'uymaj wa yaan Quili'ich Pixani'.

³Pablo túune' tu káat chi'itaj ti'ob: ¿Ba'ax ocja'il ta kamaje'ex? Leti'obe' tu núucajo'ob: u dzaa ocja' Juan.

⁴Pabloe' tu ya'alaj ti'ob: Bey; Juane' tu dzáa u yocja' ti' le máaxo'ob tu kexaj u tuuculo'obo', ba'ale' tu ya'alaj ti'obe' unaj u yocsajóoltico'ob le máax cu taal paachil ti'ob; u káat u ya'ale' Jesús le Cristo'.

⁵Le ca tu yu'ubajo'ob lela', ocja'anajo'ob tu kaaba' Yuumtzil Jesús.

⁶Le ca tu dzaj Pablo u kab tu yóokolo'obe', Quili'ich Pixane' j taal tu yóokolo'ob, ca j t'aanajo'ob ti' jejeláas t'aano'ob ca tu tzicbaltajo'ob péectzilo'ob tu kamajo'ob ti' Ku.

⁷Tu láacalo'obe' míin doce máaco'ob.

⁸Tu yáam óox p'éel winalo'ob j bin Pablo te j sinagogao' tu'ux tze'ecnaj yéetel kuba'an óolal, tu'ux t'aanaj yéetel tu beetaj u yila'al ma'alo'ob u ajawil Ku tumen le máaco'obo'.

⁹Ba'ale' dze'edzec tu dzu'uyquintajo'ob u pucsi'ikalo'ob, ma' tu yóoltajo'ob u yocsaj óolto'obi'; ba'ale' j t'aanajo'ob kaas tuyo'olal le ma'alob péectzilo' tu táan le máaco'obo'. Pablo túune' tu tzelubáa ti'obe' ca tu bisaj le ocsaj óolo'obo' tu najil tu'ux cu ca'ansaj jun túul máac u kaaba'e' Tirano', te j t'aanaj sáamsamali'.

¹⁰Bey tu beetilac ca'a p'éel ja'abo'ob. Bey túuno' tuláacal le máaxo'ob caja'ano'ob Asiao' tu yu'ubajo'ob u ma'alob péectzil Jesús le judíobo' bey xan le ma' judíobo'.

¹¹Kue' tu beetaj nojoch chíiculalo'ob tu kab Pablo',

¹²tac le mejen nooko'ob wa le búuco'ob u cóojol tu wíinclilo' cu bisa'alo'ob ti' le koja'ano'obo', le lo'oba' cu yutztalo'ob, tac le kaakas pixano'ob cu jóokolo'ob ti'ob.

¹³Ba'ale' dze'edzec chéen máanel judíob cu jóoksico'ob kaakas pixano'ob ti' máaco'obe', tu yóoltajo'ob u t'aano'ob u kaaba' Yuumtzil Jesús u ti'al u jóokesico'ob. Tu ya'alajo'ob ti' le kaakas pixano'obo': Quin wa'alic ti' te'ex ca jóokoque'ex tu kaaba' Jesús le máax cu tze'ecta'al tumen Pabloo'.

¹⁴Bey cu beetico'ob u siete paalalo'ob jun túul judío u kaaba'e' Esceba, máax u nojochil le j kiino'obo'.

¹⁵Ba'ale' le ca tu beetajo'obe', le kaakas pixano' tu núucaj ti'ob: In kaj óol Jesús, in wojel máax Pablo; ba'ale' te'exe' ¿máaxe'ex?

¹⁶Yéetel lela' le máax yaan le kaakas pixan ti'o' tu pulajubáa tu yóokolo'obe' ca tu láaj lúubsajo'ob yéetel muuk, ca tu ko'okolajo'ob yéetel nojoch kuuxile' ca yanji u púudzulo'ob ti' le najo', x ma' nookil yéetel quimbesa'ano'ob.

¹⁷Tuláacal le caja'ano'ob Efeso', judíob yéetel ma' judíobo', tu yojéeltajo'ob lela', ca tu ch'a'ajo'ob nojoch sajaquil, ca tu nojbe'encunso'ob u kaaba' Yuumtzil Jesús.

¹⁸Bey xan ya'ab ti' le cu yocsaj óolo'obo' j taalo'ob táan u cáantico'ob le kaakas ba'alo'ob cu beetico'ob ca'acho'.

¹⁹Bey xan ya'ab ti' le máaxo'ob j pulya'ajo'ob ca'acho' tutaasajo'ob u ju'unilo'ob le pulya'ajo' ca tu tóocajo'ob tu táan tuláacal. Le ca j ila'ab buca'aj u tojol le ju'uno'obo', j kuch yáam míin cincuenta mil u taakinil plata.

²⁰Bey cu bin u jaycubáa u t'aan Yuumtzil yéetel cu ye'esic páajtalil.

²¹Cu dzo'ocol le ba'alo'oba' Pabloe' tu tucultaj u xíimbaltic u lu'umilo'ob Macedonia yéetel Acaya, ca j bin tac Jerusalén. Bey xan tu ya'alaj: Cu dzo'ocol in bin Jerusalene' unaj in bin xan tac Roma.

²²Tu túuxtaj túun Mecedonia ca'a túul u yáantajo'ob, Timoteo yéetel Erasto, ca'aliquil u p'áatal leti' dze'edzec kiino'ob Asia.

²³Ti' le kiino' yanji jun p'éel nojoch wo'och' táanbal tu yo'olal le péectzilo'.

²⁴Lela' beeta'ab tumen jun túul máac u kaaba'e' Demetrio, máax cu meyajtic plata. Le máaca' cu beetic mejen kulnajo'ob yéetel plata je'el bix u kulnaji x co'olebil Dianae', lela' cu dzáic ya'ab náajal ti' le máaxo'ob cu meyajo'ob tu yéetelo'.

²⁵Tu much'quintaj túun le máaxo'ob cu meyajo'ob tu yéetelo' bey xan le máaxo'ob cu beetico'ob meyajo'ob je'el bix leti'obo', ca tu ya'alajo'ob ti'ob: Xiibe'ex, te'exe' a wojele'ex yéetel le meyaja' ma'alob c cuxtal;

²⁶ba'ale' je'el bix a wilique'ex yéetel a wu'uyique'exe' le j Pabloa' táan u máan u ya'ale' le kuo'ob cu beeta'al tumen wíinico'obe' ma' kuobi'; bey túuno' dzo'oc u beetic u kexic u tuucul ya'abcach máaco'ob ma' chéen way Efesoe' ba'ale' míin tac tuláacal u lu'umil Asia.

²⁷Lela' jach sajbe'entzil, tumen le c meyaja' cu páajtal u kastal to'on, bey xan u kulnajil le le nojoch x co'olebil Dianao' cu páajtal u sa'atal u nojochil, bey túuno' cu páajtal u p'ecta'al u nojochil le x co'olebila' cu kulta'al ti' tuláacal u lu'umil Asia yéetel ti' u túulisil u yóokolcaab.

²⁸Le ca tu yu'ubajo'ob lela', jach p'u'ujo'obe' ca jo'op' u yaawtico'ob: ¡Nojoch u Dianail le Efesioio'obo'!

²⁹Sa'at u yóol tuláacal le caajo'. Tu puljuba'ob tu yóokol Gallo yéetel Aristarco, ca'a túul Macedonioilo'ob tu láakintajo'ob Pablo, ca tu jíiltajo'ob tac te j cúuchil tu'ux cu much'tal le caajo'.

³⁰Pabloe' tu yóoltaj ocol te'elo' u ti'al j t'aan tu yéetel le máaco'obo', ba'ale' le ocsaj óolo'obo' ma' tu cha'ajo'ob ti'.

³¹Bey xan dze'edzec ti' u jalach nuuquilo'ob Asiae', máaxo'ob ma'alob u bisicuba'ob yéetel Pabloe', tu túuxtajo'ob a'albil ti'e' ma' unaj u yocol te'elo'.

³²Ca'aliquile', le tu'ux much'ucbalo'obo', dze'edzeque' cu yaawtico'ob jun p'éel ba'al, u láako'obe' cu yaawtico'ob u láak ba'al, tumen le máaco'obo' p'uujul u yóolo'ob, yéetel u jach ya'abile' mix u yojelo'ob ba'ax óolal much'lajo'obi'.

³³Ba'ale' dze'edzec ti' le yano'ob ichil le máaco'obo' tu tzolajo'ob ti' Alejandroe' le ba'ax cu yúuchulo', máax léech'inta'ab tumen le judíobo' tu táan tuláacal, Alejandroe' tu beetaj u kab ti' le máaco'obo' u ti'al ca u mac u chi'ob, tumen tu yojéeltaj j t'aan tu yo'olal le judiobo'.

³⁴Ba'ale' le ca tu kaj óoltajo'ob judíoe', tuláacal j awatnajo'ob tu yo'olal míin ca'a p'éel hora: ¡Nojoch u Dianail le Efesioobo'!

³⁵U aj dzíibil le caajo' le ca páajtji u jedzic u yóolo'ob le máaco'obo' tu ya'alaj: U cajnáalile'ex Efeso, tuláacal yóokolcaab u yoojel le u caajil Efesoa' dza'an u ti'al u canant u kulnajil le nojoch x co'olebil Dianao' yéetel le u yoochel ca'an u taalo'.

³⁶Tumen mix máac cu páajtal u ya'alic wa ma' jaaj lela'. Jedzcuntaba'ex túun yéetel ma' a beetique'ex mix ba'al ma' a ma'alob tucultmaje'exi'.

³⁷Tumen le máaco'ob dzo'oc a taasique'exa', ma' u poch'o'ob mix t'aanaco'ob kaas tu contra a kuexi'.

³⁸Wa Demetrio yéetel le máaxo'ob cu meyajo'ob tu yéetel yaan ti'ob wa ba'ax tu contra wa máaxe', le o'olal yaan u kiinilo'ob p'isóolal, yaan xan jalach wíinico'ob cu páajtal u t'aano'ob tu táano'obe' u ti'al u ya'alo'ob ba'ax u káato'ob.

³⁹Wa yaanal ba'ax a káate'exe' unaj u yila'al ti' jun múuch' caa, ca beeta'ac tu beel.

⁴⁰tumen sajbe'entzil u ta'acal c pool ca a'ala'ac j líiksaj ba'atelo'on tu yo'olal le ba'al dzo'oc u yúuchul bejela'o', tumen mina'an mix ba'al c a'al tu yo'olal le wo'och'táanbala'.

⁴¹Cu dzo'ocol u ya'alic lela' tu ya'alaj ti'ob ca xi'ico'ob.