Read Yucateco 2 Corintios 13 Bible Online

2 Corintios 13 - Yucateco bible

2 Corintios 13

¹Lela' u yóox páac in bin in xíimbalte'exa'. Tuláacal ba'ax yaan u dzo'ocpajal yéetel u t'aan ca'a túul wa óox túul jaajcunajo'ob.

²Ti' le máaxo'ob kebanchajo'ob táanilo' yéetel ti' tuláacale', bejela'a' náach in wanila' quin ca'a a'alic le tzol xiquin tin wa'alaj tin chi'il le ca tin xíimbalte'ex tu ca'a téeno': wa quin bin in xíimbalte'exe' ma' bíin in ch'a'a óotzilil ti' te'exi'.

³Bey túuno' je'el u yantal le chíiculal táan a caxtique'exo' wa tu jaajil Cristo cu t'aan ti' teen. Cristoe' ma' tu táan óoltique'ex yéetel x ma' muukil, ba'ale' cu ye'esic u páajtalil ichile'ex.

⁴Tu jaajile' j si'in ti' Cruz bey máax mina'an u muuke', ba'ale' cuxa'an tu yo'olal u páajtalil Ku. Bey xan to'on c táacpajal ti' u x ma' muukil, ba'ale' tumen nupano'on yéetele' yaan cuxtal tu yo'olal u páajtalil Ku u ti'al ca páatac c meyajtique'ex.

⁵P'is óoltaba'ex tu juunal a wóole'ex, u ti'al ca a wile'ex wa jeedzel a wanile'ex ti' le ocsaj óolalo'; p'is óoltaba'ex. ¿Ma' wa táan a wilique'ex ti' yaan Jesucristo ti' te'exe'? ¿Ja'ali' ma' jóokole'ex ma'alob ti' le p'is óolala'?

⁶Ba'ale' quin pa'atic ca a wile'exe' to'one' ma'alob jóokico'on.

⁷Yéetel c payalchi' ti' Ku u ti'al ma' a beetique'ex mix jun p'éel ba'ax kaas, ma' u ti'al ca ila'ac wa jóoko'on ma'alobi' ba'ale' chéen u ti'al ca a beete'ex ba'ax utz; quex chíicpajac bey kaas jóokico'one'.

⁸Tumen ma' tu páajtal c beetic mix ba'al tu contra le jaajo' ba'ale' chéen tu yo'olal le jaajo'.

⁹Le o'olal cu qui'imactal c óol wa mina'an c muuk, u ti'al ca yanac a muuke'ex te'ex, yéetel c payalchi' mantadz u ti'al ca chuca'an ma'alobchajque'ex.

¹⁰Quin dzíibtic te'ex le ju'una' ma'ili' xi'iquen in wile'exi', beyo' le quéen xi'iquen in wile'exe' ma' u ka'abéetchajal in chichcuntic in páajtalil ta wóokole'ex, páajtalil tu dzaj teen Yuumtzil u ti'al a wutzile'ex, ma' u ti'al a xu'ulsa'ale'exi'.

¹¹Bele', sucu'une'ex ca xi'ic te'ex utzil. Caxte'ex a chuca'an ma'alobtale'ex ta cuxtale'ex, yanac te'ex qui'imac óolal, cuxlene'ex ichil jun p'éelili' óolal yéetel jéedzel óolal. U Kuil yaacunaj yéetel jéedzel óolale' bíin yanac ta wéetele'ex.

¹²Tziiquil t'antaba'ex ta baatzile'ex yéetel jun p'éel quili'ich dzu'udz.

¹³Tuláacal le sucu'uno'ob ti' le ocsaj óolalo' cu túuxtico'ob te'ex tziiquil t'aano'ob.

¹⁴U siibal Yuumtzil Jesucristo, u yaacunaj Junab Ku yéetel u nup óolal Quili'ich Pixane' ca yanac ta wéetele'ex tuláacale'ex. Amén.