Read Yucateco Romanos 6 Bible Online

Romanos 6 - Yucateco bible

Romanos 6

¹¿Ba'ax bin c a'al túun? ¿Bíin p'áataco'on wa ti' le kebano' u ti'al ca sen ya'abac u siibal utzil Ku?

²¡Tu jaajile' ma'! To'one' dzo'oc c quíimil u ti'al le kebano'; ¿bix túun je'el u páajtal c cuxtal láili' ti' le kebano'?

³¿Ma' a wojele'ex te'exe' le ca j nu'upo'on yéetel Cristo Jesús tu yo'olal le ocja'o, j nu'upo'on tu yéetel ti' u quíimil?

⁴Tumen tu yo'olal le ocja'o' j mu'uco'on yéetel Cristo, ca j quíimo'on, u ti'al ca ca'a púut cuxquinta'aco'on yéetel ca yanac to'on jun p'éel túumben cuxtal, je'el bix ca'a púut cuxlajic Cristo ti' le quíimilo' tu yo'olal u nojbe'en páajtalil le taatao'.

⁵Tumen wa j nu'upo'on ti' Cristo ti' jun p'éel quíimil je'el bix le tu bisaj leti'o', bey xan yaan c nu'upul tu yéetel ti' u ca'a púut cuxtal.

⁶C ojel le c úuchben wíinico' j si'in ti' cruz yéetel Cristo, u ti'al ca xu'ulsa'ac u wíinclil le kebana' yéetel ca jáawac c palitzilta'al tumen le kebano'.

⁷Tumen le máax dzo'oc u quíimile' dzo'oc u to'ocol ti' le kebano'.

⁸Wa to'on dzo'oc c quíimil yéetel Cristoe', c ocsaj óoltic yaan c cuxtal xan tu yéetel.

⁹Tumen c ojele' Cristoe', cu dzo'ocol u ca'a púut cuxtal ti' le quíimilo', mix bikin cun quíimil tu ca'a te'en; le quíimilo' mina'an u páatalil tu yóokol.

¹⁰Tumen le ca j quíim Cristoe', j quíim jun puli' u ti'al le kebano'; ba'ale' le ca j cuxlaje', cu cuxtal u ti'al Ku.

¹¹Bey xan te'ex, tuculte'exe' quimene'ex u ti'al le kebano', ba'ale' cuxa'ane'ex u ti'al Ku jun múuch' yéetel Cristo Jesús c Yuumtzil.

¹²Le o'olale', ma' a cha'ique'ex u yantal u páajtalil le keban yóokol a wíinclile'ex cu quíimilo', u ti'al ma' a beetique'ex u dzíibolalo'ob le wíinclilo'.

¹³Ma' a kubique'ex a wíinclile'ex ti' le kebano' je'el bix u nu'uculil u beeta'al kaase'. Ba'ale' kubaba'ex ti' Ku je'el bix máaco'ob quimeno'ob ca'ache' ba'ale' dzo'oc u ca'a púut cuxtalo'ob. Kube'ex a wíinclile'ex ti' Ku je'el bix u nu'uculil u ti'al u beeta'al utze'.

¹⁴Tumen le kebano' ma' túun yantal u páajtalil ta wóokole'ex, tumen mina'ane'ex tu yáanal le a'almaj t'aano' ba'ale' ti' yane'ex tu yáanal u siibal utzil Kue'.

¹⁵¿Ba'ax túun? ¿Binel ca'aj kebanchajal tumen mina'ano'on tu yáanal le a'almaj t'aano' ba'ale' ti' yano'on tu yáanal u siibal utzil Kue'? ¡Tu jaajile' ma'!

¹⁶Te'exe' jach ma'alob a wojelile'exe' wa ca kubicaba'ex je'el bix palitzil ti' jun túul dzuul u ti'al a wu'uyique'ex u t'ane', palitzile'ex túun ti' le dzuulo' unaj a wu'uyique'ex u t'aan. Bey túuno' wa ca wu'uyique'ex u t'aan le kebano', lela' u ti'al quíimil, wa ca wu'uyique'ex u t'aan Kue' lela' u ti'al a bisique'ex jun p'éel toj cuxtal.

¹⁷Nib óolal ti' Kue', te'ex palitzile'ex ca'ach ti' le kebano', dzo'oc a wu'uyique'ex yéetel tuláacal pucsi'ikal u t'aan le ca'ansaj ti' ba'ax j ku'ubexo'.

¹⁸Le ca j to'oque'ex ti' u palitzil le kebano', j ooque'ex a meyajte'ex jun p'éel toj cuxtal.

¹⁹(Táan in t'aan je'el bix u t'aan máaco'obe', tumen beyo' mas t'áalcab a na'atique'ex le ba'alo'oba'.) Bey túuno' je'el bix ta kubilaque'ex a wíinclile'ex u ti'al a meyajte'ex le keban yéetel le kaaso', u ti'al a beetique'ex ba'ax kaase', bey unaj a kubique'ex a wíinclile'ex bejela'e' u ti'al a meyajtique'ex jun p'éel toj cuxtal, u ti'al a bisique'ex jun p'éel cuxtal kuba'an jun puli' ti' Yuum Ku.

²⁰Le ca'ach láili' palitzile'ex ti' le kebano', mina'ame'ex ti' u meeyjul jun p'éel toj cuxtal;

²¹ba'ale' ¿ba'ax ta náajalte'ex ti' le ba'alo'ob cu beetic a ch'a'ique'ex subtal bejela'e' tumen chéen cu bisico'ob máac ti' quíimil?.

²²Ba'ale' bejela'e', toca'ane'ex ti' u palitzil le kebano', dzo'oc a wocle'ex ti' u meeyjul Ku. Lela' cu dzáic te'ex jun p'éel ma'alob náajal, tumen cu taasic jun p'éel cuxtal tu jaajil kuba'an ti' Ku, yéetel tu dzooque' le cuxtal mina'an u xuulo'.

²³Tumen u bo'olil le kebano' quíimil, ba'ale' le siibal cu dzáic Kuo' cuxtal mina'an u xuul tu yo'olal Cristo Jesús c Yuumtzil.