Read Yucateco 1 Corintios 16 Bible Online

1 Corintios 16 - Yucateco bible

1 Corintios 16

¹Tu yo'olal le siibalo'ob u ti'al u yáanta'al le ocsaj óolo'obo', beete'ex je'el bix tin tzolaj ti' le iglesiaob yaan tu lu'umil Galaciao'.

²Tu yáax kiinil le semanao', cada jun túul ti' te'exe' unaj u jun páaycuntic wa bajux, tu p'iis je'el bix tu náajaltaje', ca u líikse' u ti'al ma' u mo'olol taakin le quéen kuchuquen.

³Le quéen kuchuquene', bin in ca'aj in túuxt Jerusalén le máaxo'ob can a yéeye'exe', yéetel dzíiba'an ju'uno'ob ca in dzáa ti'obe', u ti'al ca u biso'ob a siibale'ex ti' le ocsaj óolo'ob yaan te'elo'.

⁴Wa ma'alob ca xi'iquen tac tene', leti'obe' cu bino'ob tin wéetel.

⁵Le quéen máanaquen tu lu'umil Macedoniae', yaan in kuchul in wile'ex.

⁶Je'el u yúuchul ca p'áataquen ta wicnale'ex dze'edzec kiino'obe', wa ca p'áataquen tuláacal u kiinilo'ob que'el, bey túuno' te'exe' cu páajtal a wáantiquene'ex tac tu'ux kabéet in bin cu dzo'ocol.

⁷Tu jaajile' ma' in káat in wile'ex chéen u ti'al in máanbali', tumen quin tuclic in wantal dze'edzec kiino'ob ta wéetele'ex, wa u káat Yuumtzil.

⁸Ba'ale' yaan in p'áatal Efeso tac tu kiinil Pentecostés,

⁹tumen je'ekab teen jun p'éel cóococh jool naj u ti'al u meeyjul Yuumtzil, yaan xan ya'ab aj p'eeco'ob.

¹⁰Wa cu kuchul Timoteoe', il a wile'ex ca qui'imacchajac u yóol ichile'ex, yéetel ma' u tuclic mix ba'al, tumen leti'e' táan u meyaj ti' u meeyjul Yuumtzil je'el bix tene'.

¹¹Le o'olale', mix jun túul ti' te'ex ca u mixba'alcunte. Ba'ale' áante'ex u ti'al ca páatac u jóokol u binbal yéetel jéedzel u ti'al ca taalac u yilen, tumen táan in pa'atic jun múuch' yéetel u láak sucu'uno'ob.

¹²Ti' sucu'un Apolose' tin sen káat óoltaj ti' ca xi'ic yéetel u láak sucu'uno'ob u ti'al u yile'exo', ba'ale' jun puli' ma' tu yóoltaj j bin beoraa'; bíin xíic le quéen páataque'.

¹³P'il ichnene'ex mantadz, yéetel ma' a péeque'ex ti' le ocsaj óolalo'. xíimbalnene'ex bey xiibe'; mu'ukanchajque'ex.

¹⁴Tuláacal ba'al ca a beete'exe', beete'ex yéetel yaacunaj.

¹⁵Sucu'une'ex, te'exe' a wojele'exe' u láaktzilo'ob Estéfanas leti'ob tu yáax ocsaj óolto'ob le ma'alob péectzil tu lu'umil Acaya, yéetel leti'obe' u dzaamajo'ob u yóolo'ob u meyajto'ob le sucu'uno'ob ti' le ocsaj óolalo'.

¹⁶In káat, túune', te'exe' ca a dzáaba'ex yáanal u kab máaxo'ob je'el bix leti'obe' yéetel yáanal u kab tuláacal le cu yáantajo'ob yéetel cu meyajo'obo'.

¹⁷Qui'imac in wóol tumen taal Estéfanas, Fortunato yéetel Acaico, tumen leti'obe' tu beetajo'ob ba'ax ma' ba'ax ma' páatji a beetique'ex te'exi' tumen mina'ane'ex waye'.

¹⁸Tu líiksajo'ob in wóol bey xan a wóole'ex. Unaj c tziquic le máaxo'ob je'el bix leti'obo'.

¹⁹U iglesiailo'ob u lu'umil Asia cu túuxtico'ob tziiquil t'aano'ob ti' te'ex. Aquila yéetel Priscila yéetel le múuch' ocsaj óolo'ob cu much'cuba'ob tu yotocho'obo' cu túuxtico'ob te'ex ya'ab tziiquil t'aano'ob tu kaaba' Yuumtzil.

²⁰Kame'ex u tziiquil t'aan tuláacal le sucu'uno'obo'. Tziiquil t'antaba'ex ta baatzile'ex yéetel jun p'éel Quili'ich Dzu'udz.

²¹Teen Pabloe' quin dzíibtic te'ex le tziiquil t'aana' yéetel in kab.

²²Wa yaan wa máax ma' táan u yaabiltic Yuumtzil Jesucristoe', dza'abac yáanal kaakas t'aan. ¡C Yuumtzil, co'oten!

²³U siibal utzil Jesucristoe' ca yanac ta wéetele'ex. Ca yanac in yaacunaj ti' tuláacale'ex tu yo'olal Cristo Jesús.

²⁴Ti' tuláacale'ex quin túuxtic in yaacunaj ti' Jesucristo.