Read Yucateco 1 Corintios 3 Bible Online

1 Corintios 3 - Yucateco bible

1 Corintios 3

¹Bey túuno' sucu'une'ex, ma' páatji in t'anique'ex je'el bix máaxo'ob cu bisa'alo'ob tumen Quili'ich Pixani', ba'ale' je'el bix lu'umcabil máaco'obe' je'el bix chaan palo'ob ti' u ba'alo'obil Cristo.

²Tin dzaj te'ex ca'ansajo'ob ma' talamo'obi', je'el bix jun túul chaan pal chéen chu'uch cu dzaabal ti'e' tumen ma' tu páajtal u jaantic chichich janal; tumen te'exe' ma' páatji a jaantique'ex le chichich janalo'. Mix bejela'a' cu páajtal a jaantique'exe',

³tumen láili' jach lu'umcabil máaque'exe'. Ca'aliquil yaan ti' te'ex kaakas dzíibolalo'ob, kuxiltáanbail yéetel jadzlantáanbailo'obe' jach lu'umcabil máaque'ex yéetel táan a beetique'ex le ba'axo'ob cu beetic tuláacal máaco'obo'.

⁴Tumen le quéen u ya'al wa máax: Tene' u ti'alen Pablo, u láake' cu ya'alic: Tene' u ti'alen apolos, ¿ma', táan a quetcaba'ex yéetel le chéen lu'umcabil máaco'obo'?

⁵Tumen ¿máax Pablo? ¿máax Apolos? chéen u palitzilo'ob Ku, máaxo'ob meyajnajo'ob u ti'al ca a wocsaj óolte'ex Yuumtzil. Tu jujun túule' tu beetaj le meyaj dzaab ti' tumen Yuumtzil ca u beeto'.

⁶Teen j pak le i'inajo', Apolos jóoyabte', ba'ale' Ku beet u ch'íijil.

⁷Bey túuno' le máax cu pakalo' yéetel le máax cu jóoyao' mix ba'alo'ob, ba'ale' Kue' leti' tuláacal, tumen leti' beetic u ch'íijil le pakalo'.

⁸Le máax cu pakalo' queet yéetel le máax cu jóoyabo', quex tumen Ku cun bo'otic ti' cada jun túule' le meyaj tu beetajo'.

⁹Éet meyajo'ob u ti'al c meyajtic Ku, te'ex túune' beye'ex le lu'um cu meyajta'al tumen Kuo'. Wa beye'ex bey jun p'éel pakilnaj cu líikesa'al tumen Kue'.

¹⁰Tene' beyen u nojochil le j pakalo'ob máax t'a'an tumen Ku u ti'al u dzáa u yáax tuunichil, u láako'obe' táan u líiksico'ob le pak tu yóokolo'. Ba'ale' cada jun túule' yaan u canantic bix u meyaj.

¹¹Tumen mix máac cu páajtal u dzáic u láak yáax tuunich jela'an ti' le dzo'oc u dza'abalo', lela' Jesucristo.

¹²Ba'ale' yaan máax cu páajtal u meyajtic yóokol le yáax tuunicha' oro, plata, qui'ichquelem tuunicho'ob, che', su'uc yéetel sakab.

¹³U meyaj cada jun túule' yaan u chíicbesa'al tu kiinil, tumen le kiino' yaan u taal yéetel káak, le káak túuno' yaan u ye'esic bix le meyaj tu beetaj cada jun túulo'.

¹⁴Wa yaan wa máax tu beetaj jun p'éel naj ma' tu yelele', cu bo'ota'al ti'.

¹⁵Ba'ale' wa le naj tu beetaj cu yelelo', cu láaj sa'atal, quex tumen leti'e' yaan u to'ocol, ba'ale' bey jun túul máac cu púudzul ti' káake'.

¹⁶¿Ma' wa a wojele'ex te'exe' u najile'ex Kui', yéetel cajacbal ti' te'exe' u quili'ich Pixan Ku?

¹⁷Wa jun túul ti' te'ex cu xu'ulsic u najil Kue', leti' xane' yaan u xu'ulsa'al tumen Ku, tumen u najil Kue' quili'ich, te'ex u najil Ku.

¹⁸Mix máac ca u tusubáa. Wa yaan máax ichile'ex cu tucultic jach yaan u na'at je'el bix u na'atil yóokolcaabe', unaj u beeticubáa bey jun túul mix ba'al u yojele', u ti'al ca yanac u na'at jach tu jaajil.

¹⁹Tumen u na'at le yóokolcaaba' mix ba'al u biilal tu táan Ku. Le quili'ich Dzíibo' cu ya'alic: Kue' cu beetic u lúubul le j na'ato'obo' ti' le kaas tu tuclajo'ob u beetico'obo'.

²⁰Cu ya'alic xan: Yuumtzile' u yojel mix ba'al u biilal u tuucul le j na'ato'obo'.

²¹Le o'olale', mix máac unaj u ca'analcuntic u yich tu yo'olal ba'ax cu páajtal u beetic wa máax máaquil, tumen tuláacal a ti'ale'ex:

²²Pablo, Apolos, Pedro, yóokolcaab, cuxtal, quíimil, bejela'e', sáamal, tuláacal a ti'ale'ex;

²³te'exe' u ti'ale'ex Cristo, Cristoe', u ti'al Ku.