Read Yucateco Efesios 6 Bible Online

Efesios 6 - Yucateco bible

Efesios 6

¹Paalale'ex, tu yo'olal a wocsa óole'ex ti' Yuumtzile' unaj a wu'uyique'ex u t'aan a taataex, tumen lela' u tojil.

²Le yáax a'almaj t'aan nupa'an yéetel dzaa t'aane' leti' lela': tzic a taata yéetel a maama,

³u ti'al ca yanac teech qui' óolal yéetel ca cuxlaquech ya'ab kiino'ob way lu'ume'.

⁴Te'ex taatatzile'ex, ma' a beetique'ex u kuuxil a paalale'ex, ba'ale' ch'íijsexo'ob ti' jun p'éel cuxtal yéetel ti' u ca'ansajil Yuumtzil.

⁵Palitzile'ex, u'uye'ex u t'aan a dzuulile'ex way te j lu'uma', yéetel tziiquil, sajaquil bey xan x ma' ca'a p'éel ichil, bey táan a meyajtique'ex Cristoe'.

⁶Meyajte'exo'ob, ma' chéen ca'aliquil táan u pactique'exo'ob u ti'al a p'áatale'ex ma'alob tu táano'ob, ba'ale' bey u palitzile'ex Cristoe', táan a beetique'ex yéetel tuláacal a pucsi'ikale'ex le ba'ax u káat Kuo'.

⁷Beete'ex a meyaje'ex yéetel qui'imac óolal, bey jun p'éel meyaj ca beetique'ex u ti'al Yuumtzile' ma' u ti'al máaco'obi'.

⁸Tumen dzo'oc a wojéeltique'ex jujun túule', quex palitzil wa ma' palitzile', bíin u kam ti' Yuumtzil u bo'olil le utz cu beetico'.

⁹Te'ex dzuule'ex, beete'ex bey xano' yéetel a palitzile'exo'ob, x ma' yaayaj t'aanilo'ob. ka'ajac ti' te'exe', te'ex yéetel leti'obe' ti' yane'ex tu yáanal u páajtalil jun túul Yuumtzil yaan te j ca'ano', leti'e' ma' tu yilic u jela'anil jun túul máac tu yóokol u láak máac.

¹⁰Beoraa', sucu'une'ex, mu'ukancunsaba'ex ti' Yuumtzil tu yo'olal u mu'ukanil páajtalil.

¹¹Búuquinte'ex tuláacal le u nu'uculil ba'atel cu dzáic te'ex Kuo', u ti'al ca páatac a jéedzel p'áatale'ex tu contra u táabsajilo'ob kasilba'al.

¹²tumen ma' táan c ba'atel tu contra máaco'obi', ba'ale' tu contra u muuk kaakas pixano'ob ti' le ca'anilben cúuchilo'obo', u káat u ya'ale', máaxo'ob cu tusbelo'ob, jalacho'ob yéetel yaan páajtalil ti'ob tu yóokol le éekjoch'e'en yóokolcaaba'.

¹³Le o'olale' ch'a'ex tuláacal le u nu'uculil ba'atel cu dzáic te'ex Kuo', u ti'al ca páatac a xachicaba'ex ti' le kaakas kiino', yéetel cu dzo'ocol a xachicaba'exe', ca páatac a jéedzel p'áatale'ex.

¹⁴Jéedzel p'áatene'ex túun, a kaxnaktmaje'ex le jaajo' bey jun p'éel kaxnake', yéetel cananta'ane'ex tumen le tojo' je'el bix le u búuquil ba'atel cu canantic u tzeem le soldadoo'.

¹⁵Nu'uctaba'ex u ti'al a tze'ectique'ex u ma'alob péectzilil le jéedzelo', je'el bix le soldado' cu nu'ucticubáa le quéen u dzáa xanab tu yooco'.

¹⁶tu yóokol tuláacale' yanac te'ex le ocsaj óolal bey je'el bix jun p'éel pixibe', u ti'al ca páatac a tupique'ex tuláacal u t'aba'an julubo'ob kasilba'al.

¹⁷Yanac te'ex le tocsajil bey je'el bix jun p'éel chichich p'óoque' yéetel ch'a'ex u quili'ich t'aan Ku bey je'el bix le máascab cu dzáic te'ex le Quili'ich pixano'.

¹⁸Beete'ex tuláacal lela' yéetel payalchi' táan a káat óolale'ex mantadz ti' Ku tu yo'olal le Quili'ich Pixano'. P'il ichnene'ex yéetel ma' u lúubul a wóole'ex, payalchi'inene'ex xan tu yo'olal tuláacal le máaxo'ob u ti'alo'ob Kuo'.

¹⁹Payalchi'inene'ex xan tin wo'olal, u ti'al ca dza'abac teen t'aano'ob tumen Ku le quéen t'aanaquen, yéetel u ti'al ca páatac in t'aan yéetel páajtalil u ti'al ca in dzáa ojéeltbil u ta'acbe'en ba'alo'ob le ma'alob péectzilo'.

²⁰Kue' u túuchi'itmajen bey je'el bix jun túul u j bisaj t'aanil le ma'alob péectzila', tu yo'olale' kala'anen beoraa'. Payalchi'inene'ex u ti'al ca in tze'ect le ma'alob péectzila', yéetel le páajtalil iquil in beetico'.

²¹Tíquico, c yaabila sucu'un yéetel jun túul c áantaj chuca'an u yóol ti' u meyajo'ob Yuumtzile', leti' cun a'alic te'ex bix in wanil ba'ax quin beetic.

²²Le o'olal táan in túuxtic te'ex, u ti'al ca u ya'al te'ex bix anilo'on, u ti'al cu líikes a wóole'ex beyo'.

²³Ku le taatao', yéetel Yuumtzil Jesucristoe' ca u dza'ob ti' le sucu'uno'ob jéedzel óolal yéetel yaacunaj jun múuch' yéetel ocsaj óolal.

²⁴U siibal utzil Junab Ku ca yanac yéetel; tuláacal máaxo'ob u yaabilmajo'ob c Yuumtzil Jesucristo yéetel jun p'éel yaacunaj ma' tu kexpajal. Amén.