Read Yucateco Gálatas 3 Bible Online

Gálatas 3 - Yucateco bible

Gálatas 3

¹¡Galaciaile'ex, jach ma' na'ate'ex! ¿Máax sat a na'ate'ex u ti'al ma' a wu'uyique'ex u t'aan u ma'alob péectzilil le jaajo'? Ichil c tze'eque' tu táan a wiche'ex dzo'oc c tze'ectic Jesucristo sina'an ti' cruz.

²A'ale'ex túun teen lela': ¿Ta kamaje'ex wa u quili'ich Pixan Ku tumen ta beetile'ex ba'ax cu ya'alic u ya'almaj t'aan Moisés, wa tumen ta wocsaj óoltile'ex ba'ax ta wu'uyaje'ex?

³¿Bix u yúuchul u jach mina'antal a na'ate'ex? ¿Ca tucultique'ex wa a chúucbesique'ex yéetel a muuke'ex le ba'ax ta cáajsaje'ex yéetel Quili'ich Pixano?

⁴¿Mix ba'al u biilal te'ex tuláacal ba'ax dzo'oc a mukyajtique'ex? ¡Quexi' ca yanac u biilal a ti'al te'ex!

⁵Le quéen u dzáa Ku u Quili'ich Pixan ti' te'exe' wa le quéen u beet u chíiculalo'ob ichile'exe' ¿Ba'ax teen cu beetic? Ma' tu beetic tumen táan a beetique'ex ba'ax cu ya'alic le a'almaj t'aano', ba'ale' tumen ca wocsaj óoltique'ex ba'ax dzo'oc a wu'uyique'ex.

⁶Abrahame' tu yocsaj óoltaj Ku, tu yo'olal u yocsaj óolale' Kue' tu kamaj je'el bix jun túul máac mina'an u si'ipile'.

⁷Le o'olale', te'exe' unaj a wojéeltique'exe' máaxo'ob yaan ocsaj óolal ti'obe' leti'ob jach tu jaajil u ch'i'ilancabilo'ob Abraham.

⁸Le quili'ich Dzíibo', tumen tu yilaj, ma'ili' úuchuque', tac ichil le ma' judíobe' Kue' yaan u dzáico'ob ma'alobil tu táane' le máaxo'ob yaan ocsaj óolal ti'obe', tu dzaj u yojéelt Abraham, ma'ali' úuchuque', le ma'alob péectzila': Tuláacal caajo'ob yaan u qui'iqui' t'anta'alo'ob ti' teech.

⁹Bey túuno', le máaxo'ob cu yocsaj óolo'obo', leti'ob cu qui'iqui' t'anta'alo'ob jun múuch' yéetel Abraham máax ocsaj óolnaji.

¹⁰Le máaxo'ob cu alab óoltico'ob u dzo'ocbesico'ob u ya'almaj t'aan Moisese' ti' yano'ob tu yáanal loolob t'aane'. Tumen le Quili'ich Dzíibo' cu ya'alic: Tuláacal le máaxo'ob ma' tu dzo'ocbesico'ob mantadz tuláacal ba'ax dzíiba'an ti' le a'almaj t'aano', ti' yano'ob tu yáanal loolob t'aane'.

¹¹cu yutzil na'ata'al túune' mix máac cu dza'abal ma'alobil tu táan Ku chéen tumen cu beetic le ba'ax cu ya'alic le a'almaj t'aano'; tumen le Quili'ich Dzíibo' cu ya'alic: Le máax dza'an ma'alobil tu táan Kue' bíin cuxlac tu yo'olal le ocsaj óolalo'.

¹²U ya'almaj t'aan Moisese' mix ba'al yaan u yil yéetel le ocsaj óolalo' tumen cu ya'alic: Le máax cu dzo'ocbesic le ba'alo'oba', bíin cuxlac tu yo'olalo'ob.

¹³Cristoe' tu toco'on ti' u loolob t'aanil le a'almaj t'aano', tumen leti'e' loolob t'anta'ab t o'olal, tumen le Quili'ich Dzíibo' cu ya'alic: loolob t'anta'an tuláacal máax cu si'inil ti' che'.

¹⁴Lela' j úuche' u ti'al ca dza'abac yo'olal Cristo Jesuse' ti' le máaxo'ob ma' judíobo' le qui'iqui' t'aan tu ya'alaj Ku ti' Abrahamo' u ti'al ca c kam xan, tu yo'olal le ocsaj óolalo', le Quili'ich Pixan u ya'almaj Ku u dzáico'.

¹⁵Sucu'une'ex, quin dzáic ta táane'ex jun p'éel queet t'aan ch'a'an ti' u cuxtal máaco'ob: Le quéen u dzáa u t'aan jun túul máac u ti'al u beetic wa ba'axe' cu dzo'ocole' cu dzíibtic u kaaba'e', mix máac cu páajtal u mix ba'alcuntic wa u dzáic u láak ba'ali'.

¹⁶Beora' túuna' Kue' tu dzaj u t'aano'ob ti' Abraham yéetel ti' u ch'i'ibal. Le Quili'ich Dzíibo' ma' tu ya'alic: Ch'i'ibalo'ob; u ti'al ca u dzáa na'atbil wa ya'ab máaco'ob, ba'ale' cu ya'alic: yéetel ti' a ch'i'ibal; Lela' u káat u ya'ale' chéen jun túulili', leti' le Cristo.

¹⁷Ba'ax quin wa'alique' leti' lela'; Kue' tu beetaj jun p'éel nup t'aan yéetel Abraham ca tu jaajcuntaj. Le o'olale' u ya'almaj t'aan Moisés taal cuatrocientos treinta ja'abo'ob cu dzo'ocol u beeta'al le nup t'aano', ma' tu páajtal u mixba'alcuntic mix u p'atic mina'an u tojol u dzaa t'aan Ku.

¹⁸Tumen wa le ba'ax cu dzáic Ku c kamic tu yo'olal u ya'almaj t'aan Moisese', ma' túun u dzaamaj u t'aanil u dzáiqui': ba'ale' u jaajile' leti' lela': Kue' tu ya'alaj u dzáic ti' Abraham tu yo'olal u dzaa t'aan.

¹⁹Wa bey túuno', ¿ba'ax túun u biilal u ya'almaj t'aan Moisés? Dzaab cu dzo'ocol lela' u ti'al u ye'es le si'ipilo'obo'. Chéen unaj u yantal tac quéen talac le ch'i'ibal ti' máax beeta'ab le dzaa t'aano'. Le a'almaj t'aano' dzaab ojéeltbil tumen ángelo'ob tu yo'olal jun túul j bisaj t'aan.

²⁰Ba'ale' ma' kabéet u yantal jun túul j bisaj t'aani' wa chéen jun túul máax yaan; Kue' leti'e' jun túulili'.

²¹¿U káat ya'al lela' u ya'almaj t'aan Moisese' ti' yaan tu contra u dzaa t'ano'ob Kue'? Tu jaajile' ma'. Tumen wa ca dza'abac jun p'éel a'almaj t'aan cu dzáic cuxtale' cu páajtal túun u dza'abal máac ma'alobil tu táan Ku le quéen u beet máac le ba'ax cu ya'alic le a'almaj t'aano'.

²²Ba'ale' je'el bix cu ya'alic le Quili'ich Dzíibo' tuláacal kaxa'ano'ob tumen le kebano'. Lela' bey u yanil, u ti'al le beyo' le máaxo'ob cu yocsaj óolo'obo' ca páatac u kamico'ob tu yo'olal u yocsaj óolal Jesucristoe', le ba'ax u dzaa t'antmaj Kuo'.

²³Ma'ili' taalac le ocsaj óolalo', le a'almaj t'aano' u kaxmajo'on, táan u páajtal u dza'abal ojéeltbil le ocsaj óolalo'.

²⁴Bey túuno' le a'almaj t'aano' tu cananto'on, je'el bix u cananta'al paalale', u ti'al u ca'ansico'on tac quéen taalac Cristo, u ti'al beyo' le quéen c ocsaj óolte', ca páatac c dza'abal ma'alobil tu táan Ku.

²⁵Bejela'a' dzo'oc u kuchul le ocsaj óolalo', mina'ano'on yáanal u cananil le a'almaj t'aano'.

²⁶Tumen tu yo'olal le ocsaj óolalo' tuláacale'ex u paalale'ex Ku, tumen nupa'ane'ex ti' Cristo Jesús.

²⁷Tuláacale'ex máaxe'ex dzo'oc a nupcaba'ex yéetel Cristo tu yo'olal le ocja'o', a búuquintmaje'ex Cristo.

²⁸Beoraa' ma' táan u yila'a wa judío, wa ma' judío; wa palitzil, wa ma' palitzil; wa xiib, wa co'olel; tumen le ca j nu'upe'ex ti' Cristo Jesuse' tuláacale'ex jun p'éelili'ex.

²⁹Wa u ti'ale'ex Cristoe', u ch'i'ibale'ex Abraham, yaan túun a kamique'ex le ba'ax u ya'almaj Ku u dzáico'.