Read Yucateco Romanos 16 Bible Online

Romanos 16 - Yucateco bible

Romanos 16

¹Quin kubentic te'ex c quiic Febe, máax diaconisa tu iglesiail Cencrea.

²Kame'ex ma'alob tu kaaba' Yuumtzil, je'el bix unaj u ka'amal le ocsaj óolo'obo', yéetel áante'ex ti' je'el ba'alac ca kabéetchajac ti'e', tumen leti'e' ya'ab máaxo'ob u yáantmaj, tac teen u yáantmajen.

³Te'escunte'ex Priscila yéetel Aquila, máaxo'ob in wéet meyajo'ob ti' u meeyjul Cristo Jesús.

⁴Leti'obe' tu dzaj u cuxtalo'ob tu táan káak tin wo'olal; bey túuno' quin dzáic u nib óolalil ti'ob, ma' chéen teni', ba'ale' tuláacal u iglesiailo'ob le ma' judíobo'.

⁵Te'escunte'ex xan le sucu'uno'ob cu much'talo'ob tu yotoch Priscila yéetel Aquilao'. Te'escunte'ex in amigo Epeneto, máax jach in yaabiltmaj, leti' máax tu yáax ocsaj óoltaj Cristo tu lu'umil Acaya.

⁶Te'escunte'ex María máax ya'ab meyaj dzo'oc u beetic ichile'ex.

⁷Te'escunte'ex in wéet caajalo'ob Andrónico yéetel Junias, máaxo'ob j ka'alo'ob tin wéetel; leti'obe' nuuctaco'ob ichil le apóstolo'obo', yéetel tu yocsaj óolto'ob Cristo táanil ti' teen.

⁸Te'escunte'ex in amigo Amplias, máax in yaabiltmaj ti' Yuumtzil.

⁹Te'escunte'ex Urbano, máax c éet meyaj ti' Cristo Jesús, bey xan Estaquis máax in yaabiltmaj.

¹⁰Te'escunte'ex Apeles, máax dzo'oc u beetic ya'abcach ba'alo'ob u ti'al u ye'esic u yocsaj óolal ti' Cristo, bey xan le máaxo'ob u láako'ob Aristóbuloo'.

¹¹Te'escunte'ex in wéet caajal Herodión, bey xan le máaxo'ob u láako'ob Narcisoo', máaxo'ob cu yocsaj óoltico'ob Yuumtzil.

¹²Te'escunte'ex Trifena yéetel Trifosa, máaxo'ob táan u meyajo'ob ti' u meeyjul Yuumtzil, bey xan c quiic Pérsida máax c jach yaabiltmaj, máax ya'ab meyaj u beetmaj ti' u meeyjul Yuumtzil.

¹³Te'escunte'ex Rufo, máax nojoch ichil u yocsaj óolo'ob Yuumtzil, bey xan u maama, máax bey jun túul maamatzil in ti'alte'.

¹⁴Te'escunte'ex Asíncrito, Flegonte, Hermas, Patrobas, Hermes, bey xan le sucu'uno'ob yaan tu yéetelo'obo'.

¹⁵Te'escunte'ex xan Filólogo yéetel Julia Nereo yéetel u quiic, bey xan Olimpas yéetel tuláacal le sucu'uno'ob ti' le ocsaj óolal yano'ob tu yéetelo'obo'.

¹⁶Te'escuntaba'ex ta baatzile'ex yéetel jun p'éel quili'ich dzu'udz. Tuláacal u iglesiaob Cristo cu túuxtic te'ex te'escunajo'ob.

¹⁷Sucu'une'ex quin káat óoltic te'ex ca a wile'ex le máaxo'ob cu beetico'ob jatzlantáambailo'obo' yéetel cu dzáico'ob tu'ux u t'óochpajal máaco', tumen lela' ti' yaan tu contra le ca'ansajo'ob ta canaje'exo'. Tzelaba'ex ti'ob,

¹⁸tumen le máaco'obo' ma' táan u meyajtico'ob c Yuumtzil Jesucristoi', ba'ale' táan u meyajtico'ob u dzíibolalo'ob, yéetel muumun ch'ujuc t'aano'obe' cu tusic u pucsi'ikal le máaxo'ob cabal u yóolo'obo'.

¹⁹Tuláacal u yojelo'ob bix ta wu'uyile'ex t'aan; le o'olale' cu qui'imactal in wóol, yéetel in káate' ca a dzáa a wóole'ex u ti'al a beetique'ex le utzo', ma' u ti'al a beetique'ex le kaaso'.

²⁰U Kuil jéedzele' séeba'an bíin u dzáancha'at Satanás yáanal a wooque'ex. U siibal c utzil c Yuumtzil Jesucristoe' ca yanac ti' te'ex.

²¹Cu túuxtic te'ex te'escunajo'ob Timoteo, máax in wéet meyaj, bey xan Lucio, Jasón yéetel Sosipater in wéet caajalo'ob.

²²Teen, Tercio, máax táan in dzíibtic le ju'una', bey xan quin túuxtic te'ex te'escunajo'ob tu kaaba' Yuumtzil.

²³Cu te'escuntique'ex Gayo. Ti' kucha'anen tu yotoche', ti' xan cu much'tal tuláacal le iglesiao'. Bey xan cu te'escuntique'ex Erasto, máax canantic u ayikalil le caaja', bey xan sucu'un Cuarto.

²⁴U siibal C Yuumtzil Jesucristo ca yanac ti' tuláacale'ex. Amén.

²⁵Bejela'e', co'ox qui'iqui' t'antic Ku, le máax cu páajtal u beetic u yantal a muuke'ex, je'el bix cu ya'alic le ma'alob péectzil tocsajil quin tze'ectica' yéetel u ca'asajilo'ob Jesucristo. Lela' queet yanil yéetel le ba'axo'ob dzo'oc u dzáic Ku u ti'al ojéeltbilo' ba'ax u ta'acmaj ca'ach ma'ilil cáajac u yóokolcaabe',

²⁶ba'ale' bejela'e' dzo'oc u dza'abal u ti'al ojéeltbil tu yo'olal le Quili'ich Dzíibo'ob tu p'atal le aj bóobato'obo', je'el bix tu ya'aljilac Ku mina'an u xuulo'. Le u ta'acbil tuucul Kua' dzo'oc u dza'abal ojéeltbil bejela'e' ti' tuláacal le caajo'obo' u ti'al ca ocsaj óolnaco'ob yéetel ca u yu'ubo'ob u t'aan.

²⁷¡Ti' Ku, máax chéen leti' yaan u na'at, yanac nojbe'enil tu yo'olal Jesucristo mantadz! Amén.