Read Yucateco 2 Corintios 2 Bible Online

2 Corintios 2 - Yucateco bible

2 Corintios 2

¹Le o'olal tin tucultaj ma' in xíimbaltique'ex tu ca'a téen yéetel yaayaj óolal.

²Tumen wa teen quin beetic u yajtal a wóole'exe', ¿máax túun cun beetic u qui'imactal a wóol? Chéen te'ex máaxe'ex dzo'oc in beetic u yajtal a wóole'ex.

³Le o'olale' j dzíibnajen te'ex le je'el bix tin beetilaco', tumen unaj a dzáique'ex teen qui'imac óolal. Tumen jach in wojel le quéen in wu'uyinbáa qui'imac in wóole' tuláacale'ex can a wu'uyaba'ex qui'imac a wóole'ex xan.

⁴Tumen le ca tin dzíibtaj le ju'un tin túuxtaj te'exo', tin dzíibtaj yéetel u ja'il in wich, tumen tin wu'uyjinbáa jach okom yéetel jach yaj in wóol; ba'ale' ma' tin dzíibtaj u ti'al in dzáic te'ex yaayaj óolalo', ba'ale' u ti'al ca a wojéelte'exe' in yaacunaj ti' te'exe' jach nojoch.

⁵Ba'ale' wa yaan máax dzo'oc u dzáic yaj óolale', ma' ti' teen u dzaamai' ba'ale' quin tucultique' ti' te'ex tuláacalile'ex, wa ma' máan tip'a'an ba'ax quin wa'aliqui'.

⁶Le jaadz j dzaab ti' le máac tumen u asab ya'abil ichile'exo' ti'ibil yéetel lelo'.

⁷Bejla'e, ba'ax unaj a beetique'exe' a sa'atsique'ex yéetel a qui'imaccuntique'ex u yóol tu yo'olal ya'abcach yaayaj óolal.

⁸Le o'olale' quin káat óoltic ti' te'exe' ca a we'ese'ex tu ca'a téen ti'e' le yaacunaj yaan te'ex ti'o'.

⁹Dzíibnajen táanil tu yóokol lela', chéen u ti'al ca in wil wa je'el a beetique'ex tu tuláacal ba'ax quin wa'alic ti' te'exe'.

¹⁰Bejla'e túuna', le máax ti' ca sa'atsique'ex wa ba'axe', tac teen quin sa'atesic ti'. Tumen le ba'ax in sa'atsmaje' tin sa'atsaj ta wo'o'lale'ex tu táan Cristo,

¹¹u ti'al ma' tu'usul tumen Satanás, tumen ma'alob c kaj óolmail u kaakas tuuculo'ob.

¹²Le ca j kuchen Troas u ti'al in tze'ectic u ma'alob péectzil Cristoe', je'ekabchaj teen jun p'éel jool naj u ti'al in meyaj tu yo'olal Yuumtzil.

¹³Ba'ale' in pucsi'ikale' ma' jeedzel u yóoli' tumen ma' tin wilaj c sucu'un Titoi'. Le o'olale', tin wa'alaj ti'ob: Táan in bine'. Ca j binen tu lu'umil Macedonia.

¹⁴Ba'ale' nib óolal ti' Ku, máax mantadz cu beetic c dzáancha'atic le kaaso' tu yo'olal Cristo Jesús, yéetel t o'olale' cu dzáic ojéeltbil u ma'alob péectzilil, bey je'el bix jun p'éel ba'al jach qui'iboc cu t'i'it'pajal tuláacal tu'uxe'.

¹⁵Tumen u ti'al Kue' to'on u qui'iboquil Cristo yéetel cu t'i'it'pajal ti' le to'oclo'obo' bey xan ti' le cu sa'atalo'obo'.

¹⁶U ti'al le máaxo'ob cu sa'atalo'obo', le qui'iboca' bey jun p'éel booc cu quiimsaje', ba'ale' u ti'al le máaxo'ob cu to'oclo'obo', bey jun p'éel booc cu dzáic cuxtal ti'obe' ¿Máax túun jach ma'alob u ti'al lela'?

¹⁷Tu jaajile' to'one' ma' beyo'on le ya'ab máaco'ob cu conico'ob u t'aan Kuo'; ba'ale' tu yo'olal Cristoe' c t'aan yéetel jaaj óolal tu táan Ku, je'el bix máaxo'ob túuxta'ano'ob tumen Kue'.