Read Yucateco 2 Corintios 8 Bible Online

2 Corintios 8 - Yucateco bible

2 Corintios 8

¹Bele', sucu'une'ex, c káat tzicbal ti' te'exe' bix dzo'oc u ye'esicubáa u siibal utzil Ku ti' u iglesiailo'ob u lu'umil Macedonia.

²Quex tumen le ba'alo'ob talamtac úuch ti'ob tu taasaj jun p'éel nojoch túuntaj óolal ti'obe', jach qui'imac u yóolo'ob, cu dzo'ocole' quex tumen jach táaj óotzilo'obe' tu dzajo'ob u siibalo'ob yéetel qui' óolal bey ayikalo'obe'.

³Teen jaacuntic, tu jaajil u yóolo'obe', tu dzajo'ob je'el bix cu páajtalo'obe'.

⁴Tu jach kaj óolto'ob to'on ca c ch'a'a u yáantajo'ob u ti'al le sucu'uno'obo'.

⁵Tu beetajo'ob u asabil ti' le c p'atic u beetico'obo', tumen tu kubjuba'ob táanile' ti' Yuumtzil, cu dzo'ocole' ti' to'on, je'el bix u káat Kue'.

⁶Bey túuno' dzo'oc c káat óoltic ti' Tito ca u dzo'oques ichile'ex xane' le utzil meyaja' je'el bix cáajic u beetico'.

⁷Tumen te'exe' ca máantíip'ile'ex ti' tuláacal ocsaj óolal, ti' ca'ansaj ti' kaj óolalil, ti' líiksaj óolal yéetel ti' yaacunaj ti' to'on; le o'olale' unaj a máan tíip'ile'ex xan ti' le utzil meyaja'.

⁸Ma' táan in wa'alic te'ex lela' bey jun p'éel a'almaj t'aane'; chéen in káat ca a káaj óolte'ex u nojoch óolal u láako'ob u ti'al ca ila'ac wa jaaj yaan a yaacunaje'ex.

⁹Tumen te'exe' dzo'oc a kaj óoltique'ex u siibal c Yuumtzil Jesucristo. Leti'e' ayikal ca'achi, ba'ale' tu yóotzilcuntubáa tu yo'olal u yaacunaj ti' te'ex, u ti'al ca ayikalchajque'ex tu yo'olal u yóotzilil leti'.

¹⁰U ti'al a wutzile'exe' quin wa'alic ba'ax quin tucultic tu yóokol le ba'alo'oba'. Te'exe' chu'unpaje'ex le ja'ab máano', ma' chéen u ti'al a beetique'ex wa ba'ax tu yo'olal lela', ba'ale' u ti'al a beetique'ex yéetel nojoch óolal.

¹¹Bele' túuna' xeene'ex táanil u ti'al a dzo'ocbesique'ex, yéetel le nojoch óolal yaan ti' te'ex tu yáax chuuno', u ti'al a dzáique'ex a siibale'ex le buca'aj ca páajtale'exe'.

¹²Tumen wa jun túul máac tu jaajil u káat u dzáa wa ba'axe' Kue' cu kamic le ba'ax yaan ti' le máaco', leti'e' ma' táan u káatic le ba'ax mina'an ti' le máaco'.

¹³Ma' u káat u ya'ale' ca a máanse'ex óotzililo'ob tu yo'olal a wáantique'ex u láako'ob;

¹⁴ba'ax u káat u ya'ale' ca a queet áantaba'ex. Bele' ti' te'exe' yaan le ba'ax cu bineltic ti' leti'ob; ti' u láak kiine' leti'obe' bíin yanac le ba'ax cu bineltic ti' te'exo'. Beyo' ca queet áanticaba'ex,

¹⁵je'el bix cu ya'alic le Quili'ich Dzíibo': Le máax tu molaj ya'abe', ma' tip'chaj ti'; le máax tu molaj jun p'íite' ma' tu bineltaj tii'.

¹⁶Nib óolal ti' Ku, tumen tu dzaj tu pucsi'ikal Titoe' le sen tuucul je'el bix le yaan ti' teen ta wo'olale'exo'.

¹⁷Tumen tu kamaj in kuben t'aan, yéetel jach u dzaamaj u yóol u yáantique'exe', le o'olale' bele' tu juunaj u yóol cu bin u yile'ex.

¹⁸Táan c túuxtic yéetel Titoe' jun túul sucu'un tu yo'olal máax jach ma'alob u yúuchul t'aan ti' tuláacal le iglesiaobo' tu yo'olal u meyaj ti' u ma'alob péectzilil tocsajil.

¹⁹Ma' chéen lela', ba'ale' ti' le iglesiaobo' tu yéeyajo'ob le sucu'una' u ti'al u máan t éetel, yéetel u ti'al u yáanto'on ti' le utzil meyaja' jun p'éel meyaj c beetic u ti'al c nojbe'encuntic Yuumtzil yéetel u ti'al c e'esic c nojoch óolal.

²⁰Ba'ax c káate' ca a wet' u ya'ala'al to'on ba'al tu yo'olal le ya'abcach siibalo'ob cu máano'ob t c kabo'.

²¹Tumen táan c ilic c beetic toj tuláacal ba'al, ma' chéen tu táan Yuumtzilil' ba'ale' tac tu táan máaco'ob.

²²Táan c túuxtic tu yéetelo'obe' u láak ti' c sucu'uno'ob, máax dzo'oc u ye'esic to'on u nojoch óolal ya'ab u téenel, yéetel u asab ya'abil cu ye'esic bele' tu yo'olal le nojoch alab óolal u dzaamaj ti' te'exo'.

²³Tu yo'olal Titoe', quin wa'alique' leti'e' in wéet meyaj u ti'al c meyajte'ex. Le u láak sucu'uno'obo' túuxta'abo'ob tumen le iglesiaobo', yéetel táan u nojbe'encuntico'ob Cristo.

²⁴Le o'olale', u ti'al ca u yojéelto'ob le iglesiaobo', e'ese'ex ti'obe' jach tu jaajil u yaabiltmaje'exo'ob, yéetel ma'alob ba'ax c beetic iquil u qui'imactal c óol ta wo'olale'ex.