Read Yucateco Gálatas 5 Bible Online

Gálatas 5 - Yucateco bible

Gálatas 5

¹Cristo tu jáalkabto'on u ti'al ca jáalkabta'aco'on. P'áate'ene'ex túun, ti' le jáalkabilo', ma' a suute'ex antal yáanal palitzilil.

²U'uyene'ex. Teen Pabloe', quin wa'alic te'ex, wa ca súutkupta'ale'exe' Cristoe' mix ba'al u biilal te'ex.

³In káat in wa'al tu ca'a téen ti' je'el máaxac cu súutkupta'ale' unaj u beetic tuláacal ba'ax cu ya'alic u ya'almaj t'aan Moisés.

⁴Te'ex ca tucultique'ex ma'alob a wanile'ex tu táan Ku tu yo'olal a dzo'ocbesique'ex ba'ax cu ya'alic le a'almaj t'aano', dzo'oc a jun páaycunticaba'ex ti' Cristo; dzo'oc a dzicaba'ex jun tzéelil ti' u siibal utzil Ku.

⁵Tumen to'one' yaan to'on u alab óolalil c dzaabal ma'alob tu táan Ku tu yo'olal Quili'ich Pixan yéetel tu yo'olal le ocsaj óolalo'.

⁶Wa nupa'ano'on ti' Cristo Jesuse', mix ba'al u biilal wa súutkupta'ano'on wa ma'. Ba'ax yaan u biilale' leti' le ocsaj óolal cu meyaj tu yo'olal le yaacunajo'.

⁷Te'exe' ma'alob a wanile'ex ca'achi. ¿Máax túun tu beetaj u jáawal a wu'uyique'ex u t'aan le jaajilo'?

⁸Le Ku máax t'anique'exo' ma' leti' tu beetaji'.

⁹Ma' u tu'ubul te'exe' jun p'íit levadurae' cu beetic u pajtal tuláacal le sacano'.

¹⁰Tene' yaan in alab óolal ti' Yuumtzile' te'exe' ma' bíin jelpajac a tuucule'exi', ba'ale' Kue' yaan u xot kintic máax péecsic a wóole'exo', je'el máaxaque'.

¹¹Ba'ax quin wa'alic tin wo'olale', sucu'une'ex, wa teen láili' táan in ca'ansic le súutkuptajo', bejela'a' le judíob ma' táan u ch'a'apachtiqueno'obe', tumen beyo' u ma'alob péectzilil u cruz Cristoe' ma' táan u lúubul kaasil tu xiquino'obi'.

¹²Ba'ale' tu yo'olal le máaxo'ob cu máano'ob u péecso'ob a wóole'ex iquil u ca'ansico'ob le súutkuptajo' ¡quexi' ca u xotuba'ob tuláacal jun puli'e'!

¹³Tumen te'exe', sucu'une'ex, t'ana'ane'ex u ti'al jáalkabil. Chéen ma' a ch'a'ique'ex le jáalkabila' bey je'el bix jun p'éel u ba'ax o'olalil a beetique'ex kaakas dzíibolalo'obe'; meyajtaba'ex ta baatzile'ex yéetel yaacunaj.

¹⁴Tumen tuláacal le a'almaj t'aano' cu dzo'ocpajal yéetel le t'aana': Yaabilt a láak je'el bix a yaabilticabáa teche'.

¹⁵Canantaba'ex, tumen wa ca chi'icaba'ex yéetel ca jaanticaba'exe', bíin a xu'ulsa'aba'ex ta baatzile'ex.

¹⁶Ba'ax quin wa'alic te'exe' leti' lela': Cuxlene'ex je'el bix cu ya'alic le Quili'ich Pixano', beyo' ma' bíin a beete'ex le kaakas dzíibolalo'ob yaan ti' te'exo'.

¹⁷Tumen le kaakas dzíibolalo'obo' ti' yano'ob tu contra le Quili'ich Pixano' yéetel le Quili'ich Pixano' ti' yaan tu contra le kaakas dzíibolalo'obo'. Tumen cu ba'atelo'ob tu baatzilo'obe' ma' tu páajtal a beetique'ex le ba'alo'ob a káate'exe'.

¹⁸Ba'ale' wa Quili'ich Pixan máax nu'uctic a beele'exe' mina'ane'ex túun tu yáanal le a'almaj t'aano'.

¹⁹Ma' talam u yila'al máacalmáac le ba'alo'ob cu beetico'ob le máaxo'ob cu bino'ob tu paach le kaakas dzíibolalo'obo'.

²⁰táan Cu meyajtico'ob beetbil kuo'ob yéetel cu beetico'ob pulya'ajilo'ob. Cu ch'a'ap'ectajo'ob, cu ba'atelo'ob yéetel cu kaakas tuuculo'ob. Séeba'an u p'u'ujulo'ob, cu beetico'ob tuláacal ba'al chéen u ti'al u yutzilo'ob, cu beetico'ob jatzlantáanbailo'ob bey xan u jejeláas u múuch'ul máaco'ob.

²¹Yaan loolob dzíibolal ti'ob, j quíimsaj wíinico'ob, j cáaltalo'ob yéetel jach joloko'ob, yéetel cu beetico'ob u láak ba'alo'ob chica'an ti' lelo'oba'. Quin ca a'alic te'exe' je'el bix dzo'oc in wa'alic te'exo', le máaxo'ob cu beetico'ob le ba'alo'oba' ma' tu táacpajalo'ob tu ajawil Ku.

²²Ba'ale' Quili'ich Pixane' cu dzáic yaacunaj, Qui'imac óolal, jéedzel óolal, chuca'an óolal, ma'alob bisajbáil, utzil pucsi'ikal, ocsaj óolal,

²³cabal óolal yéetel mu'ukan óolal. Mina'an mix jun p'éel a'almaj t'aan ca u mix ba'alcunt ba'alo'ob je'el bix le lo'oba'.

²⁴Le máaxo'ob u ti'alo'ob Cristo' dzo'oc u quíimsico'ob ti' u cruz u lu'umcabil wíiniquilo'ob pa'ate' yéetel ba'ax tu t'aano'ob bey xan u dzíibolalo'ob.

²⁵Wa cuxa'ano'on tu yo'olal Quili'ich Pixane', unaj c xíimbal tu yo'olal Quili'ich Pixan.

²⁶Ma' unaj u ca'analtal c ichi', u ti'al c caxantic ba'atel t baatzili', mix unaj u yantal loolob dzíibolalo'ob ichilo'oni'.