Read Yucateco 1 Corintios 2 Bible Online

1 Corintios 2 - Yucateco bible

1 Corintios 2

¹Ba'ale' sucu'une'ex, le ca j binen in tze'ect ti' te'ex le jaaj cu taal ti' Kuo', ma' tin tze'ecta yéetel talan t'aano'obi'.

²Tumen le ca j yanchajen ichile'exe', ma' tin wóoltaj in wojéelt u láak ba'al wa ma' chéen Jesucristo, le máax si'in ti' cruzo'.

³J taalen ta táane'ex yéetel x ma' muuk óolal, táan in quiquilanquil tumen sajaquen,

⁴yéetel le ca j t'aanajen le ca tin tze'ectaj te'ex le ma'alob péectzilo', ma' tin wóoltaj in tzol xiquinte'ex yéetel u t'ano'ob máaco'ob canbalnaja'ano'obi'. Ba'ale' tin tzol xiquinte'ex yéetel Quili'ich Pixan bey xan yéetel u páajtalil Ku,

⁵u ti'al ca jéedzec a wocsaj óolale'ex yóokol u páajtalil Ku, ma' yóokol u na'at máaco'obi'.

⁶Ba'ale' c a'alic t'aano'ob chuup yéetel na'at ichil le máaxo'ob dzo'oc u ch'íijilo'ob ti' u yocsaj óolo'obo'. Ba'ale' le na'ata' ma' u yóokolcaabili' mix joka'an ti' u nuuctaquil le yóokolcaaba', máaxo'ob séeba'an u mina'achajlo'ob.

⁷Táan c t'aan tu yo'olal u ta'acbil na'at Ku, tu yo'olal le ta'acbil tuucul yanji ti' Ku, ma'ili' u beet u yóokolcaabe' u ti'al u toquico'on u ti'al kiino'ob mina'an u xuul.

⁸Mix jun túul ti' u jalachilo'ob yóokolcaab tu na'ataj lela', tumen wa ca u na'ato'obe' ma' táan ca'ach u sinico'ob ti' cruz le nojbe'en Yuumtzilo'.

⁹Ba'ale' je'el bix cu ya'alic le Quili'ich Dzíibo': Kue' u nu'uctmaj, u ti'al le máaxo'ob u yaabiltmao' Kuo', ba'alo'ob ma' ila'an mix u'uya'an, mix tuculta'an tumen mix máaqui'.

¹⁰Leti' le ba'alo'ob tu beetaj Ku c kaj óoltic tu yo'olal u Quilich Pixano', tumen le Quili'ich Pixano' cu xaklic tuláacal, tac u jach ta'acbil ba'alo'ob Ku.

¹¹Ichil máaco'obe', ¿máax je'el u yojéeltic ba'ax yaan tu pucsi'ikal máac wa ma' chéen le pixan yaan ti'o'? Bey xan chéen u Quili'ich Pixan Ku cu páajtal u yojéeltic ba'ax yaan ti' Yuum Ku.

¹²To'one' ma' t kamaj u pixan yóokolcaabi' ba'ale' le pixan cu taal ti' Kuo', u ti'al ca c na'at le ba'alo'ob u dzaamaj to'on Ku ichil u yutzilo'.

¹³To'one' c a'alic le ba'alo'oba' yéetel t'aano'ob u ca'ansmaj to'on u Quili'ich Pixan Ku, ma' yéetel t'aano'ob c canmaj chéen yéetel na'ati'. Bey c tzoolic le pixanbe'en ba'alo'obo' ti' le máaxo'ob yano'ob ti' le Pixano'.

¹⁴Le máax mina'an ti' le pixano' ma' tu kamic le ba'alo'ob cu taal ti' u Quili'ich Pixan Kuo', tumen u ti'al leti'e' chéen báaxal t'aano'ob. Ma' tu páajtal u na'atic xan tumen le ba'alo'oba' kabéet u na'ata'al yéetel pixanbe'en tuucul.

¹⁵Ba'ale' le máax yaan Quili'ich Pixan ti'e' cu páajtal u xakaltic bix yanil tuláacal ba'al, ba'ale' leti'e' ma' tu páajtal u xakalta'al u tuucul tumen mix máac.

¹⁶Tumen le Quili'ich Dzíibo' cu ya'alic: ¿Máax dzo'oc u na'atic u tuucul Yuumtzil? ¿Máax cu páajtal u ca'ansic Ku? Ba'ale' yaan to'on u tuucul Cristo.