Read Yucateco Filipenses 2 Bible Online

Filipenses 2 - Yucateco bible

Filipenses 2

¹Bey túuno', wa Cristo líiksic a wóole'exe', wa u yaacunaj qui'imaccunsic a wóole'exe', wa ti' yaan ta wéetele'ex u Quili'ich Pixane', wa a kaj óole'ex le yaacunaj yéetel le cha'a óotziilo',

²chupe'ex in pucsi'ikal yéetel qui'imac óolal, cuxlene'ex táan a wutzil bisicaba'ex tuláacale'ex, nupa'ane'ex tumen jun p'éelili' yaacunaj, tumen jun p'éelili' pixan yéetel jun p'éelili' tuucul.

³Ma' a beetique'ex mix ba'al chéen u ti'al a wutzile'ex mix tu yo'olal ca'anal ichili' ba'ale' yéetel cabal óolal, tuju jun túule' ca u yil le u láako'obo' bey mas ma'alobo'ob ti' leti'e'.

⁴Mix jun túul ca u caxant chéen le ba'alo'ob u ti'al u yutzil tu juunalo', ba'ale' le máax u ti'al u yutzil xan le u láako'obo'.

⁵Tuuculnene'ex je'el bix tuuculnajic Cristo Jesuso'.

⁶Tumen quex leti' Kue', ma' tu yóoltaj u kabéetcunt le páajtalil yaan ti' u ti'al u queticubáa yéetel Kuo',

⁷ba'ale' tu p'ataj jun tzéelil le ba'ax u ti'alo' ca tu beetjubáa je'el bix palitzile', le ca j síij je'el bix máaque'.

⁸Le ca tu beetjubáa máaquile', tu cabalcuntaj u yóol yéetel tu yo'olal u yu'ubaj t'aane' bin ti' quíimil ti' cruz.

⁹Le o'olale' Kue' tu dzaj le mas ca'anal nojbe'enil ti'o', yéetel jun p'éel kaaba' yaan tu yóokol tuláacal kaaba'.

¹⁰U ti'al beyo' le quéen u'uya'ac u kaaba' Jesuse', ca xolac tuláacal le máaxo'ob yano'ob te j ca'ano', te j lu'umo' yéetel yáanal lu'um,

¹¹yéetel u ti'al ca kaj óolta'ac tumen tuláacal máac yéetel ca u ya'alo'obe' Jesucristoe' leti' Yuumtzil, u ti'al u nojbe'enil Ku le taatao'.

¹²Le o'olale' in yaabilaj sucu'une'ex, je'el bix ta dzo'ocbesaquile'ex in t'aan mantadz le ca yanjien ta wéetele'exo', dzo'ocbese'ex in t'aan mas ma'alob bejela'a' náach yanen ti' te'exo'. Dzáa a wóole'ex ti' a tocsajile'ex yéetel cabal óolal yéetel sajaquil;

¹³tumen Ku máax dzáic te'ex le ma'alob dzíibolalo'obo', yéetel cu yáantique'ex u ti'al a dzo'ocbesique'ex, je'el bix u ma'alob óolal leti'o'.

¹⁴Beete'ex tuláacal x ma' tutucchi'il mix yéetel ba'atel t'aanil,

¹⁵u ti'al ma' u caxta'al ti' te'ex tumen mix máac mix jun p'éel si'ipil yéetel mix jun p'éel kaas. Ba'ale' ca béeyaque'ex u paalal Ku mina'an pa'apakil ti'ob chúumuc ti' le máaco'ob kasa'ano'ob yéetel looloch u cuxtalo'obo'. Te'exe' ca léembale'ex ichilo'ob je'el bix le eeko'ob ti' jun p'éel yóokolcaab éekjoch'e'eno',

¹⁶le quéen a bise'ex ti'obe' u ma'alob péectzilil cuxtal. Beyo', le quéen taalac Cristoe', tene' cu páajtal u qui'imactal in wóol ta wo'olale'ex, tumen in wojel ma' chéen cunel tin wáalcabtaj le bejo', yéetel ma' chéen cunel meyajnajeni'.

¹⁷Yéetel quex ca quíimsa'aquen u ti'al u chúucbesa'al le siibal ca dzáique'ex te'ex ti' Ku tu yo'olal a wocsaj óole'exo', tene' cu qui'imactal in wóol yéetel quin ta'acbesique'ex tuláacale'ex ti' in qui'imac óolal.

¹⁸Bey xan te'ex qui'imacchajac a wóole'ex yéetel nupaba'ex ti' in qui'imac óolal.

¹⁹Wa Yuumtzil Jesús u káate', quin pa'atic in séeb túuxtic Timoteo u ti'al u yile'ex, u ti'al u qui'imactal in wóol le quéen in wu'uy bix a wanile'ex.

²⁰Tumen mina'an teen u láak máac u ti'al ca tuuculnac queet tin wéetel je'el bix leti'e' yéetel tu jaajil ca u caxant a wutzile'ex;

²¹tumen tuláacal cu caxtico'ob chéen u yutzilo'ob, yéetel ma' tu dzáico'ob tu yóolo'ob ba'ax u káat Cristo Jesús.

²²Ba'axe' te'exe' dzo'oc a wojéeltique'ex bix u cuxtal Timoteo, yéetel bix meyajnajic tin wéetel u ti'al u tze'ecta'al le ma'alob péectzilo', je'el bix jun túul paal cu yáantic u taatae'.

²³Bey túuno', quin tucultic in túuxtic u ti'al u yile'exe' tu séeblaquil quéen in wojéelt bix u bin u ba'aluba'ob.

²⁴Ala'an in wóol ti' Yuumtzile' tac teen yaan in bin in wile'ex séeba'an.

²⁵Ba'ale' quin tucultique' kabéet in túuxtic te'ex xan sucu'un Epafrodito, máax láakintiquen ti' le meyaj yéetel ti' in mukulmuuko'ob, máax te'ex túuxmajil ti' teen u ti'al u táan óoltiquen ti' ba'axo'ob kabéet ti' teen.

²⁶Tumen jach táan u dzíiboltic u láaj ilique'ex, yéetel táan u sen tuucul tumen te'exe' ta wojéeltaje'ex koja'anchaji.

²⁷U jaajil koja'anchaji, óolac quíimic, ba'ale' Kue' tu ch'a'a óotzilil ti' leti' ba'ale' tac ti' teen, u ti'al ma' u yantal ti' teen u láak yaayaj óolal tu yóokol le yano'ob tena'.

²⁸Le o'olale' táan in yaayantic in túuxtic, u ti'al ca qui'imacchajac a wóole'ex le quéen a wile'ex tu ca'a téen, yéetel u ti'al ma' u sen okomtal in wóol.

²⁹Kame'ex tu kaaba' Yuumtzil yéetel tuláacal qui'imac óolal, yéetel dza'ex ta pucsi'ikale'ex le máaxo'ob je'el bix leti'o';

³⁰tumen óolac quíimic tu yo'olal u meyajtic Cristo. Tu dzajubáa tu táan quíimil u ti'al u beetic teen le meyajo'ob ma' tu páajtal a beetique'ex te'exo'.