Read Yucateco Romanos 12 Bible Online

Romanos 12 - Yucateco bible

Romanos 12

¹Bey túuno' sucu'une'ex, quin káat óoltic te'ex tu yo'olal u ch'a'a óotzilil Kue', ca a kub a wíinclile'ex bey jun p'éel cuxa'an siibal, jun páaycuna'an yéetel kambe'en tu táan Ku. Lela' leti' u jaajil kultajil unaj a dzáique'exo'.

²Ma' a cuxtale'ex je'el bix u ya'alic le yóokolcaaba'; ba'ale' kexe'ex a tuucule'ex u ti'al ca túumbenchajac a cuxtale'ex. Beyo' je'el a wojéeltique'ex máacalmáac u yóolal Kue', u káat u ya'ale' le ba'ax ma'alobo', ba'ax utz tu t'aano' yéetel ba'ax jach tu beel.

³Tu yo'olal le siibal utzil dza'an teen tumen Kuo', quin wa'alic ti' tuláacale'exe', mix jun túul ca u tucult tu yo'olale' maanal ti' le unaj u tucultico'. Tu jujun túule' unaj u tuucul yéetel cabal óolal, je'el bix u p'i'isil le ocsaj óolal dza'an ti' tumen Kuo'.

⁴Tumen je'el bix ti' jun p'éelili' wíinclil yaan to'on ya'ab xéexet'ale', ba'ale' ma' ti' jun p'éelili' ba'al cu meyaj le xéexet'alo'obo',

⁵bey xan to'on quex ya'abo'one', chéen jun p'éelili' wíinclil nupa'ano'on ti' Cristo, bey xan nupa'ano'on t baatzile' je'el bix u xéexet'al jun p'éelili' wíinclile'.

⁶Kue' u dzaamaj to'on jejeláas páajtalilo'ob, je'el bix tu yóoltaj u dzáa ti' cada jun túule'. Unaj c beetic u meyaj ma'alob le páajtalilo'obo'. Wa Ku u dzaamaj to'on u páajtalil c tze'eque', unaj c beetic je'el bix le ocsaj óolal yaan ti' to'ono';

⁷wa u dzaamaj to'on u páajtalil c meyajtic u láako'obe', unaj c meyajtico'ob ma'alob. Le máax u yojel ca'ansaje' unaj u meyaj ti' ca'ansaj;

⁸le máax u yojel u líikes u yóol u láako'obe', unaj u beetic lelo'. Le máax cu dzáic wa ba'axe', ma' unaj u pa'atic u su'utul u jeel ti'. Le máax cu nu'uctic bix unaj u beeta'al wa ba'axe', unaj u canantic bix unaj u nu'uctaj. Le máax cu ch'a'a óotzilile' unaj u beetic yéetel qui'imac óolal.

⁹Yanac te'ex yaacunaj x ma' ca'a p'éel ichil ta baatzile'ex. P'ecte'ex le kaaso', beete'ex le utzo'.

¹⁰Unaj a yaabilticaba'ex ta baatzile'ex yéetel u yaacunajil sucu'untzilo'ob, ca a táanilcunte'ex u láako'ob yéetel ca a te'escuntaba'ex ta baatzile'ex.

¹¹Mukulmuknene'ex, ma' a ma' óolta'ale'ex, meyajte'ex Yuumtzil yéetel tuláacal a pucsi'ikale'ex.

¹²Cuxlene'ex yéetel qui'imac óolal tu yo'olal le alab óolal yaan te'exo'; yanac te'ex chuca'an óolal quéen mukyajnaque'ex. Payalchi'inene'ex mantadz.

¹³Áante'ex le ocsaj óolo'obo' yéetel ba'ax kabéet ti'obo'; Kame'ex ma'alob le máaxo'ob cu xíimbaltique'exo'obo'.

¹⁴Qui'iqui' t'aante'ex le máaxo'ob ch'a'apachtique'exo'obo'. Qui'iqui' t'aante'ex, ma' a loolob t'aane'ex.

¹⁵Qui'imacchajac a wóole'ex yéetel le máaxo'ob qui'imac u yóolo'obo', yéetel okolnene'ex yéetel máaxo'ob cu yokolo'obo'.

¹⁶Bisajba'ex ma'alob ta baatzile'ex. Ma' u ca'analtal a wiche'ex, ba'ale' quetaba'ex yéetel le máaxo'ob cabal u yóolo'obo'. Ma' a tucultique'ex jach canbalnaja'ane'ex.

¹⁷Ma' a bo'otique'ex kaas yéetel kaas ti' mix máac. Il a wile'ex a beetique'ex ba'al utz tu táan tuláacal máac.

¹⁸Je'el bix cu pa'ata'al ti' te'exo', beetex tac tu'ux cu páajtal a cuxtale'ex ich jéedzel yéetel tuláacal máac.

¹⁹In yaabilaj sucu'une'ex, ma' a sutique'ex le loob cu beeta'al te'exo', ba'ale' p'ate'ex u bo'olil tu kab Ku; tumen le Quili'ich Dzíibo' cu ya'alic: Teen unaj in jaadz, teen quin bo'ol, cu ya'alic Yuumtzil.

²⁰Cu ya'alic xane': Wa a aj p'eec wi'ije' dzáa ba'al u jaante, wa ukaje', dzáa ja' u yuke'; tumen le quéen a beet beyo', ca beetic u sublactal u yich.

²¹Ma' a cha'ic u dzáancha'atiquech le kaaso'. Ba'ale' dzáancha'at le kaas yéetel le utzo'.