Read Yucateco Gálatas 4 Bible Online

Gálatas 4 - Yucateco bible

Gálatas 4

¹Ba'ax in káat in wa'ale' leti' lela': Jun túul paal cun u kam u ayikalil u taatae' ca'aliquil chichane' mina'an u jela'anil ti' jun túul u palitzil le najo', quex tu jaajile' leti' u yuumil tuláacal.

²Yaan máaxo'ob dza'an u ti'al canantic yéetel u ti'al ilic u ba'aluba'ob tac le kiin cun u ya'al u taatae'.

³Bey túun cun yúuchul t éetel; ca'aliquil chaan palo'on ca'ache', co'ox a'alic beyo', palitzilo'on yáanal u ba'aluba'ob yóokolcaab.

⁴Ba'ale' le ca j kuch u kiinile', Kue' tu túuxtaj u paal, máax síij ti' jun túul co'olel, síij xan yáanal le a'almaj t'aano'.

⁵J taal beyo' u ti'al u jáalkabt le máaxo'on yano'on ca'ach yáanal le a'almaj t'aano' u ti'al ca ka'amaco'on tumen Ku bey u paalalo'obe'.

⁶U ti'al u ye'esic túun Ku te'ex u paalale', tu túuxtaj u Quili'ich Pixan u paal ta pucsi'ikale'ex; le Quili'ich Pixan túuno' cu ka'am a'alic: ¡C Taata!

⁷Bey túuno' teche' ma' palitzilechi' ba'ale' u paalech Ku. Tumen u paaleche', Kue' yaan u dzáic teech u ayikalil tu yo'olal Cristo.

⁸Ca'ach ma'ali' a kaj óolte'ex Kue', palitzile'ex ti' le beetbil kuo'obo' quex tu jaajile' ma' kuo'obi'.

⁹Ba'ale' beoraa' a kaj óole'ex Kue' wa a'albil mas ma'alobe', Ku u kaj óole'exe' ¿Bix u yúuchul a suute'ex tu ca'a téen ti' le ma' muukil yéetel óotzil tuuculo'obo'? ¿Ba'ax teen a káate'ex ca palitzilta'aque'ex tu ca'a téen?

¹⁰Te'exe' láili' ca kiinbesique'ex dze'edzec kiino'ob, meso'ob, yéetel ja'abo'ob.

¹¹Táan in tucultique' wa in meyaj ichile'exe' mix ba'al u biilal.

¹²Sucu'une'ex, quin káat óoltic te'ex ca a sutaba'ex je'el bix tene', tumen tene' dzo'oc in sutiquinbáa je'el bix te'exe'. Tumen mix jun p'éel loob a beetmaje'ex teen.

¹³Tumen je'el bix dzo'oc a wojéeltique'exe', le ca tin yáax tze'ectaj te'ex le péectzilo' tin beetaj tu yo'olal jun p'éel koja'anil quin mukyajtic ca'achi'.

¹⁴Le koja'anil yanji teno' jun p'éel túuntaj óolal in ti'alte, ba'ale' te'exe' ma' ta p'ectene'exi'. Ma' beyi', ba'ale' ta kamajene'ex bey jun túul u ángel Kue', je'el bix ta kamile'ex Cristo Jesuse'.

¹⁵¿Ba'ax úuch yéetel le qui'imac óolal anji te'exo'? cu páajtal in wa'alic ta wo'olale'exe', wa ca páatac ca'ache', tac je'el a jóokesique'ex a wiche'ex u ti'al a dza'ex tene'.

¹⁶Beoraa' ¿dzo'oc wa in sutiquinbáa a enemigoex chéen tumen dzo'oc in wa'alic te'ex u jaajil?

¹⁷Le máaco'obo' jach u dzaamo'ob u yóolo'ob ti' te'ex, ba'ale' ma' yéetel utzil tuuculi'. Ba'ax u káato'obe' u tzelique'ex ti' to'on, u ti'al ca a dzáa a wóole'ex ti'ob.

¹⁸Tu jaajile', ma'alob ca u dzáa u yóol máac ti' u láako'ob, ba'ale', ca beeta'ac yéetel ma'alob tuucul, yéetel ca beeta'ac mantadz, ma' chéen le quéen yanaquen ichile'exi'.

¹⁹In paalale'ex, tu ca'a téen táan in mukyajtic ki'inamilo'ob ta wo'olale'ex, je'el bix jun túul maamatzil yaan u ki'inamilo'ob síijsaj ti'e'. Ma' túun xu'ulul in cuxtal tac quéen yanac Cristo ta cuxtale'ex.

²⁰¡Buca'aj ma'alobil wa ti' yanen ta wéetele'ex bejela'e' u ti'al ca páatac in t'anique'ex jela'an, tumen ma' in wojel ba'ax je'el in tucultic ta wo'olale'exi'!

²¹Te'ex a káate'ex antal yáanal u ya'almaj t'aan Moisese', a'ale'ex teen lela': ¿Ma' a wu'uymaje'ex ba'ax cu ya'alic le a'almaj t'aano'?

²²Cu ya'alique' Abrahame' yanji ca'a túul u paalal: jun túule' yéetel x palitzil, u láake' yéetel u yatan máax ma' x palitzili'.

²³U paal le x palitzilo' síiji je'el bix u síijil tuláacal paale', ba'ale' u paal le ma' x palitzilo' síiji u ti'al ca dzo'ocpajac ba'ax u ya'almaj Ku.

²⁴Lela' bey jun p'éel queet t'aane'. Le ca'a túul co'olelo'obo' beyo'ob le ca'a p'éel nup t'aano'obo'. Jun p'éel ti' le nup t'aana' leti' le beeta'ab tu pu'uquil Sinaio', lela' cu que'etel yéetel Agar; le máaxo'ob yano'ob yáanal le nup t'aana' cu síijilo'ob u ti'al ca palitzilta'aco'ob.

²⁵Tumen Agare' cu que'etel yéetel u pu'uquil Sinaí tu lu'umil Arabia, lela' leti' le Jerusalén yaan beoraa', tumen le caaja' ti' yaan yáanal u palitzilil jun múuch' yéetel u paalal.

²⁶Ba'ale' le ca'anil Jerusaleno' ma' palitzili', to'on túune' u paalalo'on leti'.

²⁷Tumen le Quili'ich Dzíibo' cu ya'alic: Qui'imacchajac a wóol, co'olel ma' teech a síijsaj, teech mina'an a paalalo'ob; awatnen yéetel qui'imac óolal teech ma' a mukyajtmaj u ki'inami'ilo'ob síisaji'. Tumen mas ya'ab u paalal cu yantal le co'olel xu'ump'atta'ano' ti' le yaan u yíicháamo'.

²⁸Sucu'une'ex to'one' beyo'on Isaaque'; to'on le paalalo'ob tu dzaa t'antaj Kuo'.

²⁹Ba'ale' bey je'el bix ti' le kiino'obo' le paal síij je'el bix u síijil tuláacal paale' tu ch'a'apachtaj le paal síij tu yo'olal u páajtalil Quili'ich Pixane', bey xan cu yúuchul bejela'e'.

³⁰Ba'ale', ¿ba'ax cu ya'alic le Quili'ich Dzíibo'? Cu ya'alic: Tojolch'int le x palitzil yéetel u paalo', tumen u paal le x palitzilo' ma' tu páajtal u kamic u ayikalil le taatao' jun múuch' yéetel u paal le co'olel ma' palitzililo'.

³¹Bey túuno' sucu'une'ex, ma' u paalalo'ob le x palitzilo' ba'ale' u paalalo'ob le co'olel x ma' palitzilo'.