Read Yucateco Romanos 9 Bible Online

Romanos 9 - Yucateco bible

Romanos 9

¹Táan in wa'alic u jaajil, tumen ti' yanen ti' Cristoe', ma' táan in tuus. Tumen in tuucule' nu'uta'an u beel tumen Quili'ich Pixane', cu ya'alic teen jach u jaajil.

²Jach okom in wóol yéetel mantadz yaan yaayaj óolal tin pucsi'ikal.

³Tumen tene' in káat yantal tu yáanal kaakas t'aan, jun páaycunta'an ti' Cristo, wa lela' je'el u suut utzil ti' in sucu'uno'ob, le máaxo'ob in wéet ki'ikelo'obo'.

⁴Leti'obe' u ch'i'ibalo'ob Israel, j kamo'ob tumen Ku bey u paalalo'obe'. Kue' j anji ichilo'ob yéetel u nojbe'enil, bey xan tu dzaj ti'ob le nup t'aano'obo', u ya'almaj t'aan Moisés, u kultajil le temploo' yéetel le dzaabil t'aano'obo'.

⁵Leti'obe' u ch'i'ibalo'ob le c úuchben taataobo', ti' leti'ob tu ch'a'aj Cristo u wíinclil; Cristoe' Ku tu yóokol tuláacal ba'al, qui'iqui' t'anta'ac tu yo'olal kiino'ob mina'an u xuul. Amén.

⁶Ba'ale' ma' u káat u ya'ale' wa ma' dzo'ocbesa'ab u dzaabil t'aan Ku ti' Israeli', ba'ax ucha'ane' ma' tuláacal u ch'i'ibal Israel jach tu jaajil u caajal israeli'.

⁷Mix tuláacal u ch'i'ibal Abraham jach tu jaajil u paalalo'obi'; tumen Kue' tu ya'alaj ti': Tu yo'olal Isaac cun antal a ch'i'ibal.

⁸Lela' cu dzáic c na'ate' mix máac u paal Ku chéen tu yo'olal le ki'ik iquil u síijilo'; ba'ale' chéen cu páajtal u ya'ala'al jach tu jaajil u ch'i'ibalo'obe' le máaxo'ob paalalo'ob tu yo'olal u dzo'ocpajal u dzaabil t'aan Kuo'.

⁹Tumen le dzaabil t'aan tu ya'alaj Ku ti' Abrahame' leti' lela': Ti' le kiin a'alano' bíin taalaquen, Sara túune' bíin yanac u paal.

¹⁰Lela' ma' tuláacali'. Le ca'a túul u paalal Rebecae' jun túulili' u taatao', c úuchben taata Isaac;

¹¹tumen ma'ili' síijico'obe' mix u beeto'ob mix ba'ali', mix utz mix kaas, u ti'al ca p'áatac u yóolal le Ku tu yéeyajo', ma' tu yo'olal ba'ax cu beetic máaqui' ba'ale' tu yo'olal le máax t'anico',

¹²j a'ala'ab ti' Rebeca: Le u asab nojochilo' yaan u meyajtic le asab chichano'.

¹³Lela' queet yanil le Quili'ich Dzíib cu ya'alic: Tin yaabiltaj Jacob ba'ale' tin p'ectaj Esaú.

¹⁴¿Ba'ax túun je'el c a'alique'? ¿Ma' toj ba'ax cu beetic Kui'? ¡Tu jaajile' ma' táan c a'alic lelo'!

¹⁵Tumen tu ya'alaj ti' Moisés: Bíin in ch'a'a óotzilil ti' le máax in káat in ch'a'a óotzilil ti'o', yéetel bíin p'éecnac in wóol tu yo'olal le máax in káat in p'eques in wóole'.

¹⁶Bey túuno' ma' tu yúuchul tumen u káat máac wa tu yo'olal u mukul muukil, ba'ale' tu yo'olal u ch'a'a óotzilil Ku.

¹⁷Tumen ti' le Quili'ich Dzíibo' cu ya'alic ti' u ajawil Egipto: Tin beetajech ajaw u ti'al ca in we'es ti' teech in páajtalil, yéetel in dzáic kaj óoltbil in kaaba' ti' tuláacal u yóocolcaab.

¹⁸Bey túuno' Kue' cu ch'a'ic óotzilil ti' le máax u káat u ch'a'a óotzililo', bey xan cu chichcuntic u pucsi'ikal le máax u káat u chichicunt u pucsi'ikalo'.

¹⁹Ba'ale' je'el a wa'alic teen túune': Wa beyo', ¿ba'axten túun cu si'ipilcunta'al máac tumen Ku?, tumen ¿máax je'el u páajtal u bin tu contra ba'ax u káate'?

²⁰¡Ba'ale', máac! ¿Máaxech teech u ti'al a kakat núuctic u t'aan Ku? ¿Je'el wa u páajtal u ya'alic le cuum kat ti' máax beeto'? ¿Ba'axten ta beetajen beya'?

²¹Tumen le j pat kato' yaan u páajtalil ti' u beetic yéetel le kato' je'el ba'ax u káate'; cu páajtal u beetic yéetel le kato' jun p'éel cuum u ti'al j meyaj ti' wa ba'ax jun páaycunta'an, bey xan cu páajtal u beetic u láak u ti'al j meyaj ti' je'el ba'alaque'.

²²¿Ba'ax túun, wa Ku, u ti'al u dzáic ilbil bix u jaadz, yéetel u ti'al u ye'esic u páajtalile' tu mukyajtaj yéetel chuca'an óolal le máaxo'ob cu najmatico'ob ca'ach le jaadzo', yéetel yaan u xu'ulsa'alo'ob ca'acho'?

²³Tu beetaje' u ti'al u ye'esa'al u ayikalil u nojbe'enil ti' le máaxo'ob tu ch'a'aj óotzililo', máaxo'ob xan tu nu'uctaj tu yáax chuun u ti'al u kamo'ob le nojbe'enila'.

²⁴Tumen Kue' tu t'anajo'on, ma' chéen ichil le judíobo', ba'ale' tac ichil xan le máaxo'ob ma' judíobo'.

²⁵Je'el bix cu ya'alic ti' u libroil Oseas: Le máaxo'ob ma' in caajalo', yaan in wa'alic ti'ob in caajal, yéetel le máax ma' yaabila'an ca'acho', yaan in wa'alic ti' in yaabiltmaj.

²⁶Ti' le cúuchil tu'ux a'ala'ab ti'ob: Te'exe' ma' in caajale'exi', ti' cun a'albil ti'ob u paalalo'ob le cuxa'an Kuo'.

²⁷Ba'ale' tu yo'olal le Israelitaobo', Isaíase' tu ya'alaj: Quex u ch'i'ibal Israel jach táaj ya'ab je'el bix u sa'am lu'umil le ka'anabo' chéen u yalabo'ob bíin to'ococo'ob,

²⁸tumen séeba'an yéetel chuca'an bíin u dzo'ocbes Yuumtzil u t'aan yóokolcaab.

²⁹Je'el bix tu ya'alaj xan Isaíase': Wa le Yuumtzil ti' máax yaan tuláacal páajtlil ma' u p'atic to'on ch'i'ibale', je'el bix u caajilo'ob Sodoma yéetel Gomorra bíin p'áataco'on ca'acho'.

³⁰¿Ba'ax bin c a'al túun? Le máaxo'ob ma' judíob mix táan u caxtico'ob u dza'abalo'ob ma'alob tu táan Kuo', leti'ob máax dzo'oc u dza'abalo'ob ma'alob tu táan Ku tu yo'olal le ocsaj óolalo'.

³¹Ba'ale' le Israelitaob cu caxtico'ob u yantalo'ob ma'alob tu táan Ku iquil u bino'ob tu paach jun p'éel a'almaj t'aane' ma' páatac u dzo'ocbesico'ob le a'almaj t'aano'.

³²¿Ba'axten? Tumen ma' tu dzaj yóolo'ob u dzabalo'ob tu táan Ku tu yo'olal le ocsaj óolalo', ba'ale' tu yo'olal le ba'ax cu beetico'ob leti'obo'. Le o'olale' j t'óochpajo'ob ti' le u tuunichil t'óochpajal

³³cu ya'ala'al ti' le Quili'ich Dzíibo': Tene' táan in dzáic ti' Sión jun túul máax u tuunichil t'óochpajal yéetel nojoch tuunich cu beetic u lúubul máac; le máax cu yocsic u yóol ti'e', ma' bíin lúubuc u yóoli'.