Read Yucateco Efesios 5 Bible Online

Efesios 5 - Yucateco bible

Efesios 5

¹Tumen te'ex u yaabilaj paalal Kue', il a wile'ex a béeytale'ex je'el bix leti'e'.

²Cuxlene'ex ich yaacunaj, je'el bix tu yaabiltilaco'on Cristo yéetel tu kubjubáa t o'olal, je'el bix jun túul j taman quiimsa'an yéetel dza'an ich qui'iboquil tu t'aan Kue'.

³Tumen te'ex u ti'ale'ex Kue', ma' unaj mix u ya'ala'al ichile'ex le nup kebano', mix jun p'éel u láak ba'al kaas wa u dzíibolal u niccunsa'al taakin.

⁴Ma' a wa'alique'ex ba'alo'ob subtzilo'ob, mix ba'alo'ob chéen cunelo'ob wa kaaso'ob, tumen le ba'alo'oba' mix ba'al u biilalo'ob; ba'axe' unaj a dzáique'ex nib óolal ti' Ku.

⁵Tumen a wojele'ex wa yaan máax cu nup kebantal, wa cu beetic ba'alo'ob kaastac, wa cu dzíiboltic u niccuntic taakine' (lela' queet yéetel u kulta'al le beetbil kuo'obo'), ma' tu páajtal u táacpajal ti' le ajawil u ti'al Cristo yéetel u ti'al Kuo'.

⁶Ma' a tu'usule'ex tumen mix máac yéetel chéen cunel t'aano'ob, tumen tu yo'olal le ba'alo'ob kaastaco'oba' cu taal u yaayaj jaadz Ku tu yóokol máaxo'ob ma' tu yu'ubico'ob u t'aano'.

⁷Ma' u yantal mix ba'al a wile'ex túun tu yéetelo'ob.

⁸Te'exe' cuxa'ane'ex ca'ach ich éekjoche'enil, ba'ale' beoraa', tu yo'olal nupa'ane'ex ti' Yuumtzile; cuxa'ane'ex ti' sáasilil. Xíimbalnene'ex je'el bix máaco'ob yano'ob ti' sáasile',

⁹tumen le sáasilo' cu dzáic utzil pucsi'ikal, jaaj bey xan jun p'éel toj cuxtal.

¹⁰Il a wil a canique'ex ba'ax utz tu táan Yuumtzil.

¹¹Ma' u yantal mix ba'al a wile'ex yéetel le chéen cunel ba'alo'ob cu beetico'ob le máaxo'ob yano'ob ich éekjoche'enilo', ba'axe' jóokese'ex ti' sáasil.

¹²Tumen subtzil tac chéen u yúuchul t'aan tu yo'olal ba'ax cu mucul beetico'ob;

¹³ba'ale' le quéen e'esa'ac tuláacal ba'al tumen le sáasilo', tuláacal cu sáasiltal, tumen le sáasilo' cu chíicbesic tuláacal.

¹⁴Tu yo'olal lela' cu ya'ala'al: Aajen, teech táan a wenel; líiken ti' ichil le quimeno'obo', u ti'al ca u sáasilcuntech Cristo.

¹⁵Le o'olale', il a wile'ex bix a xíimbale'ex. Ma' a cuxtale'ex bey máaxo'ob mina'an u na'ato'obe' ba'ale' bey máaxo'ob yaan u na'ato'obe'.

¹⁶Ma' a chéen máansaj kiine'ex tumen kasa'an le kiino'obo'.

¹⁷Ma' a béeytale'ex bey ma' na'ate'; Il a wil a na'atique'ex ba'ax u káat Yuumtzil.

¹⁸Ma' a cáaltale'ex yéetel vino tumen lelo' cu bisic máac ti' sa'atalil; ba'ax unaje' a chu'upule'ex yéetel Quili'ich Pixan.

¹⁹t'aanene'ex ta baatzile'ex yéetel salmo'ob, himno'ob yéetel quili'ich kaayo'ob, kaaynene'ex yéetel qui'iqui' t'ante'ex Yuumtzil yéetel tuláacal a pucsi'ikale'ex.

²⁰Mantadz dza'ex nib óolal ti' Ku le taatao' tu yo'olal tuláacal ba'alo'ob tu kaaba' c Yuumtzil Jesucristo.

²¹Paaclan yanaque'ex yáanal a páajtalile'ex ta baatzile'ex, tu yo'olal tziiquil ti' Cristo.

²²Le atantzilo'obo' ca yanaco'ob tu yáanal u páajtalil u yíichamo'ob, bey je'el bix ti' Yuumtzile'.

²³Tumen le íichamtzilo' u pool le atantzilo', bey je'el bix Cristo u pool le iglesiao'. Cristoe' leti' xan u tocsajil le iglesiao', lela' u wíinclil;

²⁴ba'ale' bey je'el bix le iglesia ti' yaan tu yáanal u páajtalil Cristoo' bey xan le atantzilo'obo' unaj u yantal tu yáanal u páajtalil u yíichamo'ob ti' tuláacal ba'al.

²⁵Íichamtzile'ex yaabilt a watane'ex bey je'el bix Cristo tu yaabiltaj le iglesiao' ca tu dzaj u cuxtal tu yo'olal.

²⁶Lela' tu beetaje' u ti'al u quili'ichcuntic le iglesiao', yéetel u sajcuntic úuchic u p'o'ic yéetel ja', tu yo'olal le t'aano',

²⁷u ti'al u dzáic tu táan leti' je'el bix jun p'éel iglesia nojbe'en, ma' wáawayil, mix ya'ayachil yéetel mix ba'al chica'an ti' lelo'oba', ba'ale' quili'ich yéetel x ma' si'ipilil.

²⁸Le íichamtzilo'obo' unaj u yaabiltico'ob u yatano'ob, je'el bix u yaabiltico'ob u wíinclilo'obe'. Le máax u yaabilmaj u yatane' u yaabiltmajubáa leti'.

²⁹Tumen mix máac cu p'ectic u wíinclil, ba'ale' cu tze'ectic yéetel cu canantic; bey u beetic Cristo yéetel le iglesiao'.

³⁰to'on túune' u xéexet'alo'on u wíinclil,

³¹Tu yo'olal lela' le j xiibo' yaan u p'atic u taata yéetel u maamae' u ti'al u nupicubáa yéetel u yatan, tu ca'a túulalo'ob bíin béeychajco'ob bey jun túulili'e'.

³²Lela' jun p'éel ta'acbil ba'al jach nojoch, tene' quin wa'alic lela' tu yo'olal Cristo yéetel u iglesia.

³³Ba'ale' u káat u ya'al xane' cada jun túul ti' te'exe' u yaabilt u yatan je'el bix u yaabilticuba'e', yéetel le atantzilo' u tzic u yíicham.