Read Yucateco Efesios 4 Bible Online

Efesios 4 - Yucateco bible

Efesios 4

¹Le o'olale' tene', máaxen kala'anen tu yo'olal Yuumtzile', quin káat óoltic te'ex ca xíimbalnaque'ex ma'alob je'el bix unaj u beetic le máaxo'ob t'ana'ano'ob tumen Kuo', je'el bix j t'a'ane'ex te'exo'.

²Cabalchajac a wóole'ex yéetel e'ese'ex suuc óolal; yanac te'ex chuca'an óolal; áantaba'ex xan ta baatzile'ex yéetel yaacunaj.

³Il a wile'ex a p'áatale'ex nupa'ane'ex mantadz yéetel u yáantaj Quili'ich Pixan, tu yo'olal le jéedzel óolal nupique'exo'.

⁴Yaan jun p'éelili' wíinclil, yéetel jun túulili' Quili'ich Pixan, bey je'el bix t'ana'ane'ex tumen Ku u ti'al jun p'éelili' alab óolal.

⁵Yaan jun túulili' Yuumtzil, jun p'éelili' ocsaj óolal, jun p'éelili' ocja';

⁶jun túulili' Ku u taata tuláacal. Leti'e' ti' yaan tu yóokol tuláacale', cu meyaj tu yo'olal tuláacal, yéetel ti' yaan ti' tuláacale'.

⁷Ba'ale' ti' jujun túule' dza'an to'on jun p'éel páajtalil, queet yéetel u p'iisil le siibal tu dzaj to'on Cristo'.

⁸Le o'olal cu ya'alic le Quili'ich Dzíibo': J na'ac ca'an, ca tu bisaj tu yéetele' le máaxo'ob kala'ano'obo', ca tu dzaj siibalo'ob ti' máaco'ob.

⁹¿Ba'ax túun u káat u ya'al le t'aan cu ya'alic: j na'aco'? U káat u ya'ale' táanil éem ti' u mas taamil lu'um.

¹⁰Le máax j éemo', leti' xan le máax j na'ac tu mas ca'anlil le ca'ano'obo', u ti'al u chupic tuláacal ba'al.

¹¹Ca tu dzaj páajtalilo'ob ti' jujun túul, ti' dze'edzeque' tu dzaj ca u beet u apóstolilo'ob, ti' u láako'obe' ca u beet u profetailo'ob, ti' u láako'obe' ca u tze'ecto'ob le ma'alob péectzilo', ti' u láako'obe' ca u beet u canan j tamanilo'ob yéetel u ca'anbesajilo'ob.

¹²Bey tu nu'uctilac le máaxo'ob u ti'alo'obo' u ti'al ca meyajnaco'ob, u ti'al ca ch'íijic u wíinclil Cristo,

¹³tac quéen kuchuco'on c núupul tuláacalo'on ti' ocsaj óolal yéetel ti' u kaj óolalil u Paal Ku. Beyo' c béeytal máaco'ob dzo'oc u chuca'an ch'íijilo'ob, queet yéetel u chuca'an ca'anlil Cristo,

¹⁴u ti'al ma' c béeytal je'el bix paalale', máaxo'ob séeba'an u kexic u tuuculo'ob yéetel cu jíilta'alo'ob tumen u yiikal je'el máacalmáac túumben ca'ansajile', cu lúubulo'ob beyo' ti' le tuus cu beetico'ob le táabsaj wíinico'ob u káat u biso'ono'ob ti' u bejilo'ob le kaaso'.

¹⁵U ma'alobile', ca c t'an le jaajilo' ti' yaacunaj. Unaj c ch'íijil ti' tuláacal ba'al nupa'ano'on ti' Cristo, máax u poolil le wíinclilo'.

¹⁶Tu yo'olal Cristoe' tuláacal le wíinclilo' mantadz taablil yéetel kaxa'anil tu baatzil tu yo'olal nupa'anil tuláacal u xéexet'alo'ob; yéetel wa cada jun xéet' le wíinclil cu meyaj ma'alobo', tuláacal cu bin u nojochtal yéetel cu bin u ch'íijil ich yaacunaj.

¹⁷Leti' le quin wa'alic te'ex túuna', yéetel quin kubentic te'ex tu kaaba' Yuumtzil: Ma' a cuxtale'ex je'el bix u cuxtalo'ob le máaxo'ob ma' u kaj óolo'ob Kuo', máaxo'ob cuxa'ano'ob queet yéetel u chéen cunel tuuculo'ob,

¹⁸yéetel dzo'oc u éekjoche'enta'al u na'ato'ob. Ti' leti'obe' mina'an le cuxtal cu taal ti' Kuo', tumen mix ba'al u yojelo'ob tu yo'olal u chichil u pucsi'ikalo'ob.

¹⁹Dzo'oc u mina'anta'al u sublactaquilo'ob yéetel dzo'oc u kubicuba'ob ti' kaas u ti'al u beetico'ob yéetel qui'imac óolal tuláacal u jejeláasil kaakas ba'alo'ob.

²⁰Ba'ale' te'exe' ma' bey ta canjile'ex ti' Cristoi',

²¹wa tu jaajil ta wu'uyaje'ex u tzicbalil leti', yéetel ca'anbesa'abe'ex tumen leti' je'el bix le jaajil yaan ti' Jesuso'.

²²Wa c t'aan tu yóokol a úuchben cuxtale'exe', xúump'atte'ex le úuchben wíinic dzo'oc u kastalo', tusa'an tumen a kaakas dzíibolale'ex.

²³Te'exe' unaj a túumbencunsale'ex ti' a pixane'ex yéetel ti' a tuucule'ex,

²⁴yéetel a búuquinte'ex le túumben wíinico' beeta'an je'el bix u káat Kue' yéetel cu chíicbesa'al yéetel jun p'éel cuxtal tu jaajil toj yéetel Quili'ich.

²⁵Tu yo'olal lela' ma' a tuuse'ex; jujun túule' u ya'al ba'al jaaj ti' u yéet máaquil, tumen tuláacalo'on táacpaja'ano'on ti' jun p'éelili' wíinclil.

²⁶Wa ca kuuxile'exe' ma' a kebantale'ex; yéetel ma' u p'áatal bul kiin kuuxe'ex.

²⁷Ma' a dzáique'ex tu'ux u meyaj kasilba'al.

²⁸Le máax cu yoocol ca'acho' u p'at u yoocol ca u dzáajubáa meyaj, ca meyajnac ma'alob yéetel u kabo'ob u ti'al ca yanac ti'e' ba'al u dzáa ti' le óotzilo'obo'.

²⁹Ma' a wa'alique'ex kaakas t'aano'ob, ba'ale' a'ale'ex t'aano'ob ma'alobtac, t'aano'ob cu yáantajo'ob u ti'al u ch'íijil máac ti' u pixan yéetel cu taasico'ob utzil ti' máaxo'ob u'uyic.

³⁰Ma' a beetique'ex u yokomtal u yóol u Quili'ich Pixan Ku, tumen yéetel le Quili'ich Pixano' sellarta'ane'ex tac tu kiinil le chuca'an tocsajilo'.

³¹Xúump'atte'ex tuláacal káajil óol, kuuxilil, p'uja'anil, awatil, pooch'ilil, yéetel tuláacal u jejeláas kaasil.

³²Ba'ax unaje', yanac te'ex yaacunaj yéetel ch'a'a óotzilil ta baatzile'ex, je'el bix Ku tu sa'atsaje'ex ti' Cristoe'.