Read Yucateco 2 Corintios 6 Bible Online

2 Corintios 6 - Yucateco bible

2 Corintios 6

¹Bey túuno', je'el bix éet meyajo'ob ti' u meeyjul Kue', c káat óoltic te'ex ma' a máan óoltique'ex le u siibal Ku dzo'oc u ye'esic te'exo'.

²Tumen leti'e' cu ya'alic te j Quili'ich Dzíibo': Ti' ma'alob kiin tin wu'uyajech, ti' u kiinil tocsajil tin wáantech. Bejela'e' leti' le jach ma'alob kiino', bejela'e' leti' u kiinil tocsajil.

³Ma' táan c dzáic mix tu'ux u t'óochpajal mix máac, u ti'al ma' u p'a'asta'al c meyaj.

⁴Ba'ale' c káat c e'es ti' je'el ba'alaque' to'one' u palitzilo'on Ku, iquil c mukyajtic yéetel chuca'an óolale' yaayaj óolalo'ob, óotzilo'ob yéetel talam ba'alo'ob.

⁵Tumen dzo'oc c ja'adzal yéetel c ka'alal; dzo'oc c mukyajtic wo'och'táanbáilo'ob yéetel mukul muuk meyajo'ob, j p'áato'on x ma' wenelil bey xan x ma' janlil.

⁶C e'esic xan yéetel toj cuxtal, yéetel kaj óolalil yéetel c chuca'an óolal, yéetel u yutzil pucsi'ikal, bey xan iquil u yanil Quili'ich Pixan ti' to'on, bey xan iquil c yaacunaj tu jaajil c óol,

⁷iquil c dzáic u ma'alob péectzilil le jaajo', tu yo'olal xan yanil u páajtalil Ku ti' to'on. Cu meyaj ti' to'on le toj cuxtalo' je'el bix u nu'uculilo'ob ba'atel ti' c x no'oj bey xan ti' c x dzíic kabil.

⁸Yaan kiine' c kamic tziiquilo'ob, yaan kiine' pooch'ilo'ob, yaan kiine' cu yúuchul t'aan ma'alob t o'olal, yaan kiine' kaas. Yaan kiine' cu tuculta'al chéen j tu'uso'on, yaan kiine' beyo'on máaco'ob cu ya'alico'ob u jaajile'.

⁹Yaan kiine' cu beeta'al bey ma' kaj óola'ano'oni', yaan kiine' bey jach kaj óola'ano'one'; yaan kiine' c xíimbal tu táan quíimil, ba'ale' láili' cuxa'ano'one'; jadza'ano'on, ba'ale' ma' quiimsa'ano'oni'.

¹⁰Quex yaj c óole', mantadz qui'imac c óol; quex óotzilo'one', c ayikalcuntic ya'ab máaco'ob; quex mina'an to'on mix ba'ale' to'on u yuumil tuláacal.

¹¹Corintioil sucu'une'ex, dzo'oc c t'anique'ex tu jaajil c óol dzo'oc c je'ic te'ex tuláacal c pucsi'ikal.

¹²Mix ba'al c ta'acmaj ti' te'ex, te'ex yaan ba'al a ta'acmaje'ex to'on.

¹³Quin káat óoltic te'ex, je'el bix jun túul taatatzil cu káat óoltic ti' u paalalo'obe', ca a je'ex to'on a pucsi'ikale'ex tu jaajil a wóole'ex je'el bix to'on t je'aj ti' te'exo'.

¹⁴Ma' a nupcaba'ex yéetel máaxo'ob ma' tu yocsaj óolo'obo'. Tumen ¿ba'ax yaan u yila'al ba'ax toj yéetel ba'ax kaas? ¿Wa bix je'el u páajtal u bisicubáa le sáasilo' yéetel le éekjoch'e'enilo'?

¹⁵¿Bix je'el u páajtal u yantal queet tuucul ti' Cristo yéetel Satanase'? ¿Wa bix je'el u páajtal u yantal jun túul ocsaj óol yéetel jun túul mina'an ocsaj óol ti'e'?

¹⁶¿Je'el wa u páajtal u yantal ba'al u yil u templo Ku yéetel le beetbil kuo'obo'? Tumen te'exe' u templo le cuxa'an Kuo', je'el bix tu ya'alaj Kue': Bíin cajlaquen yéetel bíin xíimbalnaquen ichilo'ob; teen bíin u Kuinto'ob, leti'obe' bíin in caajilto'ob.

¹⁷Le o'olale' Yuumtzile' cu ya'alic: Jóokene'ex ichilo'ob yéetel tzelaba'exi'; ma' a machique'ex ba'al kaas, bey túuno' tene' je'el in kamique'exe'

¹⁸yéetel bíin in beet in taatail ti' te'ex, yéetel te'exe' bíin a beetaba'ex in j xibil paalal, cu ya'alic le Yuumtzil le yaan tuláacal páajtalil ti'o'.