Read Yucateco Gálatas 6 Bible Online

Gálatas 6 - Yucateco bible

Gálatas 6

¹Sucu'une'ex wa ca wilique'ex yaan máax luba'an ti' kebane', te'ex mu'uka'ane'ex ti' a pixane'exe' unaj a wáantique'ex u ti'al ca líikic. Ba'ale' unaj a beetique'ex yéetel cabal óolal, yéetel cada jun túule' unaj u jach cananticubáa bic túunta'ac u yóol xan.

²Áantaba'ex ta baatzile'ex u ti'al a bisique'ex a cuuche'ex, dzo'ocbese'ex beyo' u ya'almaj t'aan Cristo.

³Tumen wa máax táan u tuculticubáa wa ba'axe' ba'ale' mix ba'ale', táan u tusicubáa tu juunal.

⁴Cada jun túule' unaj u yilic wa ma'alob ba'ax cu beetic. Wa cu qui'imactal u yóol tu yo'olale', lela' chéen u ti'al leti' ma' u ti'al u láak máaqui'.

⁵Tumen cada jun túule' yaan u bisic u cuuch.

⁶Le máax cu kamic ma'alob ca'ansajo'ob ti' le ma'alob péectzilo' unaj u yáantic le máax ca'ansico' yéetel tuláacal le jejeláas ba'alo'ob yaan ti'o'.

⁷Ma' a tusicaba'ex: Kue' ma' tu páajtal u p'a'asta'al. Le ba'ax cu pakic máaque' le xan bíin u joche.

⁸Wa yaan máax cu pakic ba'ax utz tu t'aan ti' u lu'umcabil wíinclile' bíin u joch quíimil. Ba'ale' wa cu pakic ba'ax utz tu táan Quili'ich Pixane', ti' le Quili'ich Pixano' bíin u joch cuxtal mina'an u xuul.

⁹Bey túuno', ma' unaj c ca'anal c beet utzi', tumen wa ma' tu lúubul c óole' tu kiinil bíin joochnaco'on.

¹⁰Le o'olale', je'el ba'alac kiin cu páajtale' unaj c beetic utz ti' tuláacal, yáax táanile' ti' le sucu'uno'ob ti' le ocsaj óolalo'.

¹¹Il a wile'ex yéetel buca'aj nucuch letraob táan in dzíib te'ex beora' yéetel in kab.

¹²Le máaxo'ob u káato'ob ca súut kupta'aque'exe' cu beetico'ob chéen u ti'al ca p'áataco'ob utzil tu táan máaco'ob yéetel u ti'al ma' u ch'a'apachta'alo'ob tu yo'olal u cruz Cristo.

¹³Tumen mix le máaxo'ob cu súutkupta'alo'obo' cu beetico'ob tuláacal le ba'ax cu ya'alic le a'almaj t'aano'. Ba'ale' u káato'ob ca súut kupta'aque'exe' u ti'al ca páatac u ca'analtal u yicho'ob tu yo'olal a wíinclile'ex.

¹⁴Ba'ale' in ti'al tene', ma' in káat in nojbe'encunsinbáa ti' mix ba'ali' wa ma' chéen ti' u cruz Yuumtzil Jesucristo. Tumen tu yo'olal u cruz Cristoe' le yóokolcaaba' quimen in ti'alte, teen xane' quimenen u ti'al yóokolcaab.

¹⁵Tumen wa nupa'ano'on yéetel Cristo Jesuse' mix ba'al u biilal wa súutkupta'ano'on wa ma'; ba'ax yaan u biilale' ca túumbencunsa'ac c cuxtal.

¹⁶Ca u kamo'ob túun jéedzel óolal, yéetel ch'a'aj óotzilil tuláacal le máaxo'ob cuxa'ano'ob je'el bix le ca'ansaja' yéetel tuláacal le máaxo'ob jach u caajalo'ob Kuo'.

¹⁷Beoraa' tac tuláacal kiino'obe' mix máac in káat ca u dzáa teen yaayaj óolalo'ob; tumen le chíiculalo'ob yaan tin wíinclilo' cu ye'esico'obe' tene' jun túulen u palitzil Cristo Jesús.

¹⁸Sucu'une'ex, u siibal utzil c Yuumtzil Jesucristoe' yanac ti' a pixane'ex. Amén.