Read Yucateco 1 Corintios 10 Bible Online

1 Corintios 10 - Yucateco bible

1 Corintios 10

¹In káat ca a wojéelte'ex sucu'une'ex, tuláacal c úuchben taataobe' anji'ob tu yáanal le múuyalo' yéetel tuláacalo'ob j máano'ob tu chúumuc le ka'anabo'.

²Beyo' tuláacalo'ob ocja'anajo'ob yéetel Moisés ti' le múuyalo' bey xan ti' le ka'anabo'.

³Bey xan tuláacalo'ob tu jaanto'ob le ca'anil waajo'

⁴yéetel tuláacalo'ob tu yukajo'ob le ca'anil ukulo'. Tumen tu yukajo'ob le ja' cu jóokol ti' le ca'anil tuunich láakintico'ob ca'aliquil táan u bino'obo'. Le tuunicho' Cristo.

⁵Quex beyo' u asab ya'abil ti'obe' ma' lúubo'ob utzil ti' Kui', le o'olale' j quíimo'ob te x tocoy lu'umo'.

⁶Tuláacal lela' j úuche' bey jun p'éel ca'ansaj c ti'ale', u ti'al ma' c dzíiboltic kaakas ba'alo'ob, je'el bix tu dzíiboltajo'ob leti'obe'.

⁷Le o'olale' ma' a kultique'ex beetbil kuo'ob je'el bix tu beetajo'ob dze'edzec leti'obe', je'el bix cu ya'alic le Quili'ich Dzíibo': Le máaco'obo' j culajo'ob janal yéetel ukul, cu dzo'ocole' ca j líiko'ob u beeto'ob cha'ano'ob.

⁸Ma' unaj c nup kebantali', je'el bix tu beetajo'ob dze'edzec ti'obe', ca j quíim veintitres mil máaco'ob ti' jun p'éelili' kiin.

⁹Mix unaj c túuntic u yóol Yuumtzil je'el bix tu beetajo'ob dze'edzec ti'obe' ca j quíimo'ob tumen j chi'ibo'ob tumen le ca'ano'obo'.

¹⁰Mix a tutuc chi'ex tu contra Ku, je'el bix tutuc chi'inajo'ob dze'edzec ti'ob ca j quiimsa'abo'ob tumen u angelil le quíimilo'.

¹¹Tuláacal lela' j úuch ti' c úuchben taataob ca j dzaab ti' le Quili'ich Dzíibo' u ti'al jun p'éel ca'ansaj ti' to'on cuxa'ano'on ti' le u dzooc kiino'oba'.

¹²Bey túuno' le máax cu tuclic wa'alacbal ma'alo'obe' u canant ma' u lúubul.

¹³Le túuntaj óolalo'ob ca mukyajtique'exo' queet yéetel le cu mukyajtic tuláacal máaco'. Ba'ale' te'exe' cu páajtal a alab óoltique'ex Ku, tumen bíin u dzáa xan bix je'el u páajtal a jóokole'exi', u ti'al ca páatac a mukyajtique'ex. Ba'ale' le quéen talac le túuntaj óole' Ku túune' bíin u dzáa xan bix je'el u páajtal a jóokole'exi'.

¹⁴Le o'olale', in yaabilaj Ba'ale quen taalac le túuntaj óole Kue'tume' bíin u dzaa xan bix je'el u páajtal a jóok'le'exi' sucu'une'ex, púudzene'ex ti' u kultajil le beetbil kuo'obo'.

¹⁵Táan in t'anique'ex je'el bix máaco'ob yaan u na'ato'obe', te'ex túune' cu páajtal a p'is óoltique'ex ba'ax quin wa'alic te'ex.

¹⁶Le quéen c uk le ukul qui'iqui' t'anta'an iquil c dzáic gracias ti' Ku tu yo'olale', táan c ukic u ki'ikel Cristo, le quéen c jaant le waaj c xet'ico' táan c jaantic u wíinclil Cristo.

¹⁷Quex sen ya'abo'one' tuláacalo'on c janal ti' jun p'éelili' waaj, le o'olale' jun p'éelili' wíinclilo'on.

¹⁸Il a wile'ex u caajal Israel; le máaxo'ob cu jaantico'ob le quíimsbil sibalo'obo' cu táacpajalo'ob ti' u cúuchilo'ob kultaj.

¹⁹Ma' in káat in wa'ale' wa yaan u tojol le beetbil kuo', mix wa le janal dza'an tu táan le beetbil kuo' asab ma'alob ti' u láak janal.

²⁰Ba'ax quin wa'alique' le máaxo'ob ma' u kaj óolo'ob kuo' le quéen u dza'ob wa ba'axe' cu dzáico'ob ti' le kaakas pixano'obo' ma' ti' Kui'. Le o'olale' ma' in káat ca yanac ba'al a wile'ex yéetel le kaakas pixano'obo'.

²¹Ma' tu páajtal a wukique'ex u yukul Yuumtzil, wa ca wukique'ex u yukul le kaakas pixano'obo'. Mix cu páajtal a janale'ex tu mayacche' Yuumtzil, wa ca janale'ex tu mayacche' le kaakas pixano'obo'.

²²¿A káate'ex wa a p'uje'ex Yuumtzil? ¿Asab wa mu'uka'ano'on ti' leti'?

²³U jaajil ba'ax cu ya'ala'al, jun túul máaque' jáalkab u ti'al u beet je'el ba'alac u káate', ba'ale' ma' tuláacal ba'al cu taasic utzi'. Bey, jun túul máaque' jáalkab u ti'al u beetic jeel ba'alac u káate', ba'ale' ma' tuláacal ba'al cu yantal u ti'al u ch'íijil máac ti' u pixani'.

²⁴Mix máac ca u caxant utz u ti'al tu juunal, ba'ale' unaj u caxantic utz u ti'al u láak máaco'ob.

²⁵Man a jaante'ex je'el ba'alac ca co'onoc kíiwique', ma' a káatique'ex mix ba'al tu yo'olal u tuucul máac,

²⁶tumen le lu'uma' yéetel tuláacal le ba'ax yaan te j lu'uma' u ti'al Yuumtzil.

²⁷Wa jun túul máac ma' ocsaj óol cu t'anique'ex janale', wa a káate'ex bine', jaante'ex je'el ba'alac ca dza'abac te'exe', ma' a káatique'ex tu yo'olal u tuucul máac.

²⁸Ba'ale' wa yaan máax cu ya'alic te'exe': Le baka' j dzaab tu táan beetbil kuo'ob, ma' a jaantique'ex túun, u ti'al ma' a loobiltique'ex le máax a'alo', tu yo'olal u tuucul máac.

²⁹Táan in wa'alic u tuucul le u láako' ma' a tuucul techi'. Ba'ale' yaan máax cu páajtal u káatic: ¿Ba'ax teen bíin p'is óolta'ac ba'ax quin beetic tu yo'olal u tuucul yaanal máac?

³⁰Tumen wa quin dzáic nib óolal ti' Ku tu yo'olal ba'ax quin jaantique', ¿ba'axten bíin a'ala'ac teen ba'al tumen táan in jaantic?

³¹Ma'alob túun wa ca janale'ex, wa ca wukule'ex, wa ca beetique'ex u láak wa ba'axe', beete'ex tuláacal u ti'al u nojbe'enil Ku.

³²Ma' a dzáique'ex ti' mix máac ba'al o'olal u lúubul: mix ti' le judíobo', mix ti' le máaxo'ob yano'ob tu iglesia Kuo'.

³³Tene' táan in dzáic in wóol in lúubul utzil tu táan tuláacal máac ti' je'el ba'alac ca in beete'. Ma' táan in caxtic in wutzil tin juunal ba'ale' u yutzil u láak máaco'ob u ti'al ca to'ococo'ob.