Read Yucateco Hechos 20 Bible Online

Hechos 20 - Yucateco bible

Hechos 20

¹Le ca j dzo'oc le wo'och'táanbalo', Pabloe' tu t'anaj le j ocsaj óolo'obo' u ti'al u tzolic u xiquino'ob; cu dzo'ocole' tu méekajo'obe' ca j bin Macedonia.

²Tu xíimbaltaj tuláacal le caajo'obo' táan u cux óoltic le sucu'uno'ob yéetel u t'aano'ob, cu dzo'ocole' j kuch Grecia.

³J p'áat óox p'éel winal te'elo'. Bin u ca'aj ocol ca'ach cheem u ti'al u binbal Siriao' ca tu yojéeltaje' le judíobo' yaan ba'ax cu tucultico'ob u beetic ti'. Le o'olale' j suunaj xíimbalil, ca j máan tu ca'a téen Macedonia.

⁴Láakinta'ab tumen Sopater Bereail, Aristarco yéetel Segundo, Tesalonicailo'ob, Gallo Derbeil, Timoteo, bey xan Tíquico' yéetel Trófimo', máaxo'ob ti' u lu'umil Asia u taalo'ob.

⁵Le sucu'uno'oba' j bino'ob táanile' ca tu pa'atajo'ob Troas.

⁶To'one' cu dzo'ocol le kiinbesaj ma' tu jaanta'al paj sacan waaje', j luko'on Filipos ti' cheeme' ca t chucpachto'ob Troas cu dzo'ocol u máan cinco kiino'ob, j p'áato'on siete kiino'ob te'elo'.

⁷Tu yáax kiin le semanao' j much'lajo'on u ti'al c xet'ic le waajo', Pabloe' táan u ca'ansic le ocsaj óolo'obo'. Tumen yaan u jóokol tu jeel kiine', j t'aanaj tac chúumuc áakab.

⁸Much'ucbalo'ob ti' jun p'éel cúuchil tu ca'anlil le najo' tu'ux yaan ya'ab sáasilo'ob t'aba'antac;

⁹jun túul táanquelem xi'ipal Eutico u kaaba'e' culucbal ti' jun p'éel calon iik. Tu yo'olal chowacchaj u tze'ec Pabloe' jach taacchaj u wenel le j xi'ipalo', le ca j t'úub u wenele' j lúub tu yóox yáal le najo' ca j líiksa'abe' quimen.

¹⁰J éem túun Pabloe' ca noclaj tu yóokole' ca tu méekaj, ca tu ya'alaj ti' le sucu'uno'obo': ma' u ja'akal a wóole'ex; tumen cuxa'an.

¹¹Pablo túune' j na'ac tu ca'a téen; tu xet'aj le waajo', jaane', ca jo'op' u t'aan tu ca'a téen tac ca sáasji, cu dzo'ocole' ca j bini.

¹²Le xi'ipalo' cuxa'an bisa'abic, tuláacalo'ob túun qui'imacchaj u yóolo'ob.

¹³To'one' j máano'on táanile' ca j bino'on ti' cheem tac tu caajil Asón u ti'al c ch'a'ic Pablo te'elo', je'el bix tu ya'aljilacto'ono', tumen leti'e' tu yóoltaj j bin yóok lu'um.

¹⁴Le ca t ilaj Pablo tu lu'umil Asone' j ooc t éetel ti' le cheemo' ca j bino'on Mitilene.

¹⁵Jóoko'on te'elo', j máano'on tu jeel kiine' actáan Quío, tu láak kiine' j kucho'on tu jáal ka'anabil Samos. Je'elo'on tu chan caajil Trojilio, tu jeel kiine' j kucho'on Mileto.

¹⁶Bey beeta'abic, tumen Pabloe' u ti'al ma' u yantal ya'abcach kiino'ob Asiae' ma' tu yóoltaj j bin Efesoi'; tumen u káat séeb kuchul Jerusalén u ti'al u yantal tu kiinil Pentecostés te'elo', wa ca p'áataco'.

¹⁷Ca'aliquil ti' yaan Miletoe' Pabloe' tu túuxtaj t'anbil u ancianilo'ob Efeso;

¹⁸le ca j taalo'obe' tu ya'alaj ti'ob: Te'exe' a wojele'ex bix in cuxtal ichile'ex cáajic tu yáax kiin ca j kuchen way Asiae'.

¹⁹Sáamsamal anjien ichile'ex táan in meyajtic Yuumtzil yéetel tuláacal cabal óolal, yéetel u ja'il in wich bey xan ich ya'abcach túuntaj óolalo'ob taal ti' teen tu yo'olal le ba'ax u káat u beeto'ob teen le judíobo'.

²⁰Ba'ale' ma' jáaw in tze'ectic te'ex le ba'alo'ob u ti'al a wutzile'exo', táan in ca'ansique'ex tu táan máaco'ob yéetel ta wotoche'ex.

²¹Ti' le judíobo' bey xan ti' le ma' judíobo' dzo'oc in wa'alic ti'ob unaj u kexico'ob u tuuculo'ob tu táan Ku yéetel u yocsaj óoltico'ob Yuumtzil Jesucristo.

²²Bejela'a' túune' táan in bin Jerusalén, tumen táan u bisiquen Quili'ich Pixan, ma' in wojel ba'ax je'el u páajtal u yúuchul teen te'elo'.

²³Chéen ba'ax in wojele', ti' tuláacal caaj tu'ux ca xi'iquene' Quili'ich Pixane' cu ya'alic tene' ba'ax cu pa'atiquene' in ka'alal yéetel in sen mukyaj.

²⁴Ba'ale' mix ba'al ti' le ba'alo'ob quin táan óoltica', mixin cuxtal yaan u tojol in ti'al teen, tu yo'olal ca páatac in wáalcabtic in beel yéetel qui'imac óolal tac tu xuul, yéetel in dzo'ocsic in meyaj tu kubentaj teen Yuumtzil Jesús u ti'al in tze'ectic u ma'alob péectzilil Ku.

²⁵Bejla'ae' in wojel mix jun túul ti' te'ex, ichil máaxo'ob in tze'ecmaj u ajawil Kuo', bíin u yilen tu ca'a téen.

²⁶Le o'olal in káat in wa'al te'ex bejela'e' quin wu'uyic mina'an teen si'ipil ta wóokole'ex,

²⁷tumen in tze'ecmaj te'ex tuláacal u tzolbe'en t'aan Ku, mix ba'al tin ta'acaj te'ex.

²⁸Le o'olale' canantaba'ex te'ex, canante'ex xan u múuch'ul le ocsaj óolo'obo', tu yóokol máaxo'ob dza'ane'ex tumen Quili'ich Pixan je'el bix j canane'ex u ti'al a táan óolte'ex u iglesia Yuumtzil, le tu manaj yéetel u ki'ikelo'.

²⁹Tumen in wojel le quéen xi'iquene' yaan u taal yaanal máaco'ob bíin u yóolto'ob u xu'ulso'ob le iglesiao', je'el bix le dzíidzic ba'alche'ob cu xu'ulsico'ob le j tamano'obo'.

³⁰Bey xan ichile'ex yaan u líikil dze'edzec máaco'ob cu bin u ca'anso'ob tuso'ob u ti'al ca tzaypachta'aco'ob tumen le j ocsaj óolo'obo'.

³¹Canantaba'ex túun, ka'ajac ti' te'exe' tu yáam óoxp' éel ja'abo'ob bul kiin yéetel bul áakabe' ma' jáaw in tzolic a xiquine'ex ta jun túulile'ex yéetel u ja'il in wich.

³²Bejla'e', Sucu'une'ex, quin kubentique'ex tu kab Yuum Ku yéetel ti' u t'aanil u yaacunaj, le yaan páajtalil ti' u ti'al u dzáic a muuke'exo' yéetel u ti'al u dzáic te'ex jun p'éel cúuchil ichil tuláacal le máaxo'ob u kubmajuba'ob ti'o'.

³³Ma' in dzíiboltmaj u taakin mix u nook mix máaqui'.

³⁴A wojele'ex ma'alobe' meyajnajen yéetel in kabo'oba' uti'al ca yanac ba'ax kabéet ti' teen yéetel ti'le máaxo'ob yano'ob tin wéetelo'.

³⁵Mantadz in ca'ansmaj ti' te'exe' bey unaj u yúuchul meyaj u ti'al u yáantal le máaxo'ob kabéet wa ba'ax ti'obo', yéetel a ka'ajsique'ex u t'aano'ob Yuumtzil Jesús, máax tu ya'alaj: Yaan asab qui'imacóolal u dza'abal wa ba'ax ti' u ca ka'amal wa ba'ax.

³⁶Cu dzo'ocol u ya'alic lela', Pabloe' j xolaje' ca j payalchi'inaj yéetel tuláacalo'ob.

³⁷tuláacalo'ob okolnajo'ob ca tu méekajo'ob yéetel tu dzu'udzajo'ob Pablo.

³⁸Jach okomchaj u yóolo'ob tumen tu ya'alaj ti'ob ma' bíin u yilo'ob tu ca'a téeni'. Cu dzo'ocole' ca tu láakintajo'ob tac tej cheemo'.