Read Yucateco Filipenses 3 Bible Online

Filipenses 3 - Yucateco bible

Filipenses 3

¹Beoraa', in sucu'une'ex, qui'imacchajac a wóole'ex ti' Yuumtzil. In ti'al tene' ma' jun p'éel nac óolil in ca'a a'alic te'ex le ba'ax dzo'oc in dzíibtic te'exo', tumen ma'alob a ti'al te'ex.

²Canantaba'ex ti' le máaxo'ob cu cuxtalo'ob beyo'ob peeke', le máaxo'ob cu beetico'ob kaaso', le máaxo'ob cu xotico'ob le wíinclilo'.

³Tumen to'on le máaxo'ob tu jaajil súutkupta'ano'obo', máaxo'ob c kultic Ku ti' Quili'ich Pixan yéetel cu qui'imactal c óol tumen u ti'alo'on Cristo Jesús, yéetel ma' táan c alab óoltic u yóokolcaabil ba'alo'obo'.

⁴Quex yaan teen ba'ax o'olal in alab óoltic le ba'alo'obo'. Wa yaan máac cu tucultic yaan ba'ax u alab óoltic le ba'alo'obo' tene' mas:

⁵súut kupta'aben tu ocho kiino'ob síijiquen, tumen tu ch'i'ilancabil Israel in taal; ti' yanen ichil u ch'i'ibal Banjamine', hebreoen síijiquen, in taataobe' Hebreob xan. Fariseoen tu yo'olal bix in na'atic u ya'almaj t'aan le judíobo';

⁶tumen jach in kubmaj in wóole' tin ch'a'apachtaj le iglesiao'; wa tu yo'olal le toj cuxtal cu ca'ansic le a'almaj t'aano', mina'an tu'ux in ke'eyel.

⁷Ba'ale' tuláacal le ba'alo'ob jach yaan u tojol in ti'al ca'acho', bejela'e' quin wilic mix ba'al u tojolo'obe' tu yo'olal Cristo.

⁸Mas ti' lelo', tuláacal ba'ax cu páajtal u yantal tene' quin tucultique' bey jun p'éel ba'al mina'an u tojole' tu tzéel le nojoch náajal yaan ti' teen in kaj óoltmail Cristo Jesús in Yuumtzilo'. tu yo'olal Cristoe' dzo'oc in satic tuláacal, sojol in ti'alinte, u ti'al in ti'alintic Cristo,

⁹yéetel ca in wilinbáa nupa'anen ti' leti', ma' tumen wa toj in cuxtal tu yo'olal in dzo'ocbesic ba'ax cu ya'alic le a'almaj t'aano', ba'ale' tu yo'olal le toj cuxtal cu dzáic Ku ti' le máaxo'ob cu yocsaj óoltico'ob Cristo, u káat u ya'ale', le toj cuxtal cu yantal tu yo'olal le ocsaj óolalo'.

¹⁰Ba'ax in káate' in kaj óoltic Cristo, bey xan u páajtalil u ca'a púut cuxtal, yéetel in táacpajal ti' u mukyajo'ob, in béeytal je'el bix leti'e' ti' u quíimil,

¹¹yéetel u alab óolalil in kuchul ti' u ca'a púut cuxtal le quimeno'obo'.

¹²Ma' in káat in wa'ale' wa dzo'oc in ti'alintic tuláacal le ba'alo'oba', mix in káat in wa'al wa mix ba'al cu bineltic teni'; ba'ale' táan in bin táanil yéetel u lab óolalil in chucpachtic le ba'ax tu yo'olal le ba'ax Cristo Jesús tu chucpachtajen táanilo'.

¹³Sucu'une'ex tene' ma' táan in wa'alic wa dzo'oc in cúulpachcuntic lela'; ba'ale' jun p'éel ba'al quin beetic: in tu'ubsic le ba'ax cu p'áatal paachilo' yéetel in mukulmuuk u ti'al in chucpachtic le ba'ax yaan táanilo',

¹⁴u ti'al in kuchul tu xuul u ti'al in kamic le siibalo', lela' úuchic u t'anico'on Ku te j ca'ano' tu yo'olal Cristo Jesús.

¹⁵Tuláacal le máaxo'ob ma'alob mu'ukantaco'on ti' le ocsaj óolalo' unaj c tuucul beya'. Wa ti' wa ba'ax jela'an a tuucule'exe', Ku cun u beet a wilique'ex xan lela'.

¹⁶Ba'ale' lela' bey anila', unaj c tuucul yéetel c cuxtal queet yéetel le ba'ax dzo'oc c ti'alintico'.

¹⁷Sucu'une'ex cuxlene'ex je'el bix in cuxtal teno', il a wile'ex xan le máaxo'ob táan u cuxtalo'ob je'el bix dzo'oc c e'esic te'exo'.

¹⁸Dzo'oc in wa'alic te'ex ya'ab u téenel, láili' quin wa'alic te'ex tac yéetel u ja'il in wiche', yaan ya'ab máax táan u cuxtalo'ob bey u aj p'eeco'ob u cruz Cristoe'.

¹⁹Lelo'oba' bíin xu'ulsa'aco'ob. U kuo'obe' u kaakas dzíibolalo'ob, yéetel u ca'analtal u yicho'ob tu yo'olal le ba'axo'ob unaj u ch'a'ico'ob subtalo'. chéen u ba'alo'obilo'ob lu'um cu tucultico'ob.

²⁰Ba'ale' to'one' u cajnáalilo'ob ca'an, yéetel táan c pa'atic ca taalac ti' le ca'ano' le j tocsajilo' Yuumtzil Jesucristo.

²¹Leti' cun u jelbes le óotzil wíinclila' u ti'al ca béeyac je'el bix u nojbe'en wíinclile'. Bíin u beet lela' tu yo'olal le páajtali yaan ti'o' u ti'al u dzáancha'atic tuláacal ba'al.