Read Yucateco 1 Corintios 15 Bible Online

1 Corintios 15 - Yucateco bible

1 Corintios 15

¹Beoraa', sucu'une'ex, in káat ca ka'ajac te'ex le ma'alob péectzil tin tze'ectaj te'exo'. Lela' leti' le ma'alob péectzil ta kame'exo', tu'ux jeedzel a wóole'ex xan.

²Bey xan tu yo'olal le ma'alob péectzila' te'exe' toca'ane'ex, wa cu p'áatal te'ex le t'aan tin tze'ectaj te'exo', wa ma'e' chéen cunel ocsaj óolnajique'ex.

³Yáaxile', tin dzaj a wojéelte'ex le ca'ansaj tin kamajo'. Tin ca'ansaj te'exe' Cristoe' j quíim tu yo'olal c keban, je'el bix cu ya'alic le Quili'ich Dzíibo',

⁴j mu'uqui, yéetel tu yóox p'éel kiine' j ca'a púut cuxlaji, je'el bix cu ya'alic xan le Quili'ich Dzíibo'.

⁵Chíicpaj ti' Pedro, cu dzo'ocole' ti' le apóstolo'obo'.

⁶Cu dzo'ocole' chíicpaj ti' asab ti' quinientos sucu'uno'ob much'ucbalo'ob, ya'ab ti' leti'obe' cuxa'ano'ob tac bejela'e' dze'edzeque' dzo'oc u quíimilo'ob.

⁷Cu dzo'ocole' chíicpaj ti' Jacobo, cu dzo'ocole' ti' tuláacal le apóstolo'obo'.

⁸Tu dzooc tuláacale' chíicpaj xan ti' teen quex tene' beyen máax ma' síij tu kiinili'.

⁹Tumen tene' u asab chichanilen le apóstolo'obo', mix táan in najmatic in kaaba'intic apóstol, tumen tin ch'a'apachtaj u iglesia Ku.

¹⁰Ba'ale' tene' j kuchen béeytal je'el bixena' tu yo'olal u siibal utzil Ku; yéetel u siibal utzil ti' tene' ma' p'áat ma' u yichanquili'. Tumen tene' dzo'oc in meyaj asab ya'ab ti' tuláacalo'ob, quex ma' teni', ba'ale' u siibal utzil Ku cu meyaj ti' teen.

¹¹Ba'ale' ma' c ilic wa teen wa leti'ob. Lela' leti' le ma'alob péectzil c tze'ectica' leti' xan le dzo'oc a wocsaj óoltique'exa'.

¹²Ba'ale' wa to'on táan c tze'ectic u ca'a púut cuxtal Cristo ichil le quimeno'obo', ¿bix u ya'alico'ob dze'edzec ti' te'exe' mina'an ca'a púut cuxtal?

¹³Tumen wa mina'an ca'a púut cuxtale' mix Cristo jesús ca'a púut cuxlaji'.

¹⁴Wa Cristo ma' ca'a púut cuxlaje', le ma'alob péectzil c tze'ectica' mix ba'al u biilal, yéetel le ocsaj óolal yaan te'exo' mix ba'al u biilal xan.

¹⁵Wa beyo', to'one' chéen j tuuso'on u ti'al Ku, tumen dzo'oc c a'alic Kue' tu ca'a púut cuxquintaj Cristo; tumen wa jaaj ma' tu ca'a púut cuxtal le quimeno'obo', ma' jaaj túun wa Ku tu ca'a púut cuxquintaj Cristoi'.

¹⁶Tumen wa ma' tu ca'a púut cuxtal le quimeno'obo', mix túun Cristo ca'a púut cuxlaji'.

¹⁷Wa Cristo ma' ca'a púut cuxlaje' a wocsaj óolale'exe' mix ba'al u biilal, láili' ti' yane'ex ichil a kebane'exe'.

¹⁸Wa beyo', bey xan le quíimo'ob táan u yocsaj óoltico'ob Cristoo' saatal yanilo'ob.

¹⁹Wa c alab óolal ti' Cristo chéen u ti'al le lu'umcabil cuxtala', to'on u asab óotzilil ichil tuláacal máaco'ob.

²⁰Ba'ale' u jaajile' Cristoe' j ca'a púut cuxlaj ichil le quimeno'obo', leti' u yáaxil ichil le quimeno'ob yaan u ca'a púut cuxtalo'obo'.

²¹Tumen bey je'el bix tu yo'olal jun túul máac j taal le quíimil way yóokolcaabo', bey xan tu yo'olal jun túul máaque' le ca'a púut cuxtalo'.

²²Bey je'el bix tuláacal cu quíimil tu yo'olal Adane', bey xan ti' tuláacal cu yantala' cuxtal tu yo'olal Cristo.

²³Ba'ale' cada jun túule' tu tzoolol: Cristo yáax táanil je'el bix u yáax ich le joocho', cu dzo'ocole' le quéen taalac Cristoe', le máaxo'ob u ti'alo'obe'.

²⁴Cu dzo'ocole' cu taal u xuul, lela' le quéen xu'ulsa'ac tumen Cristo tuláacal Yuumtzilo'ob, jalachilo'ob yéetel páajtalilo'ob, yéetel le quéen u kub le ajawil ti' Ku Yuumbil.

²⁵Tumen Cristoe' yaan u ajawtal tac quéen dza'abac le máaxo'ob p'ecmaile' yáanal u yooc tumen Ku;

²⁶u dzo'oc ba'ax cun xu'ulsbile' leti' le quíimilo'.

²⁷Tumen Kue' u dzaamaj tuláacal ba'al tu yáanal u yooc Cristo. Ba'ale' le quéen u ya'al le Quili'ich Dzíib tuláacal ba'al dza'an tu yáanal u yooque', lela' cu na'ata'ale' ma' tac Kui', tumen leti' máax dzáa tu yáanal u yooc Cristo tuláacal ba'al.

²⁸Le quéen p'áatac tuláacal ba'al yáanal u yooc Cristoe', tac Cristo máax u paal Kue' yaan u yantal yáanal u páajtalil Ku, máax dzáa tuláacal ba'al yáanal u yooc leti'. Beyo' bíin tuláacalchajac Ku ti' tuláacal.

²⁹U láak ba'ax, yaan dze'edzec cu yocja'ob tu yo'olal le quimeno'obo'. ¿Ba'axten cu beetico'ob lela'? Wa le quimeno'ob ma' tu ca'a púut cuxtalo'obo' ¿ba'ax ti'al cu yocja'ob tu yo'olalo'ob?

³⁰¿Ba'axten túun c dzáicbáa tu táan sajbe'entzilo'ob?

³¹Sáamsamal yanen tu táan quíimil, lela' jach jaaj, sucu'une'ex je'el bix le qui'imac óolal yaan teen ta wo'olale'exo', tumen dzo'oc a wocsaj óoltique'ex Yuumtzil Jesucristo.

³²Wa tu yo'olal lu'umcabil ba'alo'ob ba'atelnajen yéetel dzíidzic ba'alche'ob tu caajil Efesoe'; ¿ba'ax túun tin náajaltaj yéetel lelo'? Wa jaaj ma' tu ca'a púut cuxtal le quimeno'obo', ti' jaajil yano'ob máax cu ya'alico'ob: Janaco'on yéetel ukulnaco'on tumen sáamal bíin quíimico'on.

³³Ma' a cha'ique'ex a tu'usle'ex. Je'el bix cu ya'alic le queett'aano': Le kaakas éet xíimbalo'obo' cu kascuntico'ob le ma'alob cuxtalo'.

³⁴Suunene'ex ti' jun p'éel cuxtal ma'alob yéetel toj, ma' a kebantale'ex, tumen dze'edzec ti' te'exe' ma' u kaj óolto'ob Yuum kui'. Quin wa'alic lela' u ti'al ca a ch'a'ex subtal.

³⁵Yaan máax je'el u páajtal u káatique': ¿Bix cun ca'a púut cuxtal le quimeno'obo'? ¿Ba'ax wíinclil cun yantal ti'ob?

³⁶J ma' na'at máac, le ba'ax ca pakico' ma' tu cuxtal wa ma' tu quíimil táanil.

³⁷Le ba'ax ca pakico' ma' leti' le pakal cu jóokolo', ba'ale' chéen jun p'éel semilla, wa trigo wa u láak neek.

³⁸Cu dzo'ocole' Kue' cu dzáic ti' le semillao' le wíinclil u káato', ti' jun p'éele' cu dzáic le wíinclil unaj u yantal ti'o'.

³⁹Ma' queet tuláacal le wíinclilo'obo', u wíinclil máaque' jela'an, u wíinclil le ba'alche'obo' jela'an xan, yaanal u ti'al le ch'íicho'obo' yaanal xan u ti'al le cayo'obo'.

⁴⁰Bey xan yaan ca'anil wíinclilo'ob yéetel lu'umcabil wíinclilo'ob, ba'ale' u jadzutzil le ca'anil wíinclilo'obo' jela'an ti' u jadzutzil le lu'umcabil wíinclilo'obo'.

⁴¹U sáasilil le kiino' jela'an ti' u sáasilil le ujo', bey xan jela'an ti' u sáasilil le eeko'obo'; ichil xan le eeko'obo' u sáasilil jun p'éele' jela'an ti' u sáasilil u láak.

⁴²Bey xan cu yúuchul yéetel u ca'a púut cuxtal le quimeno'obo'. Cu mu'ucul jun p'éel wíinclil cu tu'utale' cu ca'a púut cuxtal jun p'éel wíinclil ma' tu tu'utal.

⁴³Cu mu'ucul jun p'éel wíinclil p'ecbe'ene', cu ca'a púut cuxtal jun p'éel nojbe'en wíinclil. Cu mu'ucul wíiclil mina'an u muuke', cu ca'a púut cuxtal jun p'éel wíinclil mu'uka'an.

⁴⁴Cu mu'ucul jun p'éel lu'umcabil wíinclile', cu ca'a púut cuxtal jun p'éel pixanbe'en wíinclil. Wa yaan lu'umcabil wíinclile', yaan xan pixanbe'en wíinclil.

⁴⁵Bey túuno' cu ya'alic le Quili'ich Dzíibo': Adán le yáax máaco' beeta'ab jun túul máac yaan cuxtal ti'; ba'ale' le u dzooc Adano', jun túul pixan cu dzáic cuxtal.

⁴⁶Ba'ale' ma' táanil le pixanbe'enilo', táanil le lu'umcabilo', cu dzo'ocole' le pixanbe'enilo'.

⁴⁷Le yáax máaco', beeta'an yéetel lu'ume', lu'umcabil; u ca'a túul máaco', lela' c Yuumtzil, ca'anil.

⁴⁸U wíinclilo'ob yóokolcaabe' je'el bix le máac beeta'an yéetel le lu'umo'. U wíinclilo'ob ca'ane' je'el bix le máax ca'anile'.

⁴⁹Je'el bix chica'ano'on ti' le máac beeta'an yéetel lu'umo', bey xan bíin chíicpajco'on ti' le máax ca'anile'.

⁵⁰In káat in wa'al te'ex, sucu'une'ex, le ba'ax bak yéetel ki'ike' ma' tu páajtal u yocol tu ajawil Ku; tumen le ba'ax cu xu'ulule' ma' tu páajtal yantal ti' jun p'éel cúuchil ma' tu xu'ulul mantadz.

⁵¹In káat ca wojéelte'ex jun p'éel ta'acbil ba'al: Ma' tuláacalo'on bíin quíimico'oni' ba'ale' tuláacalo'on yaan c jelbesa'al

⁵²ti' jun súutuc, ti' jun p'éel mudz ich, le quéen u'uya'ac le dzooc paax ti' le trompetao'. Bíin juumnac le trompetao', le quimeno'ob túuno' yaan u ca'a púut cuxtalo'ob u ti'al ma' u quíimilo'ob tu ca'a téen mix bikin; to'on túune' yaan c jelbesa'al.

⁵³Tumen le c wíinclil ma' tu xáantala', yaan u búucbesa'al yéetel le ba'ax cu xáantal mantadzo'; yéetel le c wíinclil cu quíimila' yaan u búucbesa'al yéetel le wíinclil ma' tu quíimil mix bikino'.

⁵⁴Le quéen búucbesa'ac le c wíinclil ma' tu xáantala' yéetel le ba'ax cu xáantal mantadzo', yéetel le quéen búucbesa'ac le c wíinclil cu quíimila' yéetel le ba'ax mix bikin u quíimilo', bey túuno' cu dzo'ocpajal ba'ax cu ya'alic le Quili'ich Dzíibo': Le quíimilo' dzo'oc u dzáancha'ata'al.

⁵⁵Quíimil ¿tu'ux yaan a páajtalil u ti'al loobiltico'on? ¿Tu'ux yaan, quuíimil, a dza'ancha'atajil?

⁵⁶U yaach le quíimilo' leti' le kebano', yéetel u muuk le quíimilo' leti' le a'almaj t'aano'.

⁵⁷Ba'ale', nib óolal ti' Yuum Ku cu beetic c dzáancha'atic tuláacal ba'al tu yo'olal c Yuumtzil Jesucristo.

⁵⁸Le o'olale', in yaabilaj sucu'une'ex ca p'áataque'ex yéetel muuk ma' u péec a wóole'ex, meyajnene'ex asab ya'ab mantadz ti' u meeyjul Yuumtzil; tumen te'exe' a wojele'exe' le meyaj ca beetique'ex jun múuch' yéetel Yuumtzile' ma' chéen cuneli'.