Read Yucateco Romanos 11 Bible Online

Romanos 11 - Yucateco bible

Romanos 11

¹Bejela'e' túuna' quin wa'alic: ¿Dzo'oc wa ta t'aan u cúulpachcuuntic Ku u caajal? ¡Ma' bey ucha'anili'! Tumen tene' israelitaen, ti' u ch'i'ibal Abraham, ti' u chi'ibalil Benjamín.

²Kue' ma' u cúul pachcuntmaj le israelitaob máaxo'ob tu yéeyaj tu yáax chuuno'. ¿Ma' a wojele'ex ba'ax cu ya'alic le Quili'ich Dzíib ti' u cuxtal aj bóobat Elías, bix leti' ichil u payalchi' ti' Kue' tu tacaj u pool le israelitaobo'? Tu ya'alaj Beya':

³Yuumtzil dzo'oc u quiimsico'ob a aj bóobato'ob yéetel dzo'oc u jenico'ob u cúuchilo'ob tu'ux ca kulta'al, chéen teen p'aatlen, yéetel u káat u quiimseno'ob xan.

⁴Ba'ale' Kue' tu núucaj ti': Dzo'oc in jun páaycuntic in ti'al teen siete mil máaco'ob ma' xolaco'ob tu táan beetbil ku Baal.

⁵Bey xan bejela'e', p'aatal dze'edzec ti'ob, máaxo'ob yéeyano'ob tumen Ku tu yo'olal u yutzil.

⁶Wa tu yo'olal u yutzil Kue' ma' túun tu yo'olal ba'ax cu beetic máac tu juunal yóoli'; tumen wa beyo', u siibal Kue' ma' túun siibal utzili'.

⁷¿Ba'ax túun? Le israelitaobo' ma' yanchaj ti'ob ba'ax cu caxtico'obi', ba'ale' le máaxo'ob yéeya'ano'ob tumen Kue'; yanji ti'ob. Le u láako'obo' chichcunta'ab u pucsi'ikalo'ob

⁸je'el bix cu ya'alic le Quili'ich Dzíibo': Beeta'abo'ob tumen Ku síisa'an u pixano'ob; dzaab ich ti'ob ma' tu paacato'ob yéetel xiquin ma' tu yu'ubajo'ob, beyo'ob tac bejela'e'.

⁹Bey xan cu ya'alic David: U noj Janalo'obe' ca suunac léechilo'ob yéetel núup'tajilo'ob, u ti'al ca lúubuco'ob yéetel ca ja'adzaco'ob.

¹⁰Ca ch'óopchajac u yicho'ob u ti'al ma' u paacato'ob, yéetel ca wúudzuc u pu'ucho'ob u ti'al kiino'ob mina'an u xuul.

¹¹Bejela'e' quin wa'alic: ¿Lúubo'ob wa jun puli' le judíob ca j t'óochpajo'obo'? ¡Tu jaajile' ma'! Tumen le ca tu beetaj u x ma' u'uyaj t'aan le judíobo', páatji u yantal tocsajil ti' le ma' judíobo', u ti'al ca yanac u yóol le israelitaobo' u yóolil u quetico'ob.

¹²Bey túuno', wa u si'ipil le judíob suunaj u ti'al u yutzil yóokolcaabe', wa le ba'ax jóok kaasil ti'ob jóok u ti'al u yutzil le ma' judíobo', ¡buca'aj utzil cun yantal le quéen líiksa'ac tu ca'a téen tuláacal le judíobo'!

¹³Ba'ale' yaan ba'al in wa'al ti' te'ex ma' judíoexi'. Tumen Ku u túuxmajen ti' le máaxo'ob ma' judíobo', quin jach táanilcuntic in meyaj.

¹⁴In káat beyo' dze'edzec ti' in wéet caajalo'obe' ca u dzíibolto'ob u quete'exo'ob, u ti'al ca to'ococo'ob beyo'.

¹⁵Tumen wa tu yo'olal cúulpachcunta'ab le judíob, páatji u yóokolcaab u bisicubáa tu ca'a téen yéetel Ku, ¿ba'ax ma' je'el u yúuchul le quéen ka'amaco'obe'? Mix ba'al u láak wa ma' cuxtal u ti'al le máaxo'ob quimeno'obo'.

¹⁶Tumen wa jun páaycunta'an u ti'al Ku le yáax waaj beeta'an yéetel le sacano', bey xan jun páaycunta'an tuláacal le sacano'. Wa u mootz jun cúul che' jun páaycunta'an u ti'al Kue', jun páaycunta'ab xan u kabo'ob.

¹⁷Dze'edzec ti' le judíob je'el bix u jach kabo'ob le olivoo', j ch'a'aco'ob u ti'al ca t'a'abaquech teech máaxech bey u kab le olivo'. Bey kuchiquech táccpajal ti' u mootz yéetel ti' u cuxtal le olivo'.

¹⁸Ba'ale' ma' a tucultic mas ma'alobech ti' le máaxo'ob jach u kabo'ob le olivoo'. Wa ca tuculticabáa mas ma'alobeche', ka'ajac teche' ma' teech tzéentic le mootzo', ba'ale' le mootz tziquiquecho'.

¹⁹Je'el wa a wa'alique': Bey, ba'ale' le kabo'ob ch'a'aco'obe' u ti'al ca ta'abaquen ti' le olivoo'.

²⁰Ma'alob; ba'ale' ch'a'aco'obe' tumen mina'an u yocsaj óolo'ob, yéetel teche' yaan a cúuchile' chéen tumen yaan teech ocsaj óolal. Bey túuno' ma' u ca'analtal a wich ba'ale' canantabáa.

²¹Tumen wa Ku ma' tu sa'atsaj le máaxo'ob jach u kabo'ob le olivoo'; máax teech bíin u sa'astsech

²²Il a wil, túun, buca'aj utzil Ku, ba'ale' jach toj xan. Jach toj yéetel máaxo'ob luubulo'obo', ba'ale' utz ta wéetel. Ba'ale' yaan a p'áatal ti' u yutzil, tumen wa ma'e' tac teech yaan a ch'a'acal.

²³U láak ba'ale', wa le judíob cu ca'a ocsaj óolo'obo', yaan u ta'ablo'ob tu ca'a téen; tumen Kue' yaan páajtalil ti' u ti'al u ca'a tabico'ob.

²⁴Tumen wa teech ma' judioech, luksa'abech ti' jun cúul káaxil olivo, u ti'al ca ta'abaquech ti' le ma'alob olivo quex táanxelil a taalo', ¡buca'aj mas le judíobo', máaxo'ob jach u kabo'ob le ma'alob olivo', bíin ta'abaco'ob tu ca'a téen ti' le olivo' tu'ux u taalo'obo'!

²⁵Sucu'une'ex, in káat ca a wojéelte'ex le ta'acbil ba'ala', u ti'al ma' a tucultique'ex jach yaan a na'ate'ex: Le israelitaobo' tu chichcuntajo'ob jun p'íit u pucsi'ikalo'obe', ba'ale' lela' chéen tac quéen chíicpajac le máaxo'ob yéeyano'ob ichil le ma' israelitaobo'.

²⁶Le quéen úuchuc beyo', tuláacal Israel cun to'ocol túun, tumen le Quili'ich Dzíibo' cu ya'alic: Le j tocsajo' ti' Sión bíin jóokoc, yéetel bíin u lukes u kasa'anil Jacob.

²⁷Lela' leti' in nup t'aan tu yéetelo'ob, quéen in lukes u kebano'ob.

²⁸Tu yo'olal u ma'alob péectzilil le tocsajilo', le judíobo' ch'a'ano'ob bey u aj p'eeco'ob Kue' u ti'al u dza'abal tu'ux a wantale'ex te'ex; ba'ale' láili' yaabilta'ano'ob tumen Kue' tumen tu yéeyaj u úuchben taataob.

²⁹Tumen le ba'ax cu dzáic Kue' ma' tu luksic, mix cu mixba'alcuntic úuchic u t'anico'on.

³⁰Te'ex ca'ache' ma' ta wu'uyaje'ex u t'aan Kui' ba'ale' bejela'e' tu yo'olal u x ma' u'uyaj t'aanil le judíobo' Kue' dzo'oc u ch'a'aic óotzilil ti' te'ex.

³¹Bey xan bejela'e' leti'obe' ma' tu yu'ubajo'ob u t'aan Kui', ba'ale' chéen u ti'al ca ch'a'abac óotzilil ti'ob tumen Ku je'el bix tu ch'a'ajil óotzilil ti' te'exo'.

³²Tumem Kue' queet tu dzajilac tuláacal máac yáanal x ma' u'uyaj t'aanil, u ti'al ca u ch'a'a óotzilil ti' tuláacal.

³³¡Buca'aj taamil u ayikalil Ku, yéetel u kaj óolalil bey xan u na'at! Ma' tu páajtal c tzolic ba'ax cu tucultic u beetic, mix cu páajtal c ch'a'a nu'uctic u beelo'ob.

³⁴Tumen ¿máax dzo'oc u ch'a'a nu'uctic u tuucul Yuumtzil? ¿Wa máax tzol u xiquin?

³⁵¿Máax tu dzaj táanil wa ba'ax ti' Yuumtzil u ti'al cu dzo'ocole' ca u kam u bo'olil?

³⁶Tumen ti' Ku u taal tuláacal ba'al, beeta'ab xan tumen leti' yéetel u ti'al leti'. ¡Nojbe'enil ti' Ku u ti'al kiino'ob mina'an u xuul! Amén.