Read Yucateco Romanos 2 Bible Online

Romanos 2 - Yucateco bible

Romanos 2

¹Le o'olal mina'an tu'ux a tzelicabáa ti' a si'ipil, teech ca p'is óoltic u yaanal, je'el máaxeche'. Tumen le quéen a p'is óolt u láake', táan a xot kinticabáa ta juunal, tumen táan a beetic xan le ba'alo'ob ca p'is óoltico'.

²C ojele' Kue' cu p'is óol yéetel jaaj le quéen u xot kint le máaxo'ob cu beetico'ob le ba'alo'oba'.

³Teech, máax ca p'is óoltic u láak máaco'ob cu dzo'ocole' ca beetic le ba'alo'oba', ¿Ca tucultic wa yaan a jechic u xot kiinil Ku?

⁴¿Ca p'ectic wa u ayikalil u yutzil Ku, yéetel u chowac óolal? ¿Ma' wa táan a wilique' u yutzile' táan u bisiquech u ti'al a kexic a tuucul?

⁵Ba'ale' teche' chich a pucsi'ikal, le o'olal ma' a káat a kex a tuuculi'. Le o'olal táan a nijcuntic jaadz ta wóokol u ti'al u kiinil jaadz le quéen u chíicbesubáa Ku u ti'al u p'is óol yéetel jaaj,

⁶le quéen u bo'ot tu jujun túulil je'el bix cu najmatic u meyajo'obo'.

⁷Bíin u dzáa cuxtal mina'an u xuul ti' le máaxo'ob cu caxtico'ob nojbe'enil, tziiquil yéetel x ma' kastalil iquil u beetico'ob mantadz le utzo';

⁸ba'ale' yaan u yaayaj jadzic le máaxo'ob chich u pucsi'ikalo'obo' yéetel ma' u káato'ob u yu'ubo'ob u t'aan le jaajo', ba'ale' chéen cu yu'ubico'ob u t'aan le kaaso'.

⁹Yaan u yantal yaayaj óolal yéetel mukyajil u ti'al tuláacal le máaxo'ob cu beetico'ob le kaaso', yáax táanile' le judíobo', bey xan le máaxo'ob ma' judíobo'.

¹⁰Ba'ale' Kue' yaan u dzáic nojbe'enil, tziiquil yéetel jedzel óolal ti' tuláacal le máaxo'ob cu beetico'ob le utzo', yáax táanile' le judíobo', bey xan le ma' judíobo'.

¹¹Tumen tu táan Kue' mina'an u jela'anil máaco'ob.

¹²Tumen tuláacal máaxo'ob cu kebantalo'ob tumen mina'an u t'aan Moisés ti'obe', yaan u xu'ulsa'alo'ob quex mina'an le a'almaj t'aan ti'obo'. Le máaxo'ob cu kebantalo'ob quex yaan u ya'almaj t'aan Moisés ti'obe', yaan u p'is óoltalo'ob yéetel le a'almaj t'aano'.

¹³Tumen ma' ma'alob yanilo'ob tu táan Ku le máaxo'ob chéen cu yu'ubico'ob le a'almaj t'aano', ba'ale' máaxo'ob dzo'ocbesico'.

¹⁴Ba'ale' le máaxo'ob ma' judíob mina'an le a'almaj t'aan ti'obo', le quéen u beeto'ob tu juunaj u yóolo'ob le ba'ax cu ya'alic le a'almaj t'aano', leti'obe' a'almaj t'aan u ti'alo'ob,

¹⁵tumen yéetel u cuxtalo'obe' táan u ye'esico'ob dzíiba'an le a'almaj t'aan tu pucsi'ikalo'obo'. U tuuculo'ob e'esic lela', yéetel yaan u ta'acal u poolo'ob wa yaan u to'ocolo'ob tumen ba'ax cu tucultico'ob,

¹⁶le kiin quéen p'is óolta'ac tumen Ku u ta'acbil ba'alo'ob tuláacal máac tu yo'olal Jesucristoe', je'el bix cu ya'alic le ma'alob péectzil le tocsajil quin tze'ectica'.

¹⁷Ba'ale' teche' ca wa'alique' Judíoech, yéetel ca ch'a'ic a muuk ti' u ya'almaj t'aan Moisés, bey xan ca'anal a wich ti' Ku.

¹⁸A wojel ba'ax u káat Ku, bey xan le a'almaj t'aano' cu ca'ansic teech a yéey u ma'alobil.

¹⁹Ca wu'uyicabáa jach ma'alobech u ti'al a bis le máaxo'ob ch'óopo'obo', bey xan u ti'al a sáasilcunt le máaxo'ob yano'ob ich éekjoch'e'enilo'.

²⁰Ca tucultic a wojel a ca'ans le máaxo'ob mix ba'al u yojelo'obo' yéetel a tzol u xiquin le máaxo'ob táant u yocsaj óolo'obo', tumen ti' le a'almaj t'aano' yaan teech u nuuctaquil le kaj óolalilo' yéetel le jaajilo'.

²¹Teech ca ca'ansic u láako'obe' ¿ma' ta ca'ansicabáa teech? Teech ca tze'ectic ma' unaj u yúuchul oocole'. ¿Ma' ta woocol teech?

²²Teech ca wa'alic ma' unaj u nupkebantal máaque' ¿ma' ta nupkebantal teech? Teech ca p'ectic le beetbil kuo'obo' ¿ma' ta wocoltic u ayikalil le u templo'ob?

²³Ca'anal a wich tu yo'olal le a'almaj t'aano', ba'ale' ma' ta tziquic Ku tumen ma' ta dzo'ocbesic le ba'ax cu ya'alic le a'almaj t'aano'.

²⁴Jaaj ba'ax cu ya'alic le Quili'ich Dzíiba': Le máaxo'ob ma' judíobo' cu t'aano'ob kaas tu contra Ku ta wo'olale'ex.

²⁵Jaaj le súutkuptajo' yaan u biilal a ti'alt wa dzo'ocbesic u ya'almaj t'aan Moisés; ba'ale' wa ma' ta dzo'ocbesique' cu yúuchul bey ma' súut kupta'ane'eche'.

²⁶Wa le ma' súutkupta'an cu beetic le ba'ax cu ya'alic le a'almaj t'aano', cu ka'amal bey súutkupta'ane', quex ma'.

²⁷Le máax ma' súutkupta'an tu wíinclile' ba'ale' cu dzo'ocbesic le a'almaj t'aano', yaan u p'is óoltiquech teech, tumen ma' ta dzo'ocbesic, quex yaan teech u dzíibil le a'almaj t'aano' yéetel súutkupta'anech.

²⁸Tumen ma' judío le máax judío yóokcabile' bey xan ma' súutkuptajil le cu beeta'al yóokcabil ti' le wíinclilo'.

²⁹Ba'ale' judío jach tu jaajile' le máax judío tu pucsi'ikale', yéetel le jaajil súutkuptajo' leti' le beeta'an tu pucsi'ikal máaco' lelo' ma' tu ch'a'ic u muuk ti' dzíibo'ob ba'ale' ti' le pixano'. Le máax beyo' cu qui'iqui' t'aanta'al ma' tumen máaco'obi', ba'ale' tumen Ku.