Read Yucateco Hechos 26 Bible Online

Hechos 26 - Yucateco bible

Hechos 26

¹Agripa túune' tu ya'alaj ti' Pablo: Cu páajtal a t'aan ta wo'olal. Pabloe' tu líiksaj u kabe' ca jo'op' u t'aan beya':

²Jach qui'imac in wóol tumen cu páajtal in t'aan tatáan, ajaw Agripa, u ti'al in tocquinbáa ti' tuláacal u tac poolo'ob le judíobo',

³tu yóokol tuláacale' tumen teche' a kaj óol tuláacal le ba'ax suuc c beetic ichil le judíobo' yéetel le ba'axo'ob c ba'atelt'antico'. Le o'olale' quin káatic ti' teech ca a wu'uyen yéetel chuca'an óolal.

⁴Tuláacal le judíob u yojelo'ob bix cuxlajiquen ichilo'ob tin lu'um bey xan Jerusalén cáajic tin paalil.

⁵Leti'ob xane' u yojelo'ob, yéetel cu páajtal u ya'alico'ob wa u káato'obe', cáajic tin táanquelmile' fariseoen, lela' leti' le múuch'ul jach talam ichil c ocsaj óolalo'.

⁶Bejla'e' tu taasajeno'ob u ti'al p'is óoltbile' tu yo'olal le alab óolal yaan ti' tena', tumen Kue' yaan u ca'a púut cuxquintic le quimeno'obo' je'el bix tu ya'aljilac ti' c úuchben taataobe'.

⁷U doce chi'ibalilo'ob Israele' táan u pa'atico'ob u yilico'ob le ba'ax a'ala'ana'; le o'olale' cu kultico'ob Ku yéetel cu meyajtico'ob bul kiin yéetel bul áakab. Tu yo'olal le alab óolala', ajaw Agripa, le judíobo' cu taquico'ob in pool bejela'a.

⁸¿Ba'axten te'exe' ma' ta wocsaj óoltique'ex wa Ku cu páajtal u ca'a púut cuxquintic le quimeno'ob'?

⁹Tene' tin tucultaj ca'ache' kabéet in beetic ya'ab ba'alo'ob tu contra u kaaba' Jesús Nazaretil;

¹⁰bey xan tin beetilac Jeruslén. Yéetel u páajtalil u nuuctaquil le j kiino'obo', tin kalaj, ya'ab ti' le ocsaj óolo'obo'; yéetel le quéen quiimsaco'obe' tene' quin quetic.

¹¹Ya'ab u téenel tin ja'ajadzo'ob u ti'al ca u cúulpachcunto'ob u yocsaj óolo'ob. Lela' tin beetaj ti' tuláacal le sinagogaobo', jach kuuxilnajen ti'obe' le o'olal tin ch'a'apachto'ob tac ti' le táanxel lu'umo'obo'.

¹²Tu yo'olal lela' j binen túun caajil Damasco. Dzaabteen páajtalil yéetel túuxta'aben tumen u nuuctaquil le j kiino'obo'.

¹³Ba'ale' te j bejo', ajaw Agripa, chúumuc kiine' tin wilaj jun p'éel sáasil, ca'an u taalbal u léembale' maanal ti' u léembal kiin, sáasilchaj tin bakpach yéetel tu bakpach le máaxo'ob cu bino'ob tin wéetelo'.

¹⁴Tuláacalo'on j lúubo'ob j lu'um, ca tin wu'uyaj jun p'éel t'aan táan u ya'alic teen ich hebreo: Saulo, Saulo, ¿ba'ax ten ca ch'a'apachtiquen? Táan a loobilticabáa teech, je'el bix u beetic le wacax le quéen u co'ococha'at le lóom che'o'.

¹⁵Tin wa'alaj túun: ¿Máaxech Yuumtzil? Yuumtzile' tu ya'alaj teen: Teen Jesús, le máax ca ch'a'apachtico'.

¹⁶Ba'ale' líiken. wa'alen tumen chíicpajen ti' teech u ti'alca a meyajten, u ti'al ca a jaajcunt le ba'ax dzo'oc a wilic bejela'a yéetel le ba'ax bíin in we'es techo'.

¹⁷Yaan in canantiquech ti' le judíobo' bey xan ti' Je'el táanxel lu'umilo'obo', ti' máaxo'ob quin túuxtiquech bejla'e'.

¹⁸Quin túuxtiquech ti'obe' u ti'al ca a p'il u yicho'ob, uti'al ma' xíimbalo'ob ti' éekjoch'e'enil ba'ale' ti' le sáasilo', u ti'al ma' u yantaalo'ob yáanal u páajtalil Satanás ba'ale' yáanal upáajtalil Ku, yéetel u ti'al ca u yocsaj óolteno'ob, u ti'al ca u kamo'ob beyo' sa'atsaj si'ipil bey xan jun p'éel cúuchil ichil le máaxo'ob jun páay cu bin ta'ano'ob tumen Kuo'.

¹⁹Bey túuno', ajaw Agripa, ma' tin beetaj in j ma' u'uyajt'aanil ti' le ba'ax e'esa'ab teen ca'ano',

²⁰ba'ale' tin tze'ectaj le ma'alob péectzilo' táanile' ti' le máaxo'ob yano'ob Damascoo', cu dzo'ocole' ti' le yano'ob Jerusalen yéetel ti' tuláacal u lu'umil Judea, bey xan ti' le máaxo'ob ma'judíobo', táan in káat óoltic ti'obe' ca u kex u tuuculo'ob yéetel ca suunaco'obti' Ku, ca u beeto'ob xan meyaj cu ye'esic dzo'oc u kexic u cuxtalo'ob.

²¹Tu yo'olal lela' le judíobo' tu macheno'ob kulnaje' ca tu yóoltajo'ob u quiimseno'ob.

²²Ba'ale' yéetel u yáantaj Kue' ma'alob in wanil tac bejela'e', táan in tze'ectic u kaaba' Ku ti' tuláacal, ti' mejentaco'ob yéetel ti' nuuctaco'ob. Mix jun téen tin wa'alaj mix ba'al jela'an ti' le ba'axo'ob tu ya'alaj le aj bóobato'ob yéetel Moisés bíin úuchuco',

²³u káat u ya'ale', le Cristoo' yaan u mukyaj, cu dzo'ocol u quíimile' leti' yáax máax bíin ca'a púut cuxlac ti' le quíimilo', yéetel yaan u tze'ectic u sáasilil le tocsajilo' ma' chéen ti' c éet caajalo'obi' ba'ale' tac ti' le táanxel caajilo'obo'.

²⁴Le ca tu ya'alaj Pablo le ba'alo'oba', Festoe' tu yaawtaj: ¡Choco a pool, Pablo! Iquil a sen xooque' dzo'oc u chocoltal a pool.

²⁵Ba'ale' Pabloe' tu núucaj: Ma' choco in pooli', a tzicbe'enil Festo; tumen le ba'ax quin wa'alica' toj yéetel jaaj xan.

²⁶Way yaan ajaw Agripae', máax u kaj óol ma'alob le ba'alo'oba', le o'olal quin t'aan yéetel kub óolal tu táan; tumen in wojel leti'e' u yojel tuláacal le ba'alo'oba', tumen ma' ba'alo'ob beeta'ab ti' jun p'éel ta'acbil cúuchili'.

²⁷¿Ca wocsaj óoltic, ajaw Agripa, le ba'ax tu ya'alaj le aj bóobato'obo'? Tene' in wojel ca wocsaj óoltic.

²⁸Agripae' tu ya'alaj: Jun p'íit tu binetaj a wocsic tin pool in betiquinbáa cristianoil.

²⁹Pabloe' tu ya'alaj: Tu yo'olal jun p'íit wa tuyo'olal ya'ab, ca u yóolt Ku ma' chéen techi', ba'ale' tuláacal le máaxo'ob táan u yu'ubiqueno'ob bejela'e', ca béeychajco'ob je'el bix tena', quex ma' yéetel le cadenaoba'.

³⁰Cu dzo'ocol u ya'alic Pablo lela', líik le ajawo' bey xan le jalach wíinico' jun múuch' yéetel Berenice yéetel tuláacal le máaxo'ob culucbalo'ob te'elo',

³¹ca j bino'ob jun páayil u ti'al u t'aano'ob tu yóokol le ba'alo'oba'. Ca tu ya'alajo'ob tu baatzilo'ob: Le máaca'; ma' u beetmaj mixba'al u ti'al ca u najmat u quiimsa'ali'.

³²Agripae' tu ya'alaj ti' Festo: Cu páajtal ca'ach u jáalkabta'al le máaca', wa ma' úuchic u káatic ca p'is óolta'ac tumen César.