Read Yucateco Hechos 28 Bible Online

Hechos 28 - Yucateco bible

Hechos 28

¹Le ca j kucho'on j lu'ume' t ojéeltaj Malta u kaaba' le peteno'.

²Le máaxo'ob cajnáalo'ob te'elo', jach ma'alob tu bisajuba'ob t éetel, tumen tu t'abo'ob jun p'éel nojoch káak tu yo'olal le que'el yéetel le cháac cu káaxalo' ca tu t'anajo'on tuláacalo'on u ti'al c kíinticbái'.

³Pablo túune' tu molaj jun p'íit tiquin si', táan ca'ach u dzáic te j káako' ca jóok jun túul loolob caan táan u púudzul ti' le káako' ca j chi'ib u kab, ti' j p'áat ch'uytal le j loolob caano'.

⁴Le máaxo'ob cajnáalo'ob te'elo', le ca tu yilajo'ob le loolob caan ch'uyucbal tu kab Pabloo', tu ya'alajo'ob tu baatzilo'ob: Tu jaajile' le máaca' jun túul quiimsaj wíinic, quex tumen mix ba'al úuch ti' te j ka'anabo', u ti'bil bejilo'ob kuo'obe' ma' táan u cha'ic u cuxtal.

⁵Ba'ale' Pabloe' tu tíitaj le loolob caan te j káako', cu dzo'ocole' mix ba'al úuch ti'.

⁶Tuláacalo'ob táan ca'ach u pa'atico'ob ca chu'upuc wa ca lúubuc quimen. Cu dzo'ocol u sen pa'atajo'obe', le ca tu yilajo'ob mix ba'al cu yúuchul ti'e', tu tucultajo'ob yaanal ba'al, ca jo'op' u ya'alico'obe' Pabloe'jun túul ku.

⁷Naadz ti' le cúuchilo' ti' yaan u lu'umo'ob u nojochil le peteno', u kaaba'e' Publio, lela' tu kamajo'on yéetel tu táan óoltajo'on ma'alob óox p'éel kiino'ob.

⁸U taata Publioe' chilicbal tumen koja'an, táan u chocwil yéetel yaan ki'ik nakil ti'. Pabloe' j ooc u yilej; cu dzo'ocol u payalchi'e', tu dzaj u kab tu yóokole' ca j utzchaji.

⁹Yéetel lela', j taalo'ob xan le u láak koja'ano'ob caja'ano'ob te j peteno' ca j dzaab u toj óolalo'ob.

¹⁰Jach ya'ab utz tu beetajo'ob to'on; cu dzo'ocole' le ca jóoko'on u ti'al c binbale', tu dzajo'ob tuláacal ba'ax kabéet to'on.

¹¹Cu dzo'ocol c antal óox p'éel winalo'ob te j peteno' j oocon ti' jun p'éel cheem tu máansaj u kiinilo'ob que'el te'elo', le cheema' Alejandríail táan u bisic tu táanile' u yoochel kuob Castor yéetel Pólux.[2]

¹²J kucho'on tu ka'anabil Siracusa tu'ux j p'áato'on óox kiin.

¹³J luko'on te'elo' ca j bino'on naadz jáal ja' tac ca j kucho'on Regio. Tu jeel kiine' j taal jun p'éel noojol iik, tu ca'a p'éel kiine' j kucho'on tac Puteoli.

¹⁴Te'elo' t ilaj dze'edzec sucu'uno'ob, máaxo'ob tu káat óoltajo'ob to'on ca p'áataco'on tu yéetelo'ob jun p'éel semana, cu dzo'ocole' ca j bino'on Roma.

¹⁵Le sucu'uno'ob yano'ob Romao' tu yojéeltajo'ob táan c bin. Bey túuno' j óoko'ob u ch'a'ob c beel tac tu kíiwiquil Apio, yéetel ti' le cúuchil cu kaaba'intic óox p'éel najil u'ula'. Le ca tu yilajo'obe' Pabloe' tu dzaj nib óolal ti' Ku, ca yanchaj u yóol.

¹⁶Le ca j kucho'on Romae' le náacomo' tu kubaj le j kal máaco'obo' ti' u noojoch le j canan máaco'obo', ba'ale' Pabloe' j cha'ab u cajtal jun páayil, canatbil tumen jun túul aj ba'atel.

¹⁷Cu dzo'ocol u máan óox p'éel kiin kuchuque' Pabloe' tu túuxtaj t'anbil u nuuctaquilo'ob le judíob yano'ob Romao'. Le ca j much'lajo'obe' tu ya'alaj ti'ob: In láake'ex, quex ma' tin beetaj mix jun p'éel kaas ti' le judíob mix ti' le ba'ax tu ca'ansajo'ob to'on le c úuchben taataobo', j ku'uben Jerusalén tu kab le Romailo'obo'.

¹⁸Le ca tu káato'ob in chi'e', leti'obe' tu yóoltajo'ob u jáalkabteno'ob, tumen ma' tu caxtajo'ob ba'ax o'olal in quiimsa'ali'.

¹⁹Ba'ale' le judíobo' ma' tu yóoltajo'obi' ca yanchaj in káat óoltic ca p'is óolta'aquen tumen César, quex mina'an ba'ax o'olal in taquic u pool in wéet caajalo'ob.

²⁰Le o'olale' tin t'aanaje'ex u ti'al in wilque'ex yéetel in t'aan ta wéetele'ex, tumen tu yo'olal le alab óolal yaan ti' to'on le Israelitaone' kaxa'anen yéetel le cadenaoba'.

²¹Tu ya'alajo'ob túun ti': To'one' ma' j kam mix junp' éel ju'un ti' Judea ta wo'olali'; mix jun túul xan ti' le c láako'ob judíob j luko'ob Judea u ti'al u taalo'ob waya' u ya'alo'ob wa ba'ax kaas ta wo'olali'.

²²C káat c ojéelt ba'ax ca tucultic teech, tumen c ojele' tuláacal tu'ux táan u yúuchul t'aan tu yo'olal le túumben ca'ansaja'.

²³Bey túuno' tu yéeyajo'ob jun p'éel kiine' ca j bin ya'abcach máaco'ob tac tu'ux kucha'an Pablo. Cáajic ja'atzcab kiin tac u binbal kiine' tu tzicbataj u ajawil Junab Ku ti'ob, táan u p'is muktic u beetic u yilico'obe' ti' Yuum Jesús cu chucpajal u ya'almaj t'aan Moisés bey xan u dzíibo'ob le aj bóobato'obo'.

²⁴Dze'edzec ti'obe' tu kamajo'ob ba'ax tu ya'alaj Pablo, ba'ale' u láako'obe' ma' tu yocsaj óolto'obi'.

²⁵Tumen ma' queet u tuuculo'ob ichilo'obe' jo'op' u bino'ob. Pablo túune' tu ya'alaj ti'ob: Ma'alob t'aanajic Quili'ich Pixan ti' c úuchben taataob tu chi' Aj bóobat Isaías, táan u ya'alic:

²⁶Xeen a wa'al ti' le caaja': Te'exe' bíin a wu'uye'ex ba'ale' ma' bíin a na'ate'exi'. Bíin a wile'ex ba'ale' ma' bíin a kaj óolte'exi',

²⁷tumen u pucsi'ikal le caaja' dzo'oc u chichtal, yéetel jach kaas u yu'ubajo'ob yéetel muudzul u yicho'ob; u ti'al ma' u paacato'ob yéetel u yicho'ob, mix u yu'ubajo'ob yéetel u xiquino'ob, mix u na'atajo'ob yéetel u pucsi'ikalo'ob, mix u suuto'ob ti' teen u ti'al ca in dzáa u tojóolalo'ob.

²⁸Ojéelte'ex túune', bejela'e' le u tocsajil Kua' cutúuxta'al ti' le máaxo'ob ma' judíobo', leti'obe' bíin u yu'ubo'ob.

²⁹Le ca tu ya'alaj Pablo lela', le judíobo' j bino'ob táan u sen t'anal t'aano'ob tu baatzilo'ob.

³⁰Pabloe' j p'áat ca'a p'éel túulis ja'ab te j naj cu majanbo'otico', tu kamaj xan tuláacal le máaxo'ob cu bin ilico'.

³¹Mix máac wet' ti' u tze'ectic u ajawilil Ku, yéetel u ca'ansaj tu yo'olal Yuumtzil Jesucristo.