Read Yucateco 2 Corintios 1 Bible Online

2 Corintios 1 - Yucateco bible

2 Corintios 1

¹Teen Pabloe' u apóstol Jesucristo, tumen bey tu yóoltil Ku. Teen yéetel sucu'un Timoteoe' c dzíib ti' u sucu'unilo'ob u iglesia Ku yaan tu caajil Corinto, yéetel ti' tuláacal le máaxo'ob u ti'alo'ob Ku yaan tu lu'umil Acayao'.

²Kame'ex u siibal utzil yéetel u jéedzel óolal Ku c Taata yéetel Yuumtzil Jesucristo.

³Co'ox qui'iqui' t'antic Ku u Taata c Yuumtzil Jesucristo, le Taata cu ch'a'ic to'oon óotzililo' yéetel le Ku cu qui'imaccuntic c óol mantadzo'.

⁴Kue' cu qui'imaccuntic c óol ti' tuláacal c mukyajo'ob, u ti'al ca páatac c qui'imaccuntic u yóol le máaxo'ob cu mukyajo'obo', iquil c dzáic ti'ob le qui'imac óolal u dzaamaj to'on Kuo'.

⁵Tumen je'el bix cu ya'abtal ti' to'on u mukyajo'ob Cristoe', bey xan tu yo'olal Cristoe' c kamic jun p'éel nojoch qui'imac óolal.

⁶Le o'olale', wa to'on c mukyaje', cu yúuchul u ti'al ca yanac ti' te'ex qui'imac óolal yéetel tocsajil; wa Ku cu qui'imaccuntic c óole' cu yúuchul xane' u ti'al ca yanac ti' te'ex qui'imac óolal yéetel tocsajil, beyo' ca páatac a mukyajtique'ex yéetel chuca'an óolale' le yaayaj óolalo'ob c mukyajtic to'ono'.

⁷Yaan to'on ti' te'ex jun p'éel alab óolal ma' táan u péec, tumen c ojele' je'el bix táacpaja'ane'ex ti' le qui'imac óolal cu dzáic to'on Kuo'.

⁸Sucu'une'ex, c káat ca wojéelte'exe' buca'aj nojoch kaasil úuch to'on tu lu'umil Asia. Jun p'éel yaayaj óolal jach táaj nojoche' mina'anchaj to'on u muukil c mukyajtic, t tucultaj ma' bíin jóokoco'on ca'ach yéetel cuxtal.

⁹To'one' t u'uyabáa je'el bix le máaxo'ob xot kinta'ano'ob u ti'al quíimilo'. Ba'ale' j úuche' u ti'al ca ca'ansa'aco'on u ti'al c alab óolt Ku le máax cu ca'a púut cuxquintic le quimeno'obo', ma' c alab óolticbáa to'oni'.

¹⁰Kue' tu ta'acajo'on yéetel táan u toquico'on ti' le nojoch loolob quíimilo'. Ti' leti' c dzaamaj c alab óolal u ti'al ca u toco'on mantadz

¹¹wa te'ex ca wáantico'one'ex yéetel a payalchi'ex. Wa ya'ab máaxo'ob cu payalchi'ob t o'olale' ya'ab máaxo'ob cun u dza'ob nib óolal ti' Ku tu yo'olal le siibal utzil cu dzáic to'ono'.

¹²Yaan jun p'éel ba'al cu dzáic to'on qui'imac óolal, leti' lela': c tuucule' cu ya'alic to'one' ma'alob xíimbalnajico'on way yóokolcaabe', x ma' ca'a p'éel ichil, yáax táanil ichile'ex. Lela' ma' úuch tu yo'olal c na'ati', ba'ale' Ku máax áanto'on yéetel u yutzil u ti'al ca páatac x cuxtal beyo'.

¹³Ti' le ba'axo'ob c dzíibtic te'exa' mina'an u láak ba'alo'ob wa ma' chéen le cu páajtal a xoquique'exo' yéetel ca na'atique'exo'. Bey xan quin pa'atic ca a na'ate'ex ma'alob,

¹⁴bey je'el bix dzo'oc u cáajal a na'atique'ex dze'edzeco', le kiin quéen taalac c Yuumtzil Jesuse' te'exe' cu páajtal a wu'uyique'ex qui'imac óolal t o'olal, je'el bix xan to'on yaan c u'uyic qui'imac óolal ta wéetele'exo'.

¹⁵Tu yo'olal le alab óolala' in tucultmaj in bin táanil in wile'ex, u ti'al in dzáic te'ex qui'imac óolalil in xíimbaltique'ex ca'a téen,

¹⁶tin tucultaj in xíimbaltique'ex le quéen máanaquen u ti'al in binbal Macedonia, cu dzo'ocole' le quéen suunaquene' quin xíimbaltique'ex tu ca'a téen. Beyo' te'exe' cu páajtal a wáantiquene'ex u ti'al in binbal Judea.

¹⁷¿Ma' tu jaajil in wóol wa tin tucultaj in beetic lela'? ¿Ca tucultique'ex wa tene' quin beetic wa ba'ax je'el bix u beetic jun túul yóokolcaabil máac, táanil cu ya'alic bey, cu dzo'ocole' ma'?

¹⁸Ba'ale' c cha'a chi'itic u kaaba' Ku u ti'al c jaajcuntic, to'one' ma' táan c a'alic te'ex táanil bey, cu dzo'ocole' ma'.

¹⁹Tumen Jesucristoe' u Paal Ku, máax tze'ecta'ab te'ex tumen Silvano', Timoteo yéetel tene', mix jun téen tu ya'alaj bey cu dzo'ocole' ma'. Ti' Cristoe' le ma'alob péectzilo' mantadz cu ya'alic bey,

²⁰tumen ti' leti' cu béeychajal tuláacal u dzaa t'aano'ob Ku. Le o'olale' le quéen c qui'iqui' t'aant Kue' c a'alic Amén tu yo'olal Cristo Jesús.

²¹Ku máax beetic ca jéedzeco'on to'on yéetel te'ex ti' Cristo yéetel dzo'oc u yu'ubico'on ti'.

²²Dzo'oc u dzalco'on yéetel dzo'oc u dzáic Quili'ich Pixan ti' c pucsi'ikal je'el bix u chíiculal ti' le ba'ax bíin c kamo'.

²³Tu yo'olal u cuxtal quin ch'a'a chi'itic u kaaba' Ku u ti'al u jaajcuntique' wa ma' xi'iquen Corinto je'el bix in tucultmaje' chéen tu yo'olal in ch'a'a óotzilil ti' te'ex.

²⁴Ma' tumen c káat oques ta wóole'ex yéetel muuk ba'ax unaj a wocsaj óoltique'ex, tumen jéedzel a wanile'ex ti' le ocsaj óolo'; ba'ax cu yúuchule' to'one' c káat áante'ex u ti'al ca yanac te'ex u mas ya'abil qui'imac óolal.