Read Yucateco Romanos 5 Bible Online

Romanos 5 - Yucateco bible

Romanos 5

¹Bey túuno', cu dzo'ocol c dza'abal ma'alob tu táan Ku tu yo'olal ocsaj óolale', yaan to'on jéedzel yéetel Ku tu yo'olal c Yuumtzil Jesucristo.

²Tumen tu yo'olal Cristoe' dzo'oc c oocol ti' le siibal utzila' tu yo'olal le ocsaj óolalo'. Ti' le siibal utzila' jeedzel anilo'on yéetel cu qui'imacchajal c óol ti' u alab óolalil u nojbe'enil Junab Ku.

³Ma' chéen lela', ba'ale' bey xan cu qui'imacchajal c óol ti' le mukyajo'; tumen c ojele' le mukyajo' cu dzaíc to'on chuca'an óolal,

⁴yéetel le chuca'an óolalo' cu beetic c ka'amal ma'alob, yéetel le quéen ka'amaco'on ma'alobe' yaan to'on alab óolal.

⁵Le alab óolala' ma' tu p'atico'on kaasil, tumen Kue' dzo'oc u chupic c pucsi'ikal yéetel u yaacunaj tu yo'olal Quili'ich Pixan dzo'oc u dzáic ti' to'ono'.

⁶Tumen le ca'ach ma' tu páajtal c toquicbáa ti' le kebano', Cristoe' jach tu kiinile' j quíim tu y o'olal le j kasa'ano'obo'.

⁷Jach talam ca quíimic wa máax tu yo'olal u láak máac, mix tu yo'olal jun túul máac toj; ba'ale' tu yo'olal jun túul máac jach tu jaajil utze' míin je'el u yantal wa máax quíimil tu yo'olale'.

⁸Ba'ale' Kue' cu ye'esic to'on tu jaajil u yaabilbtmajo'on iquil quíimic Cristo t o'olal quex láili' kebano'on ca'ache'.

⁹Ba'ale' tumen dzo'oc c dza'abal ma'alob tu táan Ku tu yo'olal quíimic Cristoe', tu jaajile' yaan c to'ocol ti' le dzooc jaadzo' tu yo'olal leti'.

¹⁰tumen wa Ku tu dzajo'on ma'alob tu táan leti' tu yo'olal u quíimil u Paal quex enemigo'on ca'ach ti'e', jach u tojil ca c tuculte' je'el u toquico'on tu yo'olal u cuxtale', tumen yaan to'on jéedzel tu yéetel.

¹¹Ma' chéen lela', ba'ale' bey xan cu qui'imacchajal c óol ti' Ku tu yo'olal c Yuumtzil Jesucristo, tumen tu yo'olal Cristoe' dzo'oc u yantal to'on jéedzel yéetel Ku.

¹²Bey túuno' je'el bix tumen jun túulili' máac j ooc le keban ti' le yóokolcaaba' ca tu taasaj yéetele' le quíimilo', bey xan máanic xan le quíimilo' ti' tuláacal máaco'ob tumen tuláacal kebanchajo'ob.

¹³Ma'ili' yanac le a'almaj t'aano' yanili' keban way yóokolcaabe'; quex ma' tu yila'al le kebano' wa mina'an a'almaj t'aan.

¹⁴Quex beyo', le quíimilo' yanji páajtalil ti' tu yóokol le máaxo'ob kebanchajo'obo' cáajic tu kiinilo'ob Adán tac tu kiinilo'ob Moisés, quex ma' kebanchajo'ob tu yo'olal x ma' u'uyaj t'aanil je'el bix tu beetilc Adane': Adane' u yoochel le máax bíin taalaco'.

¹⁵Ba'ale' u si'ipil Adane' ma' tu páajtal u quetbesa'al yéetel le siibal cu dzáic to'on Kuo'. Tumen tu yo'olal u si'ipil jun túulili' máaque' ya'ab quíimo'obi', ba'ale' le siibal utzil cu síic to'on Ku tu yo'olal jun túulili' máac, Jesucritoe', mas táaj nojoch, bey xan u ti'al yutzil ya'abcach máaco'ob.

¹⁶U keban jun túulili' máaque' ma' tu páajtal u que'etel yéetel le siibal cu dzáic to'on Kuo', tumen le ba'ax úuch tu yo'olal le kebano', le xot kiino' j taale' tu yo'olal jun p'éelili' si'ipil, ba'ale' le ba'ax úuch tu yo'olal le siibalo', máaco'obe' quex ya'ab u si'ipilo'obe' cu dza'abalo'ob ma'alob tu táan Ku.

¹⁷Tumen wa le quíimil yanji páajtalil ti' tu yo'olal u si'ipil jun túulili' máaque', jach ma'alob ca c tuculte' le máaxo'ob cu dza'abalo'ob ma'alob tumen Ku tu táane', yaan u yantal páajtalil ti'ob ti' le túumben cuxtala', tu yo'olal jun túulili' máac, Jesucristo.

¹⁸Je'el bix u si'ipil Adan tu dzaj tuláacal máac yáanal xot kiino', bey xan le toj meyaj tu beetaj Jesucristo tu taasaj ti' tuláacal máaco'obe' jun p'éel cuxtal tzela'an ti' xot kinaj.

¹⁹U káat u ya'ale', tu yo'olal u ma' u'uyaj t'aanil jun túul máaque' ya'ab beeta'abo'ob j kebano'obi'; ba'ale' queet yéetel lela', tu yo'olal u yu'ubaj t'aanil jun túul máaque', ya'ab cun dzaabilti'ob t táan Kui'.

²⁰U jaajile' le a'almaj t'aano' j taale' u ti'al ca ya'abchajac le kebano'; ba'ale' le tu'ux ya'abchaj le kebano' asab ya'abchaj u siibal Ku.

²¹Bey túuno je'el bix yanji páajtalil ti' le keban u ti'al u taasic quíimilo', bey xan le ca j yanchajo'on ma'alob tu táan Kue', u siibal utzile' yanji páajtalil ti' u ti'al u dzaíc to'on cuxtal mina'an u xuul tu yo'olal c Yuumtzil Jesucristo.