Read Yucateco 2 Corintios 9 Bible Online

2 Corintios 9 - Yucateco bible

2 Corintios 9

¹Tu yo'olal le siibalo'ob u ti'al le sucu'uno'ob ti' le ocsaj óolo', tu jaajile' ma' kabéet in dzíibtic ti' te'exi'

²tumen dzo'oc in káaj óoltic a ma'alob óolale'ex. Mantadz quin wa'al ti'o ti' le Macedoniailo'obo' te'ex acayaile'exe' dzo'oc u máan jun p'éel ja'ab a dzáa a wóole'ex u ti'al áantaj; u asab ya'abil ti' le Macedoniailo'obo' dzo'oc u líikil u yóolo'ob tu yo'olal lika'an a wóole'ex te'ex.

³Quex bey túuno', táan in túuxtic le sucu'uno'oba' u ti'al ma' u jóokol u tuusil le ba'ax ma'alob dzo'oc in wa'alic ta wo'olale'ex tu yóokol le ba'ala'. U káat u ya'ale', u ti'al ca a nu'uctaba'ex tu jaajil, je'el bix dzo'oc in wa'alico';

⁴bic úuchuc ca taalac dze'edzec Macedoniailo'ob tin wéetele' ca u yilo'obe' ma' a nu'uctaba'exi'. Lelo' je'el u beetic c sublactale' cu dzo'ocol u yantal nojoch alab óolal ti' te'ex, u ti'al ma' c a'alic le sublaquil cun yantal ti' te'exo'.

⁵Tu yo'olal lela' tin tucultaj kabéet in kaj óoltic ti' le sucu'uno'oba' ca xi'ico'ob u xíimbalte'exo'ob táanil, yéetel ca u yáante'exo'ob u ti'al a chúucbesique'ex le siibalo'ob ta wa'alaje'ex a dzáique'exo'. Beyo' a siibale'exe' yaan u nu'ucta'al bey jun p'éel u chíiculal a yaacunaje'exe', ma' bey je'el bix jun p'éel ba'al táan c dzáic ti' te'exe'.

⁶Ka'ajac te'ex lela': Le máax cu pakal jun p'íite' jun p'íit xan bíin u joche; le máax cu pakal ya'abe', ya'ab xan bíin u joche.

⁷Cada jun túule' unaj u dzáic je'el bix u tucultmaj tu pucsi'ikale', ma' yéetel x ma' óoli', mix tumen táan u tza'abal tii', tumen Kue' u yaabilmaj le máax cu dzáa yéetel qui'imac óolale'.

⁸Kue' cu páajtal u dzáic te'ex ya'ab ti' tuláacal u jejeláasil u yutzil siibalo'ob, beyo' ca yanac te'ex tuláacal ba'ax kabéet te'ex, cu dzo'ocole' ca yanac te'ex xane' ya'abcach ba'al u ti'al a wáantaje'ex ti' tuláacal u jejeláasil ma'alob meyajo'ob.

⁹Le Quili'ich Dzíibo' cu ya'alic: Dzo'oc u dzáic yéetel u yutzil u pucsi'ikal ti' le óotzilo'obo', u ma'alob meyajo'obe' cu p'áatalo'ob u ti'al kiino'ob mina'an u xuul.

¹⁰Ku, máax cu dzáic le semilla u ti'al pakbilo', yéetel le waaj u ti'al jaantbilo', bíin u dzáa te'exe' tuláacal ba'ax kabéet u ti'al a pakale'ex, yéetel yaan u beetic u ch'íijil yéetel u ya'abtal u yich a ma'alob meyaje'ex.

¹¹Beyo' te'exe' yaan u yantal te'ex tuláacal jejeláas ayikalil u ti'al ca páatac a dzáique'ex yéetel tuláacal a pucsi'ikale'ex. Beyo' t o'olale', le siibal can a túuxte'exo' yaan u beetic u dza'abal nib óolal ti' Ku.

¹²Tumen le quéen a dzáa le áantaj ti' le sucu'uno'obo', ma' chéen táan a dzáic jun p'éel ba'al kabéet ti'obi', ba'ale' táan c beetic u dzáico'ob ya'abcach nib óolal ti' Ku.

¹³Leti'obe' bíin u ca'a qui'iqui' t'anto'ob Ku, tumen le ántaja' cu ye'esic ti'ob bix a wu'uyique'ex u t'aan u ma'alob péectzil Cristo. Bey xan leti'obe' yaan u tziquico'ob Ku tu yo'olal le siibal ca dzáique'ex yéetel tuláacal a pucsi'ikale'exo' u ti'al leti'ob yéetel u ti'al tuláacal.

¹⁴Leti'ob xane' yaan u payalchi'ob ta wo'olale'ex, yéetel yaan u yaabiltique'exo'ob tu yo'olal le nojoch siibal utzil dzo'oc u wequic Ku ta wóokole'exo'.

¹⁵¡Nib óolal ti' Junab Ku, tumen dzo'oc u dzáic to'on jun p'éel nojoch siibal ma' tu páajtal c tzolic!