Read Yucateco 2 Corintios 3 Bible Online

2 Corintios 3 - Yucateco bible

2 Corintios 3

¹Tumen c a'alic lela' ¿ca tucultique'ex wa táan c cáajsic c t'aan ma'alob t o'olal? ¿Wa kabéet c e'esic te'ex ju'uno'ob tu'ux dzíiba'an máaxo'oni', wa kabéet c káatic te'ex ca dza'ex to'on ju'uno'ob tu'ux dzíiba'an máaxo'oni', je'el bix u beetic dze'edzec máaco'obe'?

²Ma', tumen te'ex le ju'uno'ob tu'ux dzíiba'an máaxo'ono', chéen le kabéet to'ono'; te'exe' beye'ex jun p'éel ju'un dzíiba'an ti' c pucsi'ikale', tuláacal máac cu páajtal u kaj óoltic yéetel cu xoquic.

³Te'exe' jun p'éel ju'un dzíiba'an tumen Cristo yéetel to'on kubic. Te'exe' jun p'éel ju'un ma' dzíiba'an yéetel tintai', ba'ale' yéetel u Quili'ich Pixan le cuxa'an Kuo'; jun p'éel ma' dzíiba'an ti' jaajay tuunichi', ba'ale' tu pucsi'ikal máaco'ob.

⁴Lela' leti' le alab óolal yaan to'on tu táan Ku tu yo'olal Cristo.

⁵Ma' tumen wa to'on c beetic wa ba'ax tu juunal c óoli'; tumen tuláacal ba'ax c beetique' ti' Ku u taal.

⁶Tumen leti' tu dzaj to'on u páajtalil c meyajtic yáanal jun p'éel túumben nup t'aan, ma' tu yo'olal wa ba'ax dzíiba'ani', ba'ale' tu yo'olal jun p'éel cuxtal kama'an ti' quili'ich Pixan. Le a'almaj t'aan dzíiba'ano' cu xot kinaj u ti'al quíimil, ba'ale' le Quili'ich Pixano' cu dzáic cuxtal.

⁷Le u ya'almaj t'aan Moisesa' dzíibta'an ti' jaajay tuunich yéetel j taal ichil jun p'éel nojoch sáasilil; le o'olale' le j israelitaobo' ma' páatji u pactico'ob u yich Moisesi', tumen u yiche' jach sáasjome'enchaji. Ba'ale' le u sáas jome'enilo' cu bin u tu'upul. Bey túuno' wa j taal yéetel nojoch qui'ichquelemil le a'almaj t'aan cu xot kinaj u ti'al quíimilo',

⁸¡buca'aj u asab nojochil u qui'ichquelemil le ma'alob péectzil cu taasic to'on Quili'ich Pixano'!

⁹U káat u ya'ale', wa le a'almaj t'aan meyajnaj u ti'al u xot kinto'on jach qui'ichquelemo', ¡buca'aj u asab qui'ichquelemil le ma'alob péectzil iquil u ya'alic Ku: Mina'an to'on si'ipilo'!

¹⁰Tumen le a'almaj t'aan qui'ichquelem ca'acho' mix ba'al bejela'e' tu tzéel u qui'ichquelemil lela'.

¹¹Bey túuno' wa qui'ichquelem le xáanchaj chéen dze'edzec kiino'obo', mas nojoch u qui'ichquelemil le cu xáantal tu yo'olal kiino'ob mina'an u xuulo'.

¹²Yaan to'on le alab óolala', c t'aan yéetel tuláacal c óol.

¹³Ma' táan c beetic je'el bix Moisese', tumen leti'e' tu pixaj u yich yéetel jun p'éel nook, u ti'al ma' u yila'al tumen le israelitaobo' u tu'upul le sáasilil cu xu'ululo'.

¹⁴Ba'ale' leti'obe' ma' tu na'atico'ob. Tumen bejela'e' le quéen xo'ococ le úuchben nup t'aano', le nooko' ma' tu cha'ic u na'atico'ob, tumen le nooko' ma' luksa'an ti'obi', tumen lelo' chéen cu lukul le quéen nu'upuc máac yéetel Cristo.

¹⁵Tac bejela'e' le quéen u xo'ococ u dzíib Moisese', jun p'éel nook pixic u na'ato'ob.

¹⁶Ba'ale' le quéen súutkajac u yóol jun túul máac ti' Yuumtzile', le nooko' cu lukul ti'.

¹⁷Yuumtzile' leti' le Quili'ich Pixano', yéetel je'el tu'uxac ca yanac u quili'ich Pixan Yuumtzile', te'elo' yaan jáalkabil.

¹⁸Le o'olale' tuláacalo'on, tumen ma' pixa'an u táan c ich yéetel jun p'éel nooke', beyo'on jun p'éel néen cu ye'esic u qui'ichquelemil Yuumtzile'; bey túuno' to'one' táan c jelbesa'al u ti'al c béeytal asab je'el bix Cristoe', tumen u qui'ichquelemile' táan u yantal asab ti' to'on. Lela' Yuumtzil máax beetic tumen leti'e' Quili'ich Pixan.