Read Yucateco 2 Corintios 11 Bible Online

2 Corintios 11 - Yucateco bible

2 Corintios 11

¹¡Quexi' ca páatac a mukyajtique'ex teen jun p'íit x ma' na'atile'! je'el bixaque', mukyajtene'ex.

²Tumen táan in canantique'ex yéetel jun p'éel canan cu taal ti' Ku; tumen dzo'oc in nupique'ex yéetel Cristo, yéetel in káat in taase'ex tu táan bey jun túul sujuy x ch'úupal mix ba'al kascuntmail, cu dzo'ocol u beel chéen yéetel jun túul j xiibe'.

³Ba'ale' je'el bix le caan tu tusaj Eva yéetel u kaakas tuuculo'obo', bey xan sajaquen ca a cha'a a tu'usule'ex yéetel ca tzele'ex a tuucule'ex ti' a kub óolale'ex ti' Cristo, tu'ux mina'an ca'a p'éel ichil mix kaasil.

⁴Tumen te'exe' ca wu'uyique'ex jach ma'alob le máax cu kuchul táan u tze'ectic jun túul Jesús jela'an ti' le c tze'ectic te'exo'. Ca kamique'ex xan jun túul Pixan jela'an ti' le dzo'oc a kamique'exo', bey xan jun p'éel péectzil jela'an ti' le ma'alob péectzil dzo'oc a wocsaj óoltique'exo'.

⁵Quin tucultique' tene' ma' chichanen tu tzéel le nucuch apóstolo'ob ca tzaypachtique'exo'.

⁶Quex istiquiail in t'aane', ma' beyen ti' ba'axo'ob in wojeli'. Lela' dzo'oc c e'esic te'ex mantadz yéetel tuláacal ba'ax dzo'oc c beetic.

⁷¿Tin beetaj wa kaas iquil tin tze'ectajil x ma' bo'olil u ma'alob péectzilil Ku, iquil tin chichancuntinbáa beyo' u ti'al in líiksique'ex te'ex?

⁸Tin kamaj taakin ti' u láak iglesiaob, iquil tu bo'otileno'obe' u ti'al in meyajtique'ex te'ex.

⁹Le ca yanchajen ichile'exe' ma' tin beetaj u xuup mix máac le ca kabéetchaj teen wa ba'axi', tumen le sucu'uno'ob Macedonia u taalo'obo' tu dzajo'ob teen ba'ax tu bineltaj teen. Beyo' tin canantaj ma' in béeytal bey jun p'éel cuuch u ti'al mix máac ichile'exi', bey quin in beet mantadzo'.

¹⁰Jach je'el bix in wojel in kaj óol u jaajil t'aan Cristoe', bey xan in wojel mix máac ti' tuláacal u lu'umilo'ob Acaya cun líiksic teen le qui'imac óolala'.

¹¹¿Ba'axten quin t'aan beyo'? ¿Tumen ma' in yaabilmaje'exi'? Kue' u yojel buca'aj in yaabiltmaje'ex.

¹²Ba'ale' bin in ca'aj in beet mantadz le ba'ax quin beetica', u ti'al c luksic tu'ux u t'aano'ob le máaxo'ob táan u caxtico'ob bix je'el u queticuba'ob t éetele' ti' le meyaj iquil u nojba'alcunsicuba'obo'.

¹³Tumen leti'obe' ma' u jaajil apóstolo'obi', chéen j tuuso'ob, máaxo'ob cu chíicbesicuba'ob bey a apóstolo'ob Cristoe'.

¹⁴Lela' ma' u ti'al jak óolali', tumen Satanase' cu chíicbesicubáa bey jun p'éel u ángel u sáasilile'.

¹⁵Le o'olale' tzaa ca úuchuque' le máaxo'ob cu meyajtico'ob Satanase' cu chíicbesicuba'ob xan bey máaco'ob cu beeticuba'ob ba'al utze'. Ba'ale' leti'obe' yaan u dzo'ocolo'ob je'el bix cu najmatic u meyajo'obe'.

¹⁶Tu ca'a téen quin wa'alic te'ex: mix máac ca u tuculte' wa dzo'oc u chocotal in pool; ba'ale' wa ca tucultique'ex beyo', cha'ex in t'anique'ex bey jun túul máac dzo'oc u chocotal u pool, u ti'al ca páatac u ca'analtal in wich tac teen.

¹⁷Lela' ma' táan in wa'alic tumen Yuumtzil u káat ca in wa'ale', ba'ale' bey jun túul máac dzo'oc u chocotal u poole', iquil tin wa'aljilac u ca'analtal in wich.

¹⁸Bey tumen yaan ya'ab máaco'ob cu ca'analtal u yicho'ob ti' u ba'alilo'ob le yóokolcaaba', bey xan teen bin in ca'aj ca'analtal in wich.

¹⁹Tumen bey te'ex jach yaan a na'ate'exo', ca mukyajtique'ex yéetel ma'alob óolal le máaxo'ob dzo'oc u chocotal u poolo'obo'.

²⁰Tumen te'exe' ca mukyajtique'ex le máax beetic a meyaje'ex quex ma' a káate'exi', wa le máax cu ch'a'ic ba'ax yaan ti' te'exo', wa le máax cu palitziltique'exo' wa le máax cu cúulpachcuntique'exo', wa le máax cu lajique'exo'.

²¹¡Quex sublaquen iquil in wa'alique', to'one' ma' kuchpaj c óol c beet lelo'! Ba'ale' wa u láako'ob cu ca'analtal u yicho'obe', bey xan teen je'el u ca'analtal in wiche', quex táan in wa'alic yéetel choco jo'olal.

²²¿Hebreob leti'ob? Bey xan teen. ¿Ti' u caajal Israel u taalo'ob? Bey xan teen. ¿U ch'i'ilancabilo'ob Abraham? Bey xan teen.

²³¿U palitzilo'ob Cristo? Tene' asab, quex táan in t'aan bey jun túul máac choco u poole'. Tumen dzo'oc in meyaj asab ti' leti'ob, dzo'oc in ka'alal asab ya'ab u téenel, yéetel ya'ab u téenel anaja'anen tu táan quíimil.

²⁴Cinco u téenele' le judíobo' tu jadzeno'ob yéetel treintinueve u puulul jaadz.

²⁵Óox téen u jadzmeno'ob yéetel che', jun téen u ch'i'inch'ineno'ob yéetel tuunich. Óox téen in mukyajmaj u búulul u cheemil tu'ux quin bino', yéetel jun téen in máamsmaj jun p'éel áakab yéetel jun p'éel kiin tu yóokol taamcach ka'anab.

²⁶Ya'ab tu'ux dzo'oc in máan yéetel in wilminbáa ich sajbe'entzil tu'ux cu yáalcab ja'ob, ich sajbe'entzil tu kab j oocolo'ob, ich sajbe'entzil tu kab in wéet caajalo'ob bey xan tu kab táanxel caajilo'ob. In wilminbáa ich sajbe'entzilo'ob ti' caaj, ti' x tocoy lu'um, yéetel ti' ka'anab, yéetel ich sajbe'entzilo'ob tu kab le máaxo'ob ma' u jaajil sucu'uno'obo'.

²⁷Dzo'oc u yantal teen meyajo'ob yéetel talamilo'ob; ya'ab u téenel p'aatalen x ma' wenelil; in mukyajmaj wi'ij yéetel ukaj; in su'ukintmaj ya'ab u téenel; in mukyajmaj yéetel p'aatal mina'an in nook.

²⁸Tu yóokol lelo'oba' yéetel u láak ba'alo'obe', sáamsamal quin wu'uyic u aalil in sen tuucul tu yo'olal tuláacal le iglesiaobo'.

²⁹Wa yaan máax mina'an u muuke', bey teen mina'an in muuke'. Wa cu beeta'al u lúubul wa máaxe', teen quin mukyajtic sublaquil yéetel kuuxil.

³⁰Wa kabéet in nojbe'encunsiquinba'e', quin nojbe'encunsiquinbáa tu yo'olal le ba'alo'ob cu ye'esico'ob mina'an in muuko'.

³¹U Ku yéetel u Taata c Yuumtzil Jesucristo, máax cu najmatic u quili'ichcunta'al mantadze', u yojel táan in wa'alic u jaajil.

³²Le ca j anjien Damascoe', le jalach wíinic cu meyajtic ajaw Aretaso', tu dzaj máaco'ob u ti'al canantic u jool najil le caajo' u ti'al ca u mach u biseno'ob;

³³ba'ale' j dzaaben ti' jun p'éel xaaque' ca jalkesa'aben tu paachil le caajo' ti' jun p'éel u joolil le pako', beyo' j púudzen tu kab.