Read Yucateco Filipenses 1 Bible Online

Filipenses 1 - Yucateco bible

Filipenses 1

¹Pablo yéetel Timoteo, palitzilo'on ti' Jesucristoe', ti' tuláacal le máaxo'ob u ti'alo'ob Ku nupa'ano'on yéetel Cristo Jesuso' máaxo'ob yano'ob ti' u caajil Filipos, c táacbesic ichilo'ob xane' le obispo'ob yéetel le diacono'obo'.

²Kame'ex u siibal utzil yéetel jéedzel óolal Ku c taata yéetel c Yuumtzil Jesucristo.

³Je'el jay téen quin ka'ajsique'exe' quin dzáic gracias ti' in Ku.

⁴Le quéen payalchi'inaquene' mantadz quin káat óolal yéetel qui'imac óolal tu yo'olal tuláacale'ex;

⁵tumen meyajnajo'on jun múuch' ti' u meeyjul le ma'alob péectzilo', cáajic tu yáax kiine' tac bejela'e'.

⁶Jach ma'alob in wojelile' Ku máax tu cáajsaj u ma'alob meyaj ti' te'exe', yaan u yutzil chíicbesic tac tu kiinil quéen taalac Jesucristo.

⁷Jach tu beel ca tuuculnaquen beya' tu yo'olal tuláacale'ex, tumen ti' yane'ex tin pucsi'ikale', yéetel tumen jun múuch' tin wéetele' tuláacale'ex ca kamique'ex queet qui'iqui' t'aanilo'ob, quex kala'anen wa quex ca yanac in ba'atel t'aan tu yo'olal le ma'alob péectzilo' yéetel in wa'alic leti' u jaajil.

⁸Kue' u yojel buca'aj in yaabiltmaje'ex tuláacale'ex, yéetel u muumun yaacunaj Jesucristo.

⁹quin káatic ich payalchi'e' ca xi'ic u bin u ya'abtal a yaacunaje'ex yéetel ya'ab kaj óolalil yéetel na'atil ti' tuláacal ba'al,

¹⁰u ti'al ca a wojéelte'ex a yéeye'ex mantadz ba'ax asab ma'alob. Beyo' je'el u páajtal u yantal te'ex jun p'éel sac cuxtale' yéetel ma' bíin yanac mix ba'al a si'ipilcunta'ale'ex tu kiinil le quéen taalac Cristoe'.

¹¹Beyo' Jesucristoe' bíin u beet ca béeyac a cuxtale'exe' jun p'éel u joochil ma'alob meyajo'ob, u ti'al u tziiquil yéetel u nojbe'enil Ku.

¹²Sucu'une'ex, in káat ca a wojéelte'exe' le ba'alo'ob dzo'oc u yúuchul teno' u jaajile' j taalo'ob bey jun p'éel áantaje' u ti'al u tze'ecta'al le ma'alob péectzilo'.

¹³Bey túuno' tuláacal u soldado'ob le chúumuc najo', yéetel tuláacal le u láako'obo', u yojelo'ob kala'anen tu yo'olal in tzay pachtic Cristo.

¹⁴Tumen cu yilico'ob kala'anene' ya'ab ti' le sucu'uno'ob cu yantal u yóolo'ob u ti'al u tze'ecto'ob u t'aan Ku x ma' sajaquilil yéetel nojoch kub óolal ti' Yuumtzil.

¹⁵U jaajile' yaan dze'edzeque' cu tze'ectico'ob u kaaba' Cristo tu yo'olal kaakas dzíibolalo'ob yéetel tu yo'olal ba'atelilo'ob, ba'ale' u láako'obe' cu beetic yéetel u pucsi'ikal.

¹⁶Dze'edzeque' cu tze'ectico'ob u kaaba' Cristo tumen cu caxtico'ob u yutzil antalo'ob, ma' tu jaajil u yóolo'obi', tumen táan u tucultico'ob u ya'abcuntico'ob beyo' in yaayaj óolalo'ob beoraa' kala'anena';

¹⁷ba'ale' le u láako'obo' cu beetico'ob yéetel yaacunaj, tumen u yojelo'ob yanen waye' u ti'al in ba'atel t'aan tu yo'olal le ma'alob péectzilo'.

¹⁸Ba'ale' ¿ba'ax túun? je'el bixaque', wa yéetel tuláacal pucsi'ikal wa ma'e', táan u tze'ecta'al u kaaba' Cristo; lela' cu qui'imaccunsic in wóol. Yéetel yaan u asab qui'imactal in wóol,

¹⁹tumen tene' in wojele' ti' tuláacal le ba'alo'oba' ma'alob quin jóokol tu yo'olal a payalchi'ex yéetel tu yo'olal le áantaj cu dzáic teen u Quili'ich Pixan Jesucristoo'.

²⁰Tumen ba'ax in káat yéetel ba'ax quin pa'atique' ma' in sublactal, ba'ale' ca páatac in t'aan yéetel tuláacal kub óolal, bey túuno' beoraa' je'el bix mantadze' ca nojochquinta'ac Cristo tin wíinclil, quex cuxa'anen quex quimenen.

²¹Tumen in ti'al tene' le cuxtalo' Cristo, yéetel le quíimilo' jun p'éel náajal.

²²Ba'ale' wa iquil in cuxtal ti' le wíinclil cu páajtal in meyaj u ti'al u yutzil meyaj Yuumtzile', ma' in wojel túun máacalmáac unaj in yéeyiqui'.

²³Talam in ti'al in yéeyaj ichil le ca'a p'éel ba'ala'; ti' jun tzéele' quin dzíiboltic quíimil u ti'al in bin yantal yéetel Cristo, tumen lelo' asab ma'alob in ti'al teen.

²⁴Ba'ale' ti' u láak jun tzéele', asab kabéet ti' te'exe' ca cuxlaque'ex ti' le wíinclila'.

²⁵Tumen ma'alob in wojelil lela', tene' yaan in p'áatal yéetel yaan in wantal ta wéetele'exe', u ti'al in wáante'ex ca xi'ique'ex táanil yéetel ca yanac te'ex asab qui'imac óolal ti' a wocsaj óolale'ex.

²⁶Yaan túun in wantal tu ca'a téen ta wéetele'ex, u ti'al beyo' tin wo'olale' ca yanac te'ex qui'imac óolal ti' Cristo Jesús.

²⁷Chéen il a wile'exe' ca cuxlaque'ex je'el bix cu ya'alic to'on u ma'alob péectzil Cristoe'. Beyo', quex ca xi'iquen in wile'ex, wa quex náach yanene', in káat ca kuchuc teen u péectzilile' te'exe' jeedzel a wanile'ex ti' jun p'éelili' óol, táan a múuch' ba'atele'ex tuláacale'ex tu yo'olal u yocsaj óolalil le ma'alob péectzilo',

²⁸yéetel ti' mix ba'al ca cha'ique'ex u ja'asa'al a wóole'ex tumen a enemigoex. Lela' jun p'éel chíiculal jach sáasil: leti'obe' yaan u bino'ob ti' xu'ulsajil, ba'ale' queet u ye'esic xane' a tocsajile'ex, lela' ti' Ku u taal.

²⁹Tumen tu yo'olal Cristoe' dza'an ti' te'ex qui'imac óolalil ma' chéen ca wocs a wóole'ex ti'e', ba'ale' ca mukyajnaque'ex xan tu yo'olal.

³⁰Te'ex yéetel tene' ti' yano'on ti' jun p'éelili' ba'atele'. Dzo'oc a wilique'ex bix ba'atelnajiquen, beoraa' dzo'oc a wu'uyique'ex u péectzilil bix láili' táan in ba'atele'.