Read Yucateco Hechos 9 Bible Online

Hechos 9 - Yucateco bible

Hechos 9

¹Ca'aliquile' Sauloe' ma' jáaw u taasic sajbe'entzilo'ob beyxan quíimil tu yóokol u yocsaj óolo'ob Yuumtzil. Le o'olale' j bin u yil u noojoch le j kiino'obo',

²u ti'al u káatic dzíibil ju'uno'ob tu'ux cu dza'abal páajtalil ti' ca xi'ic tac tu sinagogailo'ob Damasco u caxant le máaxo'ob u kammajo'ob le ma'alob péectzilo' u ti'al u kax u taaso'ob Jerusalén, xiibo'ob bey xan co'olelo'ob.

³Ca'aliquil táan u bin tu bejil Damascoe', le ca j náadz ti' le caajo', téec léembalnaj tu bakpach jun p'éel sáasilil ca'an u taal.

⁴Saulo' túune' j lúub lu'ume' ca tu yu'ubaj jun p'éel t'aan, táan u ya'alic ti'; Saulo, Saulo, ¿ba'axten ca ch'a'apachtiquen?

⁵Sauloe' tu káat chi'itaj túun: ¿Máaxech Yuumtzil? Le t'aano' tu núucaj: Teen Jesús le máax ca ch'a'apachtico'. Táan a loobilticabáa teech, je'el bix u beetic le wacax le quéen u co'ococha'at le lom che'o'.

⁶Saulo túune' táan u quiquilanquil tumen sajaque', ca tu ya'alaj: Yuumtzil, ¿ba'ax a káat ca in beete? Yuumtzile' tu ya'alaj ti': Líiken ooquen te j caajo'. Ti' cu bin a'albil teech ba'ax unaj a beetique'.

⁷Le máaco'ob u yéet bino'ob Saulo' jach ja'ak u yóolo'ob, tumen tu yu'ubajo'ob le t'aano' ba'ale' mix máac tu yilajo'ob.

⁸Cu dzo'ocole'; j líik Saulo', ba'ale' le ca tu p'ilaj u yiche' ma' páatchaj u yilic mix ba'ali'. Bey túuno' j ma'ach u kabe' ca j bisa'ab Damasco.

⁹Óox p'éel kiin p'áat ma' tu páajtal u paacat, ma' jaani' mix tu yukaj mix ba'ali'.

¹⁰Caja'an Damasco jun túul j canbal Ananías u kaaba', ti' máax tu chíicbesubáa Yuumtzile' ca tu ya'alaj ti': Ananías. Leti'e' tu núucaj: Je'elena', Yuumtzil.

¹¹Yuumtzil túune' tu ya'alaj ti': Líiken xeen ti' le bej cu kaaba'intic Toj Bej, tu yotoch Judase' káat péectzilt jun túul máac Tarsoil, Saulo' u kaaba'. Táan u Payalchi'.

¹²Dzo'oc u yilic u chíicpajal ti'e' jun túul máac Ananías u kaaba', táan u yocol yéetel táan u dzáic u kab tu yóokol u ti'al ca paacatnac tu ca'a téen.

¹³Ananíase', le ca tu yu'ubaj lela', tu ya'alaj: Yuumtzil ya'ab máaxo'ob dzo'oc u tzicbaltico'ob ti' teen tu yo'olal le máaca', yéetel buca'aj loob dzo'oc u beetic Jerusalén ti' le máaxo'ob u yocsmaj óoltmajo'ob a kaaba'o'.

¹⁴Bejela'e' j taal waye' yéetel u páajtalil u noojoch le j kiino'obo' u ti'al u kax u bis tuláacal le máaxo'ob cu ch'a'achi'itico'ob a kaaba'e'.

¹⁵Ba'ale' Yuumtzile' tu ya'alaj ti': Xeen, tumen le máaco' in yéeymaj u ti'al ca u tzicbalt in kaaba' ti' u cajnáalilo'ob yaanal lu'umo'ob, ti' ajawo'ob, ti' le Israelilo'ob xano'.

¹⁶Teen quin in we'es ti' buca'aj ba'alo'ob unaj u mukyaj tin wo'olal.

¹⁷Ananías túune' j bin tac ti' le naj tu'ux yaan Sauloo'. Le ca j ooque' tu dzaj u kab tu yóokole' ca tu ya'alaj ti': Sucu'un Saulo, Yuumtzil Jesuse', le máax tu chíicbesjubáa ti' teech te j bej le tu'ux taalecho' tu túuxtajen u ti'al ca paacatnaquech tu ca'a téen yéetel u ti'al ca chu'upuquech yéetel Quili'ich Pixan.

¹⁸Tu séeblaquil ti' u yiche' júut ba'alo'ob bey u séel ixi'ime' ca j páatji u paacat tu ca'a téen. Sauloe' j líik túune'ca j ocja'anaji.

¹⁹Cu dzo'ocole' jaani ca yanchaj u muuk tu ca'a téen. Ca j p'áat dze'edzec kiino'ob tu yicnal le ocsaj óolo'ob yaan Damasco'.

²⁰Cu dzo'ocole' Sauloe' jo'op' u tze'ec te j sinagogaobo' táan u ya'alique' Jesuse' leti' u Paal Junab Ku.

²¹Tuláacal le máaxo'ob u'uyico' ja'ak u yóolo'ob táan u ya'alico'ob: ¿Ma' wa leti' le máac ch'a'apachtic le máaxo'ob cu ch'a'achi'itico'ob u kaaba' Jesús tu caajil Jerusaleno'? ¿Ma' wa leti' le máax taal way u ti'al u kax u biso'ob yéetel u kubo'ob ti' u nuuctaquil le j kiino'obo'?

²²Ba'ale' Sauloe' tze'ecnaj yéetel nojoch páajtalil, táan u ya'alique' Jesuse' leti' le Cristo', ca tu sa'asataj u yóol le judíob yano'ob Damascoo'.

²³Cu dzo'ocol u máan ya'abcach kiino'obe', le judióbo' tu múuch' tucultajo'ob u quiimsico'ob Saulo';

²⁴ba'ale' leti'e' j kuch u yojéelte. Bul kiin yéetel bul áakab táan u pa'atico'ob tu jool najilo'ob le caajo' u ti'al u quiimsico'ob,

²⁵ba'ale' le j ocsaj óolo'obo' tu dzajo'ob ti' jun p'éel nojoch xaaque' ca tu yéemso'ob yéetel áakab paachil ti le tuulumil bakpachtic le caajo'; bey púudzico'.

²⁶Le ca j kuch Saulo Jerusalene' tu yóoltaj u nupubáa yéetel le ocsaj óolo'obo', ba'ale' tuláacalo'obe' sajacchajo'ob ti' tumen ma' tu yocsaj tu yóolo'ob wa tu jaajil dzo'oc u yocsaj óol ti' Yuum Jesúsi'.

²⁷J bisa'ab túun tumen Bernabé tu táan le apóstolo'obo'. Tu tzicbaltaj ti'ob bix úuchic u yila'al Yuum Jesús tumen Saulo te j bejo', bix xan t'a'anic tumen Yuumtzil, bix xan t'aanajic Saulo yéetel tuláacal kub óol tu caajil Damasco.

²⁸Sauloe' j p'áat túun Jerusalén táan u máan yéetelo'ob.

²⁹Táan u t'aan yéetel kub óolal tu kaaba' Yuumtzil táan u tzicbal yéetel táan u ba'atel t'aan yéetel le judíob cu t'aano'ob ich griegoo', ba'ale' lelo'oba' táan u yilico'ob bix je'el u quiimsico'obe'.

³⁰Le sucu'uno'obo' le ca tu yilajo'ob lela', tu bisajo'ob Saulo tac cesarea, te túuno' tu túuxtajo'ob tac tarso.

³¹Tuláacal le iglesiaob tu lu'umil Judea, Galilea yéetel Samariae', yaan jéedzel ti'ob yéetel taan u ch'a'ico'ob muuk. Cuxa'ano'ob ti' u sajaquilil Yuumtzil, bey xan táan u ya'abtalo'ob yéetel u yáantaj Quili'ich Pixan.

³²Le ca j máan Pedro u xíimbalt le sucu'uno'obo' j bin xan u yil le ocsaj óolo'ob cajacbalo'ob Lida.

³³Te'elo' tu yilaj jun túul máac u kaaba'e' Eneas, ocho ja'abo'ob chilac tumen tu'uch' u wíinclil.

³⁴Pedroe' tu ya'alaj ti' Eneas, Jesucristoe' cu dzáic a toj óolal. Líiken nu'ucbes u nu'ucul a chital. Tu séeblaquil j líik Eneas.

³⁵J ila'ab tumen tuláacal le máaxo'ob caja'ano'ob Lida yéetel Sarono', tu yocsaj óolto'ob Yuumtzil.

³⁶Ti' le kiino'obo' yanchaj tu caajil Jope jun túul x ocsajóol u kaaba'e' Tabita, ich griegoe' cu ya'ala'al Dorcas. Le co'olela' mantadz táan u beetic utz yéetel táan u yáantic le óotzilo'obo'.

³⁷Ti' le kiino'obo' Dorcase' koja'anchaje' ca j quíimi; cu dzo'ocol u p'o'obol u wíinclile' ca j dza'ab ti' jun p'éel u ca'anal káasabil le najo'.

³⁸Jope' naadz yanil ti' Lida, le caaj tu'ux yaan Pedroe'. Le ca ojéelta'ab tumen le ocsaj óolo'ob ti' yaan te'elo', tu túuxtajo'ob ca'a túul máaco'ob u ya'alo'ob ti': Co'oten Jope tu séeblaquil.

³⁹Pedroe' j bin tu yéetelo'ob. Le ca j kuche', j bisa'ab te j naj le tu'ux dza'an le wíinclilo'. Tuláacal túun le x quimen íichamo'obo' tu bakpachto'ob Pedro táan u yokolo'ob táan xan u ye'esico'ob ti'e' le nooko'ob beeta'ab tumen Dorcas ca'aliquil cuxa'ano'.

⁴⁰Cu dzo'ocole' Pedroe' tu beetaj u láaj jóokolo'ob. J xolaje' ca j payalchi'inaji'; tu pactaj le co'olel quimeno' ca tu ya'alaj: Tabita líiken. Le co'olel túuno' tu p'ilaj u yih, tu pactaj Pedroe' ca j culaji.

⁴¹Leti' túune' tu machaj tu kabe' ca tu líiksaj; cu dzo'ocole' tu t'anaj le sucu'uno'ob yéetel le x quimen íicha'amo'obo', ca tu kubaj cuxa'an ti'ob.

⁴²Lela' j kuch ojéeltbil ti' tuláacal u caajil jope, ya'ab túune' tu yocsaj óoltajo'ob Yuumtzil.

⁴³Pedroe' j p'áat dze'edzec kiino'ob te j caajo', tu yotoch cu meyajtic kéewel u kaaba'e' Simón.