Read Yucateco 2 Corintios 5 Bible Online

2 Corintios 5 - Yucateco bible

2 Corintios 5

¹C ojel túun, wa cu xu'ulsa'al c wíinclil, bey jun p'éel naj ma' tu xáantale', ti' Kue' yaan to'on jun p'éel naj ma' tu xu'ulul te j ca'ano', jun p'éel naj ma' beeta'an tumen máaco'obi'.

²Tu jaajil ca'aliquil cuxa'ano'on ti' le wíinclila' táan c yaayantic c cuxtal ti' le c otoch yaan te j ca'ano',

³ba'ax bíin u búucbeso'on u ti'al ma' u cuxtal x ma' nookil.

⁴Ca'aliquil cuxa'ano'on ti' le naj leti' le c wíinclila', táan c yaayan yéetel c u'uyic yaan to'on yaayaj óolalo'ob. Ma' tumen c káat ca pi'itic to'on le úuchben wíinclila', ba'ax c káate' ca u búucbeso'on yéetel le túumben wíinclilo', u ti'al ca sa'atac le ba'ax quimbe'eno' ichil le túumben cuxtalo'.

⁵Ku máax u nu'uctmajo'on u ti'al lela', yéetel u dzaamaj ti' to'on le Quili'ich Pixano' bey jun p'éel chíiculal ti' le ba'ax yaan c kamico'.

⁶Bey túuno' mantadz yaan to'on alab óolal. C ojel ca'aliquil cuxa'ano'on ti' le wíinclila', ma' tu yicnal Yuumtzil Yano'oni';

⁷yéetel táan c xíimbal tu yo'olal ocsaj óolal, ma' tu yo'olal ba'ax c iliqui'.

⁸Ba'ale' yaan to'on alab óolal, yéetel c káat ca jáawac c cuxtal tu yicnal Yuumtzil.

⁹Le ti' le wíinclila', u ti'al ca xi'ico'on cuxtal tu yicnal Yuumtzil.

¹⁰Tumen tuláacalo'one'ex yaan c antal tu táan u tribunal Cristo, u ti'al ca u kam cada jun túul ba'ax cu najmatic, je'el bix le utz wa le kaas tu beetaj ca'aliquil ti' yaan ti' le wíinclila'.

¹¹Le o'olale', tumen c kaj óol u quili'ich sajaquilil Yuumtzile' táan c ilic sáasilcuntic u na'at máaco'ob. Ba'ale' Kue' u yojel ba'axo'oni', quin p'atic xane' ca a p'ate'ex tac te'ex.

¹²Ma' táan c t'aan ma'alob tu ca'a téen t o'olali' ba'ale' táan c dzáic te'ex tu'ux u qui'imactal a wóole'ex t o'olal, u ti'al ca páatac a núuquique'ex u t'aan le máaxo'ob cu ca'analtal u yicho'ob tu yo'olal ba'ax cu yila'al tu yóokcabil máac, ma' ti' le ba'ax yaan ti' le pucsi'ikalo'.

¹³Tumen wa dzo'oc u sa'atal c óole' tu yo'olal Ku; ba'ale' wa t óol yano'one' ta wo'olale'ex.

¹⁴U yaacunaj Cristo cu beetic c tuclic lela': wa jun túul máac quíim tu yo'olal tuláacale', bey túuno' tuláacal quimeno'ob.

¹⁵Cristoe' j quíim tu yo'olal tuláacal, u ti'al beyo' le máaxo'ob cuxa'ano'obo' ma' u cuxtalo'ob chéen u ti'al leti'ob, ba'ale' ca cuxlaco'ob tu yo'olal leti', máax quíim yéetel ca'a púut cuxlaj tu yo'olalo'ob.

¹⁶Bele' ma' t tuucul tu yo'olal mix máac je'el bix u tuucul jun túul lu'umcabil máaque' tumen quex tuuculnajo'on ca'ach tu yo'olal Cristo je'el bix u tuucul jun túul lu'umcabil máaque', bele' ma' bey c tuucul tu yo'olali'.

¹⁷Bey túuno' le máax u nupmubáa yéetel Cristoe' jun túul túumben máac, le úuchben ba'alo'obo' láaj xu'ulo'ob, láaj túumbeno'ob.

¹⁸Tuláacal lela' Ku beetic, máax tu beetajo'on c bisicbáa tu yéetel tu yo'olal Cristo ca tu kubentaj to'on u meeyjul le ca'a bisajbaila'.

¹⁹U káat u ya'ale', Kue' táan u beetic u ca'a biscubáa tuláacal yóokolcaab tu yéetele' tu yo'olal Cristo, ma' táan u beetic u cuentail u keban máaco'ob; ti' to'on túune' tu kubentaj ca c dzáa ojéeltbil u ma'alob péectzil le ca'a bisajbáila'.

²⁰Bey túuno' to'one' túuchi' ta'ano'on tu kaaba' Cristo, bey Ku cu káat óolal yéetel c chi'e'; c káat óoltic te'ex tu kaaba' Cristo: Bisaba'ex tu ca'a téen yéetel Ku.

²¹Cristoe' ma' tu beetaj mix jun p'éel kebani', ba'ale' t o'olale' j beeta'ab kebanil tumen Ku, u ti'al beyo' to'one' le quéen c nupbáa yéetele' ca yanac to'on le toj cuxtal u káat Ku ca yanac to'ono'.