Read Yucateco Hechos 21 Bible Online

Hechos 21 - Yucateco bible

Hechos 21

¹Le ca t p'ataj le sucu'uno'obo', j ooco'on ti' le cheemo' ca j bino'on jun táadz tac Cos, tu jeel kiine' tac Rodas, cu dzo'ocole' tac Pátara.

²Pátarae' t ilaj jun p'éel cheem táan u bin tac Fenicia, j ooco'oni' ca j bino'on.

³U ti'al c máanbale' t ilaj u petenil Chipre t p'ataj x dzíic kabile' ca j bino'on tac Siria. Tumen le cheemo' yaan u pa'atic cuuch tu jáal ka'anbil Tiroe' j ooco'on te'elo'.

⁴T ilaj le ocsaj óolo'obo' ca p'áato'on siete kiino'ob tu yéetelo'ob; leti'ob túune', tu yo'olal j dzaab u yojéelto'ob tumen Quili'ich Pixane' tu ya'alajo'ob ti' Pablo ma' unaj u bin Jerusaleni'.

⁵Ba'ale' le ca j máan le siete kiino'obo' jóoko'on. Tuláacal le ocsaj óolo'obo', yéetel u yatano'ob bey xan u paalalo'obe', tuláakinto'ono'ob tac jo'ol caaj; te tu jáal le ja'o' xolajo'one' ca j payalchi'inajo'on.

⁶Cu dzo'ocole' t méeko'ob jujun túulile' ca j na'aco'on te j cheemo', leti'ob túune' j suunajo'ob tu taanajo'ob.

⁷J luko'on Tiroe' ca j bino'on ti' cheem tac Tolemaida, te'elo' t tzicaj le sucu'uno'obo' ca j p'áato'on jun p'éel kiin yéetelo'ob.

⁸Tu jeel kiine' Pablo yéetel máaxo'on yano'on yéetelo' jóokone' ca j bino'on tu caajil Cesarea. Te'elo' j ooco'on tu yotoch Felipe le aj tze'ec ma'alob péectzilo', jun túul ti' le siete diacono'obo', ca j p'áato'on tu yéetel.

⁹Felipee' yaan can túul u ch'upul paalal ma' dzoca'an u beelo'obi', máaxo'ob cu dzáico'ob péectzilo'ob cu kamico'ob ti' Ku.

¹⁰Cu dzo'ocol c antal dze'edzec kiino'ob te'elo' j kuch jun túul profeta Judea u taal, u kaaba'e' Agabo',

¹¹ca j taal u xíimbalto'on. Tu ch'a'aj u kaxnak Pabloe' ca tu kaxaj u yooco'ob bey xan u kaabo'ob tu yéetel, táan u ya'alic: Quili'ich Pixane' cu ya'alique' bey cu bin j kaxbil tu noj caajil Jerusalén tumen le judíob u yuumil le kaxnaka', cu dzo'ocole' cu kubico'ob tu kab táanxel lu'umil máaco'ob.

¹²Le ca t u'uyaj lela', to'on yéetel le Cesareailo'obo' tu káat óoltajo'ob ti' Pablo ma' u bin Jerusalén.

¹³Ba'ale' Pabloe' tu núucaj: ¿Ba'axten ca wokole'ex yéetel ca okom óolquintiquene'ex? Tumen tene' in dzaamaj in wóol u ti'al ma' chéen ca kaxa'aqueni', ba'ale' tac u ti'al quíimil Jerusalén tu yo'olal Yuumtzil Jesús.

¹⁴Tumen ma' páatchaj c kexic u tuucule', t p'ataj táan c a'alic: Beetchajac u yóolal Yuumtzil.

¹⁵Cu dzo'ocol lela' t líiksabae' ca j bino'on Jerusalén.

¹⁶Tu láakinto'on dze'edzec j ocsaj óolo'ob Cesareailo'ob, ichilo'one' ti' yaan jun túul máac Chipreil Mnasón u kaaba', leti'e' dzo'oc u máan kin ocsaj óolnac, tu yotoch cu bin j dzaabil to'on tu'ux c je'elel.

¹⁷Le ca j kucho'on Jerusalene' j ka'amo'on yéetel qui'imac óol tumen le sucu'uno'obo'.

¹⁸Tu jeel kiine' Pabloe' j bin t éetele' u xíimbalt Jacobo, ti' yano'ob xan tuláacal le anciano'obo'.

¹⁹Pabloe' tu tzicajo'obe' ca tu tzicbaltaj ti'ob jujun p'éelil le ba'alo'ob tu beetaj Ku tu yo'olal leti'o' ichil le máaco'ob ma' judíobo'.

²⁰Le ca tu yu'ubajo'obe' tu qui'iqui' t'anto'ob Ku. Tu ya'alajo'ob túun ti' Pablo: Ma'alob, sucu'un, ba'ale' táan a wilique' ichil le judíobo' táaj ya'ab dzo'oc u ocsaj óolo'obi', ya'ab ichilo'obe' táan u ya'alico'obe' kabéet u dzo'ocbesa'al u ya'almaj t'aan Moisés.

²¹Dzo'oc u yu'ubico'ob u ya'ala'ale' tech bine' táan a ca'ansic ti' le judíob caja'ano'ob táanxel lu'umo'obe', ma' u dzo'ocbesico'ob ba'ax tu ya'alaj Moisés, ca wa'alic bin xan ti'obe' ma' unaj u súut kuptic u paalalo'obi', mix u beetico'ob ba'ax suuca'an u beetic le judíobo'.

²²¿Bix yanil le ba'alo'oba'? Tumen le máaco'obo' yaan u much'talo'ob le quéen u yojéelto'ob dzo'oc a taal.

²³Beet túun le ba'ax quin in wa'al techa': Yaan way ichilo'one' can túul máaco'ob bin u ca'aj u tzocbeso'ob ba'ax u ya'almajo'ob u beetico'ob.

²⁴Biso'ob ta wéetel, p'o'abáa yéetelo'ob ca a bo'ot le ba'ax cun u xupo'obo', cu dzo'ocole' leti'obe' cu páajtal u ko'osol u poolo'ob. Beyo' tuláacal cun ilic ma' jaaj le ba'ax cu ya'ala'al ta wo'olalo', ba'ale' yaan u ya'alico'ob tac teech ca beetic le ba'ax cu ya'alic le a'almajt'aano'.

²⁵Ba'ale' ti' le máaxo'ob ma' judíobo' yéetel le dzo'oc u yocsaj óolo'obo', dzo'oc c dzíibtic ti'obe' ma' kabéet ca u beeto'ob le ba'alo'oba', chéen ma' u jaantico'ob bak dzo'oc u dza'abal tu táan beetbil kuo'ob, mix ki'ik, mix u bakel ba'alche'ob cup iikil quíimico'ob, yéetel mix máac ca nup kebanchajac.

²⁶Pabloe' tu bisaj túun le can túul máaco'obo'; tu jeel kiine' tu p'o'ojubáa yéetelo'ob, cu dzo'ocole' j ooc ich kulnaje' u ti'al ca u ya'al ba'ax kiin quéen dzo'ococ le p'o'obáilo', u káat u ya'ale' ba'ax kiin quéen u taaso'ob u siibalo'ob tu jujun túulilo'ob.

²⁷Ba'ale' táan u taal u dzo'ocol le siete kiino'obo', cajila'ab Pablo tumen dze'edzec judíob u taalo'ob tu lu'umil Asia, ca tu p'u'usajo'ob u yóol tuláacal le máaco'obo'. Tu puljuba'ob tu yóokol Pabloe',

²⁸ca tu yaawtajo'ob: ¡U cajnáalile'ex u lu'umil Israel áanto'one'exi'! Lela' leti' le máac cu máan tuláacal tu'ux táan u ca'ansic máaco'ob tu contra c caajal, tu contra u ya'almaj t'aan Moisés yéetel tu contra le kulnaja'; tu yóokol lela' dzo'oc u yocsic ich kulnaj dze'edzec griego'ob, beyo' táan u kascuntic le quili'ich cúuchila'.

²⁹Tu ya'alajo'ob lela' tumen tu yilalajo'ob táan u máan Pablo ich caaj yéetel Trófimo, jun túul Efesoil, ca tu tucultajo'obe' dzo'oc u yocsic ich kulnaj xan.

³⁰Tuláacal le caajo' j p'u'uj u yóol j taalo'ob áalcabile', tu machajo'ob Pabloe' ca tu jíiltajo'ob paachil ti' le kulnaj, ca tu tzáan kalto'ob le jool najo'ob tu séeblaquilo'.

³¹Tu yóoltajo'ob u quiimso'ob, le ca j kuch u péectzilil le ba'alo'ob tu xiquin u méektáan le aj ba'atelo'obo', tu yojéeltaje' tuláacal Jerusalén p'u'uj u yóol.

³²U méektáan le aj ba'atelo'obo' tu t'anaj u aj ba'atelo'ob yéetel u yáantajo'obe' ca j bin áalcabil tac tu'ux yaan le máaco'obo'. Leti'obe' le ca tu yilajo'ob u méektáan le aj ba'atelo'ob yéetel u aj ba'atelo'obe' ca j xu'ul u jadzico'ob Pablo.

³³U méektáan le aj ba'atelo'obo' tu nadzubae', tu machaj Pabloe' ca tu ya'alaj ca ka'axac yéetel ca'a p'éel cadena; cu dzo'ocole' tu káataj máaxi' yéetel ba'ax u beetmaj.

³⁴Ba'ale' le máaco'obo' tu yaawtajo'ob jejeláas ba'alo'ob, le o'olale' u méektáan le aj ba'atelo'obo' ma' páajtji u na'atic mix ba'ali'. Tu yo'olal táan u sen yawato'obe', tu túuxtaj ca bisa'ac Pablo tu chúumuc le najo'.

³⁵Le ca j kucho'ob tac te tu'ux cu na'acal máac te j najo', le aj ba'atelo'obo' yanchaj u cuchico'ob Pablo tu yo'olal u sen p'uja'anil le máaco'obo';

³⁶tumen tuláacalo'ob táan u taalo'ob paachil táan u yaawtico'ob: ¡Quíimsa'ac!

³⁷Bin u ca'aj ocsbil Pablo te chúumuc le najo', ca tu ya'alaj ti' u méektáan le aj ba'atelo'obo': ¿Cu páajtal in wa'alic wa ba'ax? U méektáan le aj ba'atelo'obo' tu núucaj ti': ¿A wojel t'aan ich griego?

³⁸Bey túuno' ¿Ma' teech wa le Egiptoil tu cáajsaj jun p'éel ba'atel ma' úuch'ia' ca tu jóokesaj cuatro mil quiimsaj wíinico'ob te x tocoy lu'umo?

³⁹Pablo túune' tu ya'alaj ti': Tene' judíoen, u cajnáalilen Tarso, jun p'éel nojoch caaj ti' u lu'umil Cilicia; beet utz a cha'ic in t'aan yéetel le máaco'oba'.

⁴⁰U méektáan le aj ba'atelo'obo' tu cha'aj ti'; ca wa'aljaj Pablo te tu'ux cu na'acal máaco', ca tu beetaj u kab ti' le máaco'obo' u ti'al ca u maco'ob u chi'ob. Le ca tu mac u chi'obe' t'aanaj tu yéetelo'ob ich hebreo, táan u ya'alic: