Read Yucateco 1 Corintios 13 Bible Online

1 Corintios 13 - Yucateco bible

1 Corintios 13

¹Wa ca t'aanaquen yéetel u t'aa máaco'ob wa u t'aa ángelo'ob, ba'ale' mina'an teen yaacunaje', quin béeytal je'el bix jun p'éel ba'al cu bojolaanquile' wa jun p'éel campana chéen táan u juume'.

²Wa táan in tze'ectic ma'alob péectzilo'ob in kammaj ti' Ku, wa in kaj óol tuláacal ta'acbil ba'alo'ob, wa in wojel tuláacal ba'al, wa yaan teen xan tuláacal le ocsaj óolal kabéet u ti'al in luksic le witzo'ob tu cúuchilo'obo', ba'ale' mina'an teen yaacunaje', mix ba'alen.

³Wa quin t'oxic tuláacal ba'ax yaan teen, wa quin kubic xan in wíinclil u ti'al ca tóoca'ac, ba'ale' mina'an teen yaacunaje', mix ba'al u biilal teen.

⁴Le máax yaan u yaacunaje', yaan chowac óolal ti', utz u pucsi'ikal, mina'an kaakas dzíibolal ti', ma' tu nojba'alcunsicubáa, ma' tu ca'analtal u yich.

⁵Ma' tu kaakas t'aan, ma' tu caxtic ba'al u ti'al, ma' tu p'u'ujul, ma' tu ch'a'a kuxtic mix máac.

⁶Ma' tu qui'imactal u yóol tu yo'olal u kebano'ob u láak máac, ba'ale' cu qui'imactal u yóol tu yo'olal le jaajilo'.

⁷tuláacal cu mukyajtic yéetel ocsaj óolal, yéetel alab óolal yéetel chuca'an óolal.

⁸Le yaacunajo' mix bikin cu quíimil. Bíin taalac u kiinil u xu'ulul u yúuchul tze'ec, bíin jáawac xan u yúuchul t'aan ti' jejeláas t'aano'ob, bíin luksa'ac xan le kaj óolalilo'.

⁹Tumen ma' chuca'an c kaj óolali', mix chuca'an c tze'equi'.

¹⁰Ba'ale' le quéen taalac le ba'ax chuca'ano', le ba'ax ma' chuca'ano' bíin luksa'ac.

¹¹Ca'ach chan xi'ipalene', quin t'aan je'el bix jun túul paale' quin tuucul je'el bix jun túul paale' yéetel quin na'atic ba'al je'el bix jun túul paale', ba'ale' le ca j nojoch máacchajene', tin p'ataj paachil u ba'alubáa paalil.

¹²Bey xano' bejela'e' ma' sáasil c ilic tuláacal ba'ali', táan c ilic je'el bix u yila'a ti' jun p'éel néen u yoochel wa ba'axe', ba'ale', bíin c il tuláacal ba'al jach sáasil. bele' ma' chuca'an in kaj óolali', ba'ale' bíin in kaj óolt tuláacal ba'al, je'el bix u kaj óoltmajen Kue'.

¹³Bey túuno', le ocsaj óolalo', le alab óolalo' yéetel le yaacunajo' mix bikin u xu'ululo'ob. Ba'ale' u asab nojochil ichil le óox p'éela' leti' le yaacunajo'.