Read Yucateco Hechos 22 Bible Online

Hechos 22 - Yucateco bible

Hechos 22

¹Sucu'une'ex yéetel c taata'ex, u'uye'ex ba'ax yaan in wa'al te'ex tin wo'olal.

²Le ca tu yu'ubajo'ob táan u t'aan ich hebreoe', tu jach macajo'ob u chi'ob; Pabloe' tu ya'alaj ti'ob:

³Tene' judíoen. J síijen Tarso tu lu'umil Cilicia, ba'ale' j ch'íijen way Jerusalene' yéetel xoocnajen yáanal u tzol xiquin Gamaliel, je'el bix u ca'ansic u ya'almaj t'aan le c úuchben taataobo'. Mantadz in dzaamaj in wóol u ti'al in meyajtic Ku yéetel tuláacal in pucsi'ikal, je'el bix a beetique'ex tuláacale'ex bejela'e'.

⁴Tene' tin ch'a'apachtaj ca'ach le máaxo'ob u kammajo'ob le ma'alob péectzilo', u ti'al in quiimsico'ob. Tin machaj j xiibo'ob yéetel co'olelo'ob ca tin bisajo'ob u ti'al kalbil.

⁵U noojoch le j kiino'ob yéetel le anciano'obo' leti'ob cu páajtal u ya'alico'ob jaaj tu dzajo'ob teen dzíiba'an ju'uno'ob u ti'al le sucu'uno'ob yano'ob Damascoo'. J binen te'elo' in caxant le ocsaj óolo'obo' u ti'al in taasico'ob way Jerusalene' u ti'al jadzbilo'ob.

⁶Ba'ale' ca'aliquil táan in bin te j bejo', ta'itac in kuchul Damascoe', míin chúumuc kiine', ca j téec léembanaj tin bakpach jun p'éel nojoch sáasil, ca'an u taalbal.

⁷J lúuben j lu'um. Cu dzo'ocole' tin wu'uyaj jun p'éel t'aan tu ya'alaj teen: Saulo, Saulo, ¿ba'axten ca ch'a'apachtiquen?

⁸Ca tin káataj túun: ¿Máaxech Yuumtzil? Ca tu ya'alaj: Ten Jesús Nazaretil, le máax ca ch'a'apachtico'.

⁹Le máaxo'ob yano'ob ca'ach tin wéetelo' tu yilajo'ob le sáasilo, ca j ja'ak u yóolo'ob, ba'ale' ma' tu yu'ubajo'ob u t'aan le máax t'aniqueno'.

¹⁰Tene' tin wa'alaj túun: ¿Ba'ax unaj in beetic Yuumtzil? Yuumtzile' tu ya'alaj teen: Líiken, xeen Damasco, ti' cu bin a'albil teech tuláacal ba'ax unaj a beetico'.

¹¹Tumen tu ch'óopquintajen le sáasilo, in láakinajo'obe' tu macheno'ob tin kabe' ca tu biseno'ob Damasco.

¹²Yaan ca'ach te'elo' jun túul máac Ananías u kaaba', máax cu dzo'ocbesic ma'alob u ya'almaj t'aan Moisés, tuláacal le judíob caja'ano'ob Damascoe', jach utz u t'aano'ob tu yo'olal.

¹³Ananíase' j taal u yilen, le ca j kuche' tu ya'alaj ti' teen: Sucu'un Saulo kam tu ca'a téen u sáasil a wich. Ti' le súutuco' tin kamaj tu ca'a téen u sáasil in wiche' ca j páatji in wilic leti'.

¹⁴Tu ya'alaj teen: U Ku a taataobe' úuch u yéeyech u ti'al a k aj óoltic u yóolaj, yéetel u ti'al a wilic le máax tojo' yéetel u ti'al a wu'uyic le t'aan cu jóokol tu chi'o'.

¹⁵tumen teech can t'aan tu yo'olal leti' tu táan tuláacal máaco'ob yéetel a tzicbaltic ba'ax dzo'oc a wilic yéetel a wu'uyic.

¹⁶Bejla'e' ¿ba'axten ca xáantal? Líiken ca ocja'anaquech, dzáa xan a wocsaj óolal ti' u kaaba' Yuumtzil u ti'al u p'o'ic a kebano'ob.

¹⁷Le ca j suunajen Jerusalene', j binen kulnaj payalchi' ca tin wilaj jun p'éel chíiculal.

¹⁸J chíicpaj teen Yuumtzile' ca tu ya'alaj teen: Lep' a wóoli', jóoken tu séeblaquil Jerusalén, tumen ma' túun u kamo'ob le ba'ax ca wa'alic tin wo'olalo'.

¹⁹Teen túune' tin wa'alaj ti': Yuumtzil leti'obe' u yojelo'obe' tene' quin bin ca'ach ti' tuláacal le sinagogaobo' u ti'al in bisic kalbil le máaxo'ob cu yocsaj óoltiquecho'obo', yéetel quin jadzico'ob,

²⁰le ca j we'ec u ki'ikel a palitzil Esteban le máax t'aanaj ta wo'olale', tene' ti' yanen te'elo', táan in quetic ca quiimsa'ac, tin canantaj xan u nook le máaxo'ob quiimso'.

²¹Ba'ale' Yuumtzile' tu ya'alaj teen: Xeen, tumen bin in ca'aj in túuxtech náachil ichil le máaxo'ob ma' judíobo'.

²²Tu yu'ubajo'ob tac te'ela', cu dzo'ocole' ca jo'op' u yaawtico'ob: ¡Quiimsa'ac le máaco'! ¡Ma' unaj u cuxtali'! tumen láili' táan u yawato'ob yéetel táan u pulico'ob u nooko'ob bey xan lu'um ca'anale',

²⁴u méektáan le aj ba'atelo'obo' tu ya'alaj ca ocsa'ac Pablo tu chúumuc le najo', ca tu túuxta'al u ti'al ca ja'adzac u ti'al u beeta'al u t'aan, u ti'al u yojéeltico'obe' ba'ax o'olal táan u yawat le máaco'ob tu yo'olalo'.

²⁵Ba'ale' le ca j ka'ax u ti'al jadzbile', Pabloe' tu ya'alajti'; le náacom yaan te'elo': ¿Yaan wa te'ex u páajtalil a jadzique'ex jun túul romail cu dzo'ocole' mix a wile'ex wa yaan u si'ipili'?

²⁶Le ca tu yu'ubaj le náacomo' le t'aana'j bin u ya'al ti' u méektáan le aj ba'etelo'obo': Canantabáa yéetel ba'ax can a beete tumen le máaca' romail.

²⁷U méektáan le aj ba'atelo'obo' tu nadzubáa ti' Pabloe' ca tu káataj ti': ¿Jaaj wa romailech? Pabloe' tu núucaj: Leti'en.

²⁸Tene' ya'ab taakin tu tojoltaj teen in beetinquinbáa j romail. Pabloe' tu ya'alaj: tene' sijnalen beyo'.

²⁹Yéetel lela' le máaxo'ob cu bin u jadzo'ob Pablo ca'acho' tu tzeluba'obi'; tac u náacom le aj ba'atelo'obo', le ca tu yilaj j romaile', tu ch'a'aj sajaquil tu kaxilac.

³⁰Tu jeel kiine' u náacom le aj ba'atelo'obo', tu yo'olal u káat u yojéelt ba'ax teen cu ta'acal u pool Pablo tumen le judíobe', tu luksaj le cadenaob iquil kaxa'anilo', ca tu ya'alaj ca much'lac u nojochilo'ob lej kiino'obo' yéetel tuláacal u nuuctaquil le judíobo'. Cu dzo'ocole' tu yocsaj Pablo ca tu dzaj tu táano'ob.