Read Yucateco Romanos 10 Bible Online

Romanos 10 - Yucateco bible

Romanos 10

¹In sucu'une'ex in dzíibolal yéetel in payalchi' tu yo'olal le israelitaobo' leti' lela': ca to'ococo'ob.

²Tumen quin wa'alic tu yo'olalo'obe' yaan ti'ob jun p'éel nojoch kub óolal ti' Ku, chéen ba'ale' u kub óolalo'obe' ma' u ch'a'amaj u muuk ti' jun jun p'éel chuca'an kaj óolali'.

³Tumen ma' u yojelo'ob bix u beetic Ku u ti'al u dzáic máaco'ob ma'alob tu táani'; táan u caxtico'ob tu juunal u yóolo'ob bix u yantalo'ob ma'alob tu yéetele', quex ma' u yantalo'ob yáanal le bix u ya'almail Kuo'.

⁴Tumen Cristoe' leti' u xuul u ya'almaj t'aan Moisés yéetel cu beetic u yantalo'ob ma'alob tu táan Ku tuláacal le máaxo'ob cu yocsico'ob u yóol ti'e'.

⁵U ti'al ca dza'abac máac ma'alob tu táan Ku tu yo'olal le a'almaj t'aano', Moisese' tu dzíibtaj beya': Le máax cu dzo'ocbesic le a'almaj t'aano': cu cuxtal tu yo'olal.

⁶Ba'ale' u ti'al ca dza'abac máac ma'alob tu táan Ku tu yo'olal le ocsaj óolalo' cu ya'alic beya': Ma' a wa'alic ta pucsi'ikal: ¿Máax cun na'acal ca'an? Lela' u ti'al u beeta'al u yéemel Cristo;

⁷Mix a wa'alic: ¿Máax cun j éemel tu sen taamil lu'um? Lela' u ti'al u beeta'al u líikil Cristo ichil quimeno'ob.

⁸¿Ba'ax túun cu ya'alic? Naadz ti' teech yaan le t'aano', ti' a chi' yéetel ti' a pucsi'ikal. Lela' leti' le u t'aanil ocsaj óolal c tze'ectico'.

⁹Wa yéetel a chi' ca cáantic Jesús bey a Yuumtzile' yéetel ca wocsaj óoltic ta pucsi'ikal líiksa'ab ti' le quíimil tumen Kuo', bíin yanac teech tocsajil.

¹⁰Tumen yéetel le pucsi'ikalo' cu yúuchul ocsaj óolal u ti'al ca dza'abac máac ma'alob tu táan Ku, yéetel le chi' túuno' cu cáanta'al Jesucristo u ti'al ca yanac tocsajil ti' máac.

¹¹Le Quili'ich Dzíibo' cu ya'alic: Tuláacal le máax cu yocsic u yóol ti'e' mix bikin bíin pa'ajac u subtal.

¹²Mina'an u jela'anil le judíob yéetel le ma' judíobo', tumen Yuumtzile' u Yuumtzil tuláacal, utz xan u pucsi'ikal yéetel le máaxo'ob ch'a'a chi'itic u kaaba'o'.

¹³Tumen bey u ya'alic: Tuláacal le máax ch'a'a chi'itic u kaaba' Yuumtzile' bíin to'ococ.

¹⁴Ba'ale' ¿bix cun u ch'a'a chi'ito'ob u kaaba' wa ma' yocsaj óolto'obi'? ¿Bix cun u yocsaj óolto'ob wa ma' u yu'ubo'ob u yúuchul t'aan tu yo'olali'? ¿Bix cun u yu'ubilo'ob wa mina'an mix máac u ti'al tze'ectic ti'ob le ma'alob péectzilo'?

¹⁵¿Bix cu bin u tze'ectico'ob le ma'alob péectzilo' wa mina'an mix máac túuxtico'ob? Je'el bix cu ya'alic le Quili'ich Dzíibo': ¡Buca'aj jadzutzil u yooco'ob le máaxo'ob taasico'ob u péectzilil jedzel óolal, yéetel cu tze'ectico'ob le ma'alob péectzilo'!

¹⁶Ba'ale' ma' tuláacal táan óoltic u ma'alob péectzilil le tocsajilaa'. Bey je'el bix cu ya'alic Isaíase': Yuumtzil, ¿máax dzo'oc u yocsaj óoltic le ma'alob péectzil c tze'ectica'?

¹⁷Bey túuno' le ocsaj óolalo' cu taal tu yo'olal le u'uyajo', le ba'ax cu yu'uba'alo' u ma'alob péectzil Cristo.

¹⁸Ba'ale' quin wa'alic: ¿Ma' tu yu'ubajo'ob wa le ma'alob péectzilo'? ¡Tu jaajile' tu yu'ubajo'ob! Le Quili'ich Dzíibo' cu ya'alic: Le ba'ax cu ya'alico'obo' dzo'oc u yu'uba'al ti' tuláacal lu'um, yéetel u t'aano'obe' dzo'oc u kuchul tac tu dzooc cúuchilo'ob yóokolcaab.

¹⁹Ba'ale' quin ca'a a'alic: ¿Je'el wa u yúuchul ma' u na'ato'ob le israelitaob lela'? Yáax táanile' Moisese' cu ya'alic: Tene' bíin in beet a nich'bale'ex tu yo'olal jun p'éel caaj ma' caaji'; bíin in beet a kuuxile'ex tu yo'olal jun p'éel caaj ma' u káat na'ataji'.

²⁰Cu dzo'ocole' Isaíase' chúucpaj u yóol u ya'ale': Le máaxo'ob ma' tu caxtiqueno'obo' tu nuptáantajeno'ob; yéetel tin chíicbesinbáa ti' le máaxo'ob ma' u káato'ob in péectzili'.

²¹Le ca j t'aanaj tu yo'olal le j israelitaobo', Isaíase' tu ya'alaj: Bul kiin tin je'aj in kab ti' jun p'éel caaj x ma' u'uyaj t'aan yéetel chich u pucsi'ikal.