Read Yucateco Hechos 25 Bible Online

Hechos 25 - Yucateco bible

Hechos 25

¹J kuch túun Festo u kam u jalachil. Cu dzo'ocol u máan óoxp' éel kiine' ca j luk Cesareae' ca j bin Jerusalén.

²Te'elo' u nuuctaquilo'ob le j kiino'ob yéetel u nuuctaquilo'ob le judíobo' tu tacajo'ob u pool Pablo ti'.

³Tu káatajo'ob ti' bey jun p'éel meyaj utze', ca u taas Pablo Jerusalén. U tuuculo'obe' u túuxtico'ob quiimsbil te j bejo'.

⁴Ba'ale' Festoe' tu núucaj ti'obe': Pabloe' kala'an Cesarea, táan in tucultic in bin te'elo' ichil jun p'íit kiino'ob.

⁵Le o'olale' le máaxo'ob ichile'ex yaan páajtalil ti'obe' unaj u bino'ob tin wéetel Cesarea. Wa le máac yaan u si'ipilo' cu páajtal a taquique'ex u pool.

⁶Festoe' ti'anji Jerusalén chéen ocho wa diez kiino'ob, cu dzo'ocole' j suunaj Cesarea. Tu jeel kiine' j culaj tu cúuchil u p'isóole' ca tu túuxtaj t'anbil Pablo.

⁷Le ca j ooc Pabloe' le judíob j luko'ob Jerusalén caj taalo'ob Cesareae' tu nadzuba'obe' ca jo'op' u taquico'ob u pool tu yo'olal ya'abcach nucuch ba'alo'ob, ba'ale' mix ba'al páajtji u ye'esico'ob wa jaaji'.

⁸Pablo túune' tu ya'alaj: Tene' ma' si'ipa'anen mix ti' u ya'almaj t'aan le judíobo', mix ti' kulnaji', mix ti' Cesar sipa'aneni'.

⁹Ba'ale' tumen Festo u káat p'áatal ma'alob tu táan le judíobo', tu káataj ti' Pablo: ¿A káat bin Jerusalén u ti'al ca in p'isóoltech te'elo'?

¹⁰Pabloe' tu núucaj: Ti' yanen tu cúuchil u p'isóol Cesare' tu'ux unaj in p'is óolta'al. Je'el bix ma'alob a wojelile', ma' sipa'anen ti' le judíobo'.

¹¹Wa in beetmaj wa ba'ax cu najmatic in quiimsa'ale', ma' táan in púudzul ti' le quíimilo', ba'ale' wa ma' jaaj le ba'alo'obo'ob tu yo'olal ba'ax cu taquico'ob in poolo', mix máac cu páatal u kubiquen ti'ob. Quin káatic ca p'is óolta'aquen tumen César.

¹²Bey túuno', cu dzo'ocol u t'aan yéetel u j tzolxiquino'obe', Festoe' tu ya'alaj ti': Bey dzo'oc a káatic ca p'is óolta'aquech tumen Cesaro', yaan a bin tu táan César.

¹³Cu dzo'ocol u máan dze'edzec kiino'obe', ajaw Agripa yéetel Berenice' j bino'ob Cesarea u tzico'ob Festo.

¹⁴Tumen anji'ob ya'abcach kiino'ob te'elo', Festoe' tu tzicbaltaj ti' le ajaw ba'ax ucha'an yéetel Pablo, ca tu ya'alaj ti': Way yaan jun túul máac p'áat kala'an tumen Felix.

¹⁵Le ca j anjieen Jerusalene' u nuuctaquil le j kiino'obo' yéetel u ancianoil le judíobo' tu taco'ob teen u pool, táan u káatico'ob tene' ca in xot kinte.

¹⁶Tene' tin núucaj ti'obe' u jalachilo'ob Romae' ma' suucti'ob u xot kintico'ob mix máac wa ma' táanile' le máax cu ta'acal u poolo' ca u yilubáa yéetel le máaxo'ob taquic u poolo' u ti'al ca páatac u t'aan wa yaan ba'ax u káat u ya'alej.

¹⁷Le o'olale', le ca j taalo'ob waye', tu séebalquil tu jeel kiine' j culajen tu cúuchil in p'is óole' ca tin túuxtaj taasbil le máaco'.

¹⁸Ba'ale' le máaxo'ob j taalo'ob taquic u poolo' mix ba'al tu ya'alajo'ob ti' le ba'axo'ob tin tucultajo'.

¹⁹Chéen ba'ax tu ya'alajo'ob u ti'al u taquico'ob u poole' ba'alo'ob tu yo'olal u ocsaj óolo'ob yéetel tu yo'olal jun túul máac Jesús u kaaba', máax dzo'oc u quíimil, ba'ale' Pabloe' cu ya'alique' cuxa'an.

²⁰Tumen tene' ma' in wojel ba'ax unaj in beetic ti' jun p'éel ba'al beya', tin káataj ti' Pablo wa u káat bin Jerusalén u ti'al ca p'isóolta'ac tu yo'olal le ba'alo'obo'.

²¹Ba'ale' tumen leti' tu káataj ca p'is óolta'ac tumen César Augustoe', tin wa'alaj ca ka'alac tac quéen páatac in túuxtic tu táan.

²²Agripa túune' tu ya'alaj ti' Festo: Tac teen in káat in wu'uy le máaco'. Festoe' tu núucaj ti': Sáamal a wu'uyic.

²³Tu jeel kiine', le ca j kucho'ob Agripa yéetel Berenice', j ooco'ob yéetel nojoch nonojbáil te j cúuchilo' yéetel u méektáano'ob le aj ba'atelo'obo', bey xan u táanilbe'en tatichilo'ob le caajo'. Festoe' tu túxtaj taasbil Pablo,

²⁴cu dzo'ocole' tu ya'alaj: Ajaw Agripa yéetel tatiche'ex yane'ex way much'ucbale'exe' t éetele', je'el le máaca'. Ya'ab ti' le judíobo' dzo'oc u taquico'ob u pool Jerusalén bey xan way Cesareae', ma' tu jáawal u ya'alico'obe' unaj u quíimil.

²⁵Ba'ale' tene' quin wilique' mix ba'al u beetmaj cu najmatic u quiimsa'al; ba'ale' tumen leti' tu káataj ca p'is óolta'ac tumen César Augustoe', in tucultmaj yaan in túuxtic tu táan.

²⁶Tumen mix ba'al yaan in dzíibt ti' u tzicbe'enil César tu yo'olal, quin taasic ta táane'ex, yóokol tuláacale' ta táan, ajaw Agripa, u ti'al ca a káat u chi' u ti'al ca yanac ba'ax in dzíibte.

²⁷Tumen quin tucultique' ma' ma'alob in túuxtic jun túul máac kala'ane', ma' in wa'alic ba'ax ti' cu ta'acal u pool.