Read Yucateco Hechos 5 Bible Online

Hechos 5 - Yucateco bible

Hechos 5

¹Ba'ale' jun túul máac Ananías u kaaba'e' yéetel Safira u yatane', tu conajo'ob jun p'éel lu'um.

²Le máaca' j p'áat yéetel dze'edzec u tojol le lu'umo' ca tu bisaj u yalab ti' le apóstolo'obo'. U yatane' u yojel xan lela'.

³Pedroe' tu ya'alaj túun ti': Ananías ¿ba'axten j chu'up a pucsi'ikal tumen Satanás ca tu beetaj a tusic Quili'ich Pixan u ti'al ca p'áatac teech dze'edzec le taakin bo'ota'ab teech tu yo'olal le lu'umo'?

⁴¿Ma' wa a ti'al le lu'umo'? cu dzo'ocol a conique' ¿ma' waa ti'al u taakinili'? ¿Ba'axten ta tucultaj a beetic lela'? Ku ta tusaj, ma' wíinico'obi'.

⁵Ananíase' le ca tu yu'ubaj lela' j lúub quimen. Tuláacal le máaxo'ob kuch u yojéelto'ob lela', jach sajacchajo'ob.

⁶Ca j taal dze'edzec táanquelem xi'ipalalo'obe', tu to'ajo'ob le wíinclilo' ca tu bisajo'ob u muco'ob.

⁷Cu dzo'ocol u máan óox p'éel orae' ca j ooc u yatan Ananías, ba'ale' ma' tu yojéeltaj ba'ax dzo'oc u yúuchuli'.

⁸Pedroe' tu káat chi'itaj ti': A'al teen, ¿ta conaje'ex le lu'um ti' le tojol ta wa'alaje'exo'? Leti'e' tu núucaj: beyo', bey t conajilo'.

⁹Pedroe' tu ya'alaj ti': ¿Ba'axten queetchaj a tuucule'ex u ti'al a túuntique'ex u yóol u Quili'ich Pixan Yuutzil? Je'el yano'ob táancab le máaxo'ob tu biso'ob u muco'ob a wíichamo'; beoraa' binuca'ajo'ob u bisecho'ob u muquecho'ob tac teech.

¹⁰Ti' le súutuco' j lúub quimen Safira tu ni' u yooc Pedro. Le ca j ooc le táanquelem xi'ipalalo'obo' tu yilajilo'ob quimen, tu jóokesajo'obe' ca tu muco'ob tu tzéel u yíicham.

¹¹Tuláacal u máaquilo'ob le iglesiao', yéetel tuláacal le máaxo'ob tu yojéeltajo'ob le ba'alo'oba' jach sajacchajo'ob.

¹²Le apóstolo'obo' tu beetajo'ob ya'abcach chíiculalo'ob yéetel jakbe'en ba'alo'ob ichil le máaco'obo'. Láaj much'lajo'ob yéetel jun p'éelili' tuucul tu jool caajil Salomón.

¹³Mix jun túul ti' le u láak máaco'ob tu yóoltaj u much'ubáa yéetelo'obi', ba'ale' jach utzil t'aanajico'ob le máaco'obo'.

¹⁴Ya'ab máaxo'ob tu yocsaj óoltajo'ob Yuumtzil, ichilo'obe' yaan xiibo'ob bey xan co'olelo'ob.

¹⁵Tac le máaxo'ob koja'ano'obo' cu jóokesa'alo'ob tu yóokol le bejo'obo' cu dza'abalo'ob ti' kóoch che'ob yéetel ti' póopo'ob, u ti'al beyo' le quéen máanac Pedroe' quex chéen u yoochel ca máanac yóokol wa máacal máac ti'obi'.

¹⁶Bey xan ya'abcach ti' u cajnáalilo'ob le caajo'ob naadztaco'obo' j taalo'ob Jerusalén, táan u taasico'ob u j kooja'ano'ob yéetel le máaxo'ob cu beeta'al u mukyajo'ob tumen kaakas pixano'obo'; tuláacalo'ob j dza'ab u toj óolalo'ob.

¹⁷U noojoch le j kiino'ob yéetel tuláacal u tzaypacho'ob le saduseob yano'ob tu yicnalo', j chu'upo'ob yéetel loolob tuucul,

¹⁸ca tu mach u biso'ob le apóstolo'obo' ca tu kalajo'ob ti' u najil chúumuc caaj.

¹⁹Ba'ale' jun túul u ángel Yuumtzile' tu je'ekabtaj u jool najilo'ob le naj yéetel áakabe' ca tu jóokeso'ob, táan u ya'alic ti'ob:

²⁰Xeene'ex, wa'alene'ex kulnaj ca a tzicbalte'ex ti' le máaco'obo' tuláacal u t'aanilo'ob le túumben cuxtala'.

²¹Le ca tu yu'ubajo'ob lela', jach u ti'al u sáastal tu jeel kiine' j bino'ob kulnaj ca jo'op' u ca'ansajo'ob. Ca'aliquile' u noojoch le j kiino'obo' yéetel le máaxo'ob yano'ob tu yéetelo' tu much'quintajo'ob u nuuquilo'ob le caajo', lelo'oba' tuláacal u ancianoilo'ob u caajil Israel, ca tu túuxtajo'ob ch'a'abil le apóstolo'obo' te j naj tu'ux kala'ano'obo'.

²²Ba'ale' le ca j kuch le j canan máaco'ob te j najo' mix máac tu yilajo'obi' ca j suunajo'ob yéetel u péectzilil,

²³táan u ya'alico'ob: T ilaj le naj tu'ux dza'ano'obo' jach ma'alob kala'anil, le aj ba'atelo'ob xano' ti' yano'ob tu jool le kalab najo' táan u canantico'ob ma'alob; ba'ale' le ca t je'aje', mix máac t ilaj ichil.

²⁴U noojoch le máaxo'ob cu canantico'ob le kulnaj', yéetel u nuuctaquil le j kiino'obo', le ca tu yu'ubajo'ob lela', jo'op' u tucultico'ob tac tu'ux cun kuchul tuláacal le ba'alo'oba'.

²⁵Ti' le súutuco' j kuch jun túul máaque' ca tu ya'alaj ti'ob: Le máaco'ob ta kale'exo', ti' yano'ob kulnaje' táan u ca'ansico'ob le caajo'.

²⁶U noojoch le j canano'obo' bin tu yéetel le j canano'obo' ca tu taasajo'ob le apóstolo'obo', ba'ale' x ma' mukulmuukili', tumen sajac u muluchtuunta'alo'ob tumen le máaco'obo'.

²⁷Le ca j taasa'abo'obe' j dzaabo'ob tu táan u nuuctaquil le caajo'. U noojoch le j kiino'obo' tu ya'alajo'ob túun ti'ob:

²⁸To'one' jach tu jaajil t a'alaj ti' te'ex ma' a ca'ansaje'ex ti'le kaaba'o'. ¿Ba'ax túun dzo'oc a beetique'ex? Dzo'oc a chupque'ex Jerusalén yéetel a ca'ansaje'ex, a káat a dza'ex xan t óokol u ki'ikel le máaco'.

²⁹Pedro yéetel u láak apóstolo'obo' tu núucajo'ob: Unaj c u'uyic u t'aan Ku, ma' u t'aan máaco'obi'.

³⁰U Ku le c úuchben láako'obo' tu ca'a púut cuxquintaj Jesús, máax ta quiimsaje'ex le ca ta sinaje'ex te j cruzo'.

³¹Kue' dzo'oc u dzáic ca'anal, tu x no'oj kab, u ti'al ca u beet u j nojochil yéetel j tocsajil, u ti'al u dzáic ti' u caajil Israele' kex tuucul yéetel sa'atsaj si'ipil.

³²To'one' u jaajcunajo'on ti' lela', bey xan le Quili'ich Pixano', máax dza'an tumen Yuum Ku ti' tuláacal le máaxo'ob cu yu'ubico'ob u t'aano'.

³³U nuuctaquil le caajo', le ca tu yu'ubajo'ob lela', j kuuxilnajo'ob ca tu yóoltajo'ob u quiimso'ob.

³⁴Ba'ale' ti' yaan ichilo'obe' jun túul fariseo u kaaba'e' Gamaliel, lela' jun túul u ca'anbesajil le a'almaj t'aano', máax jach tzica'an tumen le máaco'obo'. Wa'alaje', ca tu ya'alaj, ca jóokesa'aco'ob táancab jun súutuc le apóstolo'obo'.

³⁵Cu dzo'ocole' tu ya'alaj ti'ob: U cajnáalile'ex Israel, tuculte'ex ma'alob ba'ax can a beete'ex yéetel le máaco'oba'.

³⁶Ka'ajac te'exe' ti' le kiino'ob dzo'oc u máano'obo' j líik Teudas táan u ya'alicubáa nojoch máac, tu paache' j bino'ob míin cuatrocientos wíinico'ob. Ba'ale' j quiimsabe' ca láaj ki'itpaj tuláacal le máaxo'ob j tzaypachto' ca j xu'ul tuláacal.

³⁷Cu dzo'ocole' tu kiinilo'ob ca j beeta'ab le censo', j líik Judas le j Galileaile', ca j bin ya'ab máaco'ob xan tu paach; j quiimsa'ab xane' ca láaj ki'itpaj le máaco'ob j tzaypachto'.

³⁸Le o'olale', p'ate'ex le máaco'oba', ma' a wocsicaba'ex tu yéetelo'ob, tumen le ba'ala' wa ti' máaco'ob u taale' yaan u xu'ulul;

³⁹ba'ale' wa ti' Ku u taale' ma' tu páajtal a xu'ulsique'ex. Canantaba'ex bic úuchuc wa táan a ba'atele'ex tu contra Ku.

⁴⁰Tuláacalo'ob tu chíinpooltajo'ob lela'. T'a'an túun le apóstolo'obo' ja'ajadza'abo'obe' ca j a'ala'ab ti'ob ma' u suuto'ob t'aan tu kaaba' Jesús, cu dzo'ocole' ca jáalkabta'abo'ob.

⁴¹Le apóstolo'obo' jach qui'imac u yóolo'ob úuchic u lukulo'ob tu táan le jalach wíinico'obo' tumen Kue' tu yóoltaj ca u mukyajto'ob sublaquil tu kaaba' Jesús.

⁴²Ma' jáaw u ca'ansico'ob yéetel u tze'ectico'ob u kaaba' Jesucristoi', sáamsamal te j kulnaj bey xan te j najo'obo'.