Read Yucateco Hechos 24 Bible Online

Hechos 24 - Yucateco bible

Hechos 24

¹Cu dzo'ocol u máan cinco kiino'obe', Ananías, u noojoch le j kiino'obo', j kuch Cesarea yéetel dze'edzec ti' le anciano'obo' bey xan yéetel jun túul abogado Tértulo u kaaba'. Lelo'oba' j taalo'ob tu táan le jalach wíinico' u ti'al u taquico'ob u pool Pablo.

²Le ca j taasa'ab Pabloe', Tértuloe' j cáaj u taquic u pool, táan u ya'alic ti' Felix: Nib óolal ti' teech nojoch jalach, tumen ta wo'olale' yaanto'on nojoch jéedzel, bey xan ya'ab ba'al ma'alobtac cu beeta'al tu yo'olal a wojéelajil.

³Nib óolal ti' a nojoch tzicbe'enil Felix tu yo'olal le ba'alo'ob c kamic mantadz tuláacal tu'uxo'.

⁴Ba'ale' u ti'al ma' c náacsic a wóole', quin káat óoltic teech ca a beet utz a wu'uyico'on jun súutuc.

⁵Tumen dzo'oc c ilique' le máaca' jun túul meyaj kaas, yéetel tuláacal yóokolcaab cu líiksic ba'atelilo'ob ichil le judíobo', leti' xan u nojochil le nazareno'obo'.

⁶Tu yóoltaj xan u kascunt le kulnajo', to'on túune' t machaje' ca t óoltaj p'is óolt yéetel c a'almaj t'aan:

⁷ba'ale' Lisiase', u náacom le aj ba'atelo'obo', tu jupubae'ca tu tocaj to'on yéetel nojoch muuk,

⁸ca tu ya'alaje' le máaxo'ob cu taquico'ob u poole' kabéet u taalo'ob ta táan. Teche' cu páajtal a káatic u chi' u ti'al ca a wojéel tu jaajil tu yo'olal le ba'alo'ob ba'ax o'olal c taquic u poolo'.

⁹Le judíob yano'ob te'elo' tu ya'alajo'ob xan bey anil tuláacal le ba'alo'oba'.

¹⁰Le jalach wíinic túuno' tu beetaj u kab ti' Pablo u ti'alca t'aanac, Pablo túune' tu ya'alaj: Yéetel nojoch qu'imac óolal quin j t'aanta táan, tumen in wojel úuch jo'op'oc a p'is óoltic le caaja'.

¹¹Je'el bix cu páajtal a káat péectziltique' chéen doce kiino'ob kuchuquen Jerusalén u ti'al in kultic Ku.

¹²Ma' tu yileno'ob wa táan in t'anal t'aan yéetel wa máaxi', mix táan in líiksic u yóolo'ob le máaco'ob kulnaj, mix ich caaj.

¹³Le máaco'oba' ma' tu páajtal u ye'esico'ob wa jaaj le ba'alo'ob ba'ax o'olal cu taquico'ob in poolo'.

¹⁴Ba'ax quin wa'alique' tene' táan in meyajtic u Ku in taataob je'el bix cu ca'ansic to'on le túumben bejo' lela' cu ya'alico'obe' jun p'éel secta, tumen quin wocsaj óoltic tuláacal ba'ax dzíiba'an ti'le a'almaj t'aano' yéetel ti' le aj bóobato'obo'.

¹⁵Yéetel quin alab óoltic Ku je'el bix leti'obe', tumen quin wocsaj óoltic yaan u ca'a púut cuxtal le quimeno'ob', le utztaco'obo' bey xan le kasa'ano'obo'.

¹⁶Le o'alale' mantadz quin wilic ma' u yantal in si'ipil tu táan Ku yéetel tu táan máaco'ob.

¹⁷Cu dzo'ocol in máan dze'edzec ja'abo'ob táanxel tu'uxo'obe', j suunajen tin lu'um u ti'al in dzáic siibalo'ob.

¹⁸Le quin beetic ca tu yilajeno'ob kulnaj dze'edzec u judíoilo'ob Asia, cu dzo'ocol in p'o'iquinbáa je'el bix u ya'alic le a'almajt'aano', ma' yéetel ya'ab máaco'obi', mix yéetel líiksaj óolali'.

¹⁹Leti'ob unaj u taalo'ob ta táan u ti'al u taquico'ob in pool wa yaan ba'ax kaas tu yilajo'ob tin beetaj.

²⁰Wa ma'e' le yano'ob waya' ca u ya'alo'ob wa yaan in si'ipil tu caxtajo'ob le ca j yanjien tu táan u múuch'ul u nuuctaquil le judíobo'.

²¹Ja'ali' wa táan u taquico'ob in pool tumen tin wa'alaj le ca j yanjien ichilo'obe': Bejela'e' táan a p'is óol tiquene'ex tumen quin wocsaj óoltic yaan u ca'a púut cuxtal le quimeno'obo'.

²²Felix le ca tu yu'ubaj lela', tumen ma'alob u yojelil ba'ax cu beetic le Cristiano'obo', tu p'ataj u ti'al u láak kiin le ba'ala', ca tu ya'alaj ti'ob: Le quéen taalac Lisias u náacom le aj ba'atelo'obo' bíin in wojéelt u láak ba'alo'ob tu yo'olal le ba'ax ca wa'alique'exa'.

²³Felix túune; tu ya'alaj ti' le náacomo' ma' u jáalkabta'al Pablo, ba'ale' ma' u jach kalic yéetel ca u cha'a u xíimbalta'al beyxan u táan óolta'al tumen u yéet bisajba'ob.

²⁴Le ca j máan dze'edzec kiino'obe' j kuch tu ca'a téen felix yéetel Drusila u yatan, lela' judía, ca tu túuxtaj t'anbil Pabloe', ca tu yu'ubaj u tzicbaltic u yocsaj óolalil Jesucristo.

²⁵Ba'ale' le ca j t'aanaj Pablo tu yo'olal jun p'éel toj cuxtal, bix unaj u cananticubáa máac, bey xan tu yo'olal le p'is óol bíin taalaco', ja'ak u yóol ca tu ya'alaj ti': bejela'e' xeen, le quéen páataque' quin t'aniquech tu ca'a téen.

²⁶Felix xane' táan u pa'atic u dza'abal taakin ti' tumen Pablo u ti'al ca u jáalkabte. Le o'olale' ya'ab u téenel tu t'anaj u ti'al u tzicbal tu yéetel.

²⁷Ca'a p'éel ja'abo'ob máan beyo', Felix túune' tu p'ataj u beetic u jalachile' ca j ooc Porcio Festo u jeelinte. Tumen Felix tu yóolaj j p'áatal ma'alo'ob tu táan le judíobo', ma' tu jáalkabtaj Pabloi'.