Read Yucateco 2 Corintios 10 Bible Online

2 Corintios 10 - Yucateco bible

2 Corintios 10

¹Teen Pablo, quin káat óoltic te'ex tu yo'olal u muunil yéetel u yutzil u pucsi'ikal Cristo. Cu ya'ala'ale' jach cabal in wóol ca'aliquil ti' yanen ta wéetele'exe', ba'ale' dzíic in t'aan ta wo'olale'ex ca'aliquil náach yanen ti' te'ex.

²Ma'alob, quin káat dzíidzic t'antic le máaxo'ob cu taquico'ob c pool táan u ya'alico'obe' táan c beetic ba'alo'ob chéen tu yo'olal u dzíibolal máaco'ob. Tumen in dzaamaj in wóol in wilquinbáa tu yéetelo'ob.

³Quex tumen lu'umcabilo'one' ma' táan c ba'atel je'el bix u máaquilo'ob le yóokolcaaba'.

⁴Tumen u nu'uculilo'ob c ba'atele' ma' yóokolcaabilo'obi', ba'ale' u nuuquilo'ob c ba'ate'ele' yaan u páajtalil Ku ti'ob u ti'al u xu'ulsico'ob nucuch pakil najo'ob.

⁵Bey túuno', c xu'ulsic le tac poolo'obo' bey xan je'el ba'alac ca líikic yéetel ca'anal ichil u ti'al u wet'ic u kaj óolta'al Kue'. tuláacal lu'umcabil tuucule' c dzáic yáanal u páajtalil u tuucul Cristo, u ti'al u yu'uba'al u t'aan leti',

⁶yéetel c dzaamaj c óol u ti'al c jadzic tuláacal máax ma' tu yu'ubic t'aane', le quéen a wu'uye'ex t'aan jach tu beelil.

⁷Te'exe' ma' ta wilique'ex wa ma' chéen u chica'anil ba'al. Wa yaan máax jach cu yu'ubicubáa u ti'al Cristoe', unaj u tucultique' bey xan to'on u ti'alo'on Cristo.

⁸Tumen quex ca in wa'al jun p'íit asab ti' le unaj tu yo'olal c páajtalile', mina'an u ba'ax o'olalil in ch'a'ic subtal, tumen Yuumtzil dzáa to'on le páajtalila' u ti'al c beetic a ch'íijile'ex ti' a pixane'ex, ma' u ti'al c xu'ulsique'exi'.

⁹Ma' in káat ca chíicpajac bey in káat in ja'as a wóole'ex yéetel le ju'un quin túuxtic te'exa'.

¹⁰Cu ya'ala'ale' le ba'axo'ob quin wa'alic te j ju'uno'ob quin dzíibtico' chichtac yéetel mu'ukantac, ba'ale' tene' mina'an in muuk, yéetel in t'aane' ma' kambe'eni'.

¹¹Ba'ale' le máax cu ya'alic lela' unaj u yojéeltique' bey je'el bixo'on ti' c dzíibo'ob ca'aliquil náach yano'on ti' te'exe' bey xan bíin c béeytal yéetel ba'ax c beetic le quéen yanaco'on ta wéetele'exe'.

¹²Ma' táan u kuchpajal c óol queticbáa wa c béeytal je'el bix dze'edzec máaxo'ob cu qui'iqui' t'anticuba'obo'. Leti'obe' táan u beetico'ob jun p'éel x ma' na'atil ba'al, iquil u p'isicuba'ob yéetel u queticuba'ob tu baatzilo'ob je'el bix u tucultico'obe'.

¹³To'one' ma' tu máantíip'il u ca'analtal c ich, ba'ale' to'one' c p'isicbáa yéetel le p'isib u dzaamaj to'on Kuo' iquil tu beetil c kuchul tac ta wicnale'ex Corinto.

¹⁴Le o'olale' ma' táan c píitmáan ti' le p'isib dza'an to'ono' bey je'el u yúuchul ca'ach wa ma' c antal táanil ta wéetele'exe'. Tumen to'on yáax bis te'ex u ma'alob péectzilil Cristo.

¹⁵Ma' táan u ca'anatal c ich tu yo'olal jun p'éel Meyaj tu beetaj yaanal, bey to'on beetmaile'. Ma' beyi', ba'ale' c p'atic ca páatac c meyaj asab ichile'ex le quéen yanac te'ex asab ocsaj óolale' ba'ale' láili' ichil le p'isib dza'an ti' to'ono'.

¹⁶Cu dzo'ocole' c tuclic c bin u ti'al c tze'ectic le ma'alob péectzilo' ti' le cúuchilo'ob yano'ob mas paachil ti' te'exo', u ti'al ma' u ca'analtal c ich tu yo'olal le meyaj beeta'an tumen yaanalo'.

¹⁷Wa yaan máax cu qui'iqui' t'anticuba'e' u qui'iqui' t'antubáa ti' Yuumtzil.

¹⁸Tumen ma' le máax cu qui'iqui' t'anticubáa tu juunal u yóole' leti' máax kambe'eni', ba'ale' le máax cu qui'iqui' t'anta'al tumen Yuumtzile'.