Read Yucateco Romanos 14 Bible Online

Romanos 14 - Yucateco bible

Romanos 14

¹Wa yaan máax luba'an u muuk u yocsaj óolale', kame'ex x ma' ba'atel t'aanil tu yóokol le ba'alo'ob ma' jach sáasil oje'elanilo'obo'.

²Je'el bix lela' yaan máax cu tucultique' cu páajtal u jaantic tuláacal ba'al, yaan u láake', máax luba'an u muuk tu yo'olal u yocsaj óolale', cu jaantic chéen janalbe'en xíiwo'ob.

³Le máax cu jaantic je'el ba'alaque', ma' u p'ectic le máax cu tucultic yaan ba'axo'ob ma' unaj u jaanta'alo'obi'. Bey xan le máax cu tucultic yaan ba'ax ma' unaj u jaanta'alo' ma' u p'is óoltic le máax cu jaantic je'el ba'alaque', tumen Kue' dzo'oc u kamic le máaco'.

⁴¿Máaxech teech u ti'al a p'is óolt le máax táan u meyajtic yaanal máaco'? Tumen wa utz wa kaas u p'áatale', lelo' u dzuulil máax unaj u ya'alic. Yéetel utz cun p'áatal, tumen Yuumtzile' yaan páajtalil ti' u ti'al u beetic u p'áatal utzil.

⁵U láak ba'al je'el bix lela': Yaan máax cu táanilcunsic jun p'éel kiin ti' u láak, yaan máax xane' cu tucultique' queet tuláacal le kiino'obo'. Cada jun túule' unaj u jéedzel ma'alob ti' ba'ax cu tucultic.

⁶Le máax cu táanilcuntic jun p'éel kiine' cu beetic u ti'al u tziquic Yuumtzil; le máax ma' tu táanilcuntic jun p'éel kiine' cu beetic u ti'al u tziquic Yuumtzil xan. Bey xan le máax cu jaantic je'el ba'alaque', cu beetic xan u ti'al u tziquic Yuumtzil tumen cu dzáic nib óolal ti' Ku. Le máax ma' tu jaantic je'el ba'alaque', ma' tu jaantique' u ti'al u tziquic Yuumtzil yéetel cu dzáic nib óolal ti' Ku xan.

⁷Tumen mix jun túul ti' to'on cuxa'an chéen u ti'al tu juunal, mix cu quíimil u ti'al tu juunal.

⁸Tumen wa cuxa'ano'one', cuxa'ano'on u ti'al Yuumtzil, wa c quíimile', c quíimil u ti'al Yuumtzil. Bey túuno', wa cuxa'ano'one' wa quimeno'one' u ti'alo'on Yuumtzil.

⁹Tumen Cristoe' j quíimi, yéetel ca'a púut cuxlaj u ti'al ca u beetubáa u Yuumtzil le quimeno'ob yéetel le cuxa'ano'obo'.

¹⁰¿Ba'ale' teche', ba'axten ca p'is óoltic a sucu'un? ¿wa ba'axten ca p'ectic? Tumen tuláacalo'on yaan c antal tu táan Cristo u ti'al ca p'is óolta'aco'on tumen leti'.

¹¹Tumen le Quili'ich Dzíibo' cu ya'alic: Jach tu jaajil je'el bix cuxa'anecho', cu ya'alic Yuumtzil, tuláacal bíin xolac tin táan, yéetel tuláacal bíin u nojbe'encunt Ku tu táan máaco'ob.

¹²Bey túuno' cada jun túul ti' to'one' yaan u tzolic ti' Ku ba'ax u beetmaj.

¹³Le o'olale', ma' unaj c p'is óolticbáa t baatzili'. Ba'ax unaj a beetique'exe' a dzáic a wóole'ex u ti'al ma' a beetique'ex tu'ux cu páajtal u t'óochpajal a sucu'une'ex, wa ca u beet u lúubul ti' keban.

¹⁴Tene' in wojel mina'an mix ba'al cu kastal wa ma' yaan ba'ax kascuntic; lela' jach in wojel je'el bix jun túul u yocsaj óolal Yuumtzil Jesuse'; ba'ale' wa yaan máax cu tucultic ka'asa'an wa ba'axe', u ti'al leti'e' kasa'an.

¹⁵Wa tu yo'olal wa ba'ax ca jaantic cu yaatal u yóol a sucu'une', bey túuno' ma' táan a beetic yéetel yaacunaj. Ma' a beetic u sa'atal mix jun túul tu yo'olal máax quíim Cristo, chéen tumen teche' a káat a jaant wa ba'ax.

¹⁶Ma' a dzáique'ex tu'ux u t'aan kaas mix máac tu yo'olal le ba'ax ca tucultique'ex utzo'.

¹⁷Tumen u aja'awil Kue' mix ba'al yaan u yil yéetel janal wa ukul, ba'ale' yaan ba'al u yil yéetel jun p'éel toj cuxtal, jéedzel óolal yéetel qui'imac óolal, ba'alo'ob yaan to'on tu yo'olal le Quili'ich Pixano'.

¹⁸Le máax cu meyajtic Cristo beya', cu lúubul utzil tu táan Ku, yéetel cu ka'amal ma'alob tumen máaco'ob.

¹⁹Bey túuno', cox caxantic le ba'alo'ob cu taasic jéedzel óolalo', le ba'alo'ob cu páajtal u yáantico'ono' u ti'al u ch'íijil c pixan.

²⁰Ma' a kascuntic u meyaj Ku tu yo'olal ba'ax ca jaantic. Tu jaajile' tuláacal le janalo'obo' ma'alobtac, u kaasile' u jaanta'al wa ba'ax ca u beet u lúubul ti' keban máaco'ob.

²¹Ma'alob ma' a jaantic bak, mix a wukic vino, mix a beetic mix ba'al ca u beet u t'óochpajal a sucu'un, wa ca u beet u lúubul ti' keban, wa ca u beet u mina'antal u muuk u yocsaj óolal.

²²Le ocsaj óolal yaan ti' techo', unaj u yantal teech tu táan Ku. ¡Qui' u yóol le máax ma' tu ta'acal u pool tu yo'olal ba'ax cu beetic tumen cu tucultic ma'alobo'!

²³Ba'ale' le máax cu jaantic wa ba'ax yéetel le quéen u jaante' yaan u si'ipil, tumen ma' tu jaanta yéetel ocsaj óolali'; tuláacal ba'ax ma' tu beetaj yéetel ocsaj óolale' keban.