Read Yucateco Romanos 4 Bible Online

Romanos 4 - Yucateco bible

Romanos 4

¹Ba'ale' co'ox a'alic tuun: ¿ba'ax tu náajaltaj Abraham, c úuchben láak?

²Tu jaajile' wa ca dza'abac leti' ma'alob tu táan Ku tu yo'olal ba'ax tu beetaje', yaan ba'ax yo'olal u ca'analtal u yich, ba'ale' ma' tu táan Kui'.

³Tumen ¿ba'ax cu ya'alic le Quili'ich Dzíibo'? Abrahame' tu yocsaj óoltaj Ku, tu yo'olal u yocsaj óolale' j ka'am tumen Ku je'el bix máac toje'.

⁴Bey túuno', wa jun túul máac cu beetic jun p'éel meyaje', u bo'olale' ma' tu dza'abal ti' bey jun p'éel siibale' ba'ale' bey jun p'éel ba'al p'axa'an ti'e'.

⁵Ba'ale' wa yaan jun túul máac quex ma' tu beetic mix ba'al, ba'ale' cu yocsic u yóol ti' Yuum Ku máax cu kamic le j kebano'obo', cu ka'amal tumen Ku je'el bix jun túul máac toje' tu yo'olal u yocsaj óolal.

⁶Davide' j t'aanaj tu yo'olal u qui'imac óolal jun túul máac cu ka'amal tumen Ku je'el bix jun túul máac toje' quex ma' u yila'al ba'ax u meentmaj.

⁷Davide' tu ya'alaj: Qui'imac u yóolo'ob le máaxo'ob cu sa'atsa'al u loobilo'ob tumen Kuo', yéetel cu tu'ubsa'al u kebano'obo'.

⁸Qui'imac u yóol le máac ma' tu dza'abal u si'ipil u keban tu yóokol tumen Yuumtzil.

⁹¿Le qui'imac óola' chéen wa u ti'alo'ob le máaxo'ob súutkupta'ano'obo', wa u ti'al xan le máaxo'ob ma'o'? Dzo'oc c a'alique' Kue' tu kamaj Abraham je'el bix jun túul máac toje' tu yo'olal u yocsaj óolal.

¹⁰Ba'ale' ¿ba'ax kiin ca tu kamaj? ¿Cu dzo'ocol u súutkupta'al Abraham wa ma'ili'e'? Ma' cu dzo'ocoli', ba'ale' ma'ili'e'.

¹¹Cu dzo'ocole' Abrahame' tu kamaj le súutkuptajo' bey jun p'éel chíiculal wa jun p'éel ba'ax iquil u kaj óolta'al dzo'oc u ka'amal tumen Ku bey jun túul máac toje' tu yo'olal tu yocsaj óolal ma'ili' súut kupta'aque'. Tu yo'olal lela' Abrahame' j kuch u beetjubáa taata ti' tuláacal le máaxo'ob yaan ocsaj óolal ti'obo' quex ma' u kamajo'ob le súutkuptajo', bey túuno' cu ka'amalo'ob xan tumen Ku bey máaco'ob tojtaco'obe'.

¹²Tu jaajile' Abrahame' leti' u taata le máaxo'ob súutkupta'ano'obo', ba'ale' tu yóokol lelo' cu bino'ob tu bejil le ocsaj óolal yanji ti' c taata Abraham, ma'ili' súut kupta'aco'.

¹³Kue' tu ya'alaj ti' Abraham yéetel ti' u ch'i'ibale' yaan u ti'alintico'ob le yóokolcaaba'; ba'ale' le t'aana' dzaab ti'obe' ma' tumen tu dzo'ocbesaj Abraham le a'almaj t'aano' ba'ale' tumen tu yocsaj u yóol ti' Ku; Ku túune' tu kamaj je'el bix jun túul máac toje'.

¹⁴Tumen wa chéen le máaxo'ob cu dzo'ocbesico'ob le a'almaj t'aan cu kamico'ob le ayikalilo', bey túuno' chéen cunel le ocsaj óolalo', bey xan le t'aan tu dzaj Kuo', mix ba'al u biilal.

¹⁵Tumen le a'almaj t'aano' cu taasic jaadz; ba'ale' tu'ux mina'an a'almaj t'aane', bey xan mina'an táadz máansajo'ob ti' le a'almaj t'aano'.

¹⁶Le o'olale' u ti'al ca jéedzec le t'aan dzaab ti' Abraham u ti'al tuláacal u chi'ibale', yanchaj u béeytal bey jun p'éel siibal jedzecbal ti' le ocsaj óolalo'. U káat u ya'ale' le dzaabil t'aano', ma' chéen u ti'al le máaxo'ob cu dzo'ocbesico'ob le a'almaj t'aano', ba'ale' u ti'al xan tuláacal le máaco'ob cu yocsaj óolalo'obo' je'el bix ocsaj óolnajic Abrahame'. Leti' túune', cu kuchul u beetubáa taatatzilil ti' to'on tuláacalo'on

¹⁷tu táan Ku, máax ocsaj óolta'ab tumen leti'. Je'el bix cu ya'alic le Quili'ich Dzíibo': Dzo'oc in beetiquech u taatatzil ya'abcach máaco'ob. tumen Kue' cu dzáic cuxtal ti' le quimeno'obo', yéetel cu beetic u yantal le ba'alo'ob ma' yano'obo'.

¹⁸Quex mina'an alab óolale', Abrahame' ocsaj óolnaje' ca yanchaj alab óolal ti', bey túuno' j kuch u beetubáa taatatzil ti' ya'abcach máaco'ob, je'el bix a'ala'ab ti' tumen Kue': Bey cun kuchul u ya'abil a ch'i'ibalo'obo'.

¹⁹Abrahame' ma' j lúub u muuk u yocsaj óolali', quex míin ciento u ja'abilo'ob, yéetel táan u yilic leti' je'el bix Sarae' ta'itac u quíimilo'ob yéetel dzo'oc u jach nuxibtalo'ob u ti'al ca yanac u paalalo'ob.

²⁰Ma' tu ca'a p'éel óoltaj mix tu kex óoltaj u t'aan Kui', ba'ale' yanchaj ya'ab ocsaj óolal ti' yéetel alab óolal. Tu qui'iqui' t'aantaj Ku,

²¹tumen tu dzaj tu yóole' jach jaaj Junab Kue' yaan páajtalil ti' u ti'al u beetic tuláacal ba'ax cu ya'alic.

²²Tu yo'olal lela' j ka'am tumen Ku je'el bix jun túul máac toje' tu yo'olal u yocsaj óolal.

²³Le ka'amic tumen Ku je'el bix jun túul máac toj tu yo'olal u yocsaj óolale', ma' dzíibta'ab chéen tu yo'olal Abrahami';

²⁴dzíibta'ab xan t o'olal. Tumen tu yo'olal c ocsaj óolale' Kue' cu kamico'on tac to'on je'el bix toj máaco'obe' le máaxo'ob c ocsaj óoltic le máax tu ca'a púut cuxquintaj Jesús, c Yuumtzil, ti' le quimeno'obo',

²⁵máax ku'ub ti' quíimil tu yo'olal c kebano'ob yéetel ca'a púut cuxquinta'ab u ti'al ca dza'abaco'on ma'alob tu táan Yuum Ku.