Read Yucateco Filipenses 4 Bible Online

Filipenses 4 - Yucateco bible

Filipenses 4

¹Le o'olale', in yaabilaj sucu'une'ex, máaxo'ob jach in káat in wilo'obe', te'ex máaxe'ex in qui'imac óolale' yéetel in bo'olale', p'áatene'ex beyo', chuca'an a wóole'ex ti' Yuumtzil, in yaabilaje'ex.

²Quin káat óolal ti' Evodia bey xan ti' Síntique, ca jun p'éelchajac u tuuculo'ob ti' Yuumtzil.

³Ti' teech in chuca'an óol éet meyaj, quin káatic teech ca a wáant le co'olelo'oba', tumen leti'obe' mukulmuuknajo'ob tin tzéel u ti'al u tze'ecta'al le ma'alob péectzilo', jun múuch' yéetel Clemente bey xan le u láako'ob meyajnajo'ob tin wéetelo'. U kaaba'obe' dzo'oc u dzíibta'al ti' u ju'unil le cuxtalo'.

⁴Qui'imacchajac a wóole'ex ti' Yuumtzil mantadz. Quin ca'a a'alic: Qui'imacchajac a wóole'ex.

⁵Tuláacal máac ca u kaj óol te'ex je'el bix máaxo'ob utz u pucsi'ikalo'obe'. Yuumtzile' naadz yanil.

⁶Ma' a sen tuucule'ex tu yo'olal mix ba'al, ba'ale' tuláacal ba'ax kabéet te'exe' a'ale'ex mantadz ti' Ku ich payalchi', káat óolnene'ex ti' yéetel dza'ex gracias ti' xan.

⁷Ku túune' bíin u dzáa te'ex jéedzel óolal, lela' mas nojoch ti' le cu páajtal u na'atic máaco'; le jéedzel óolal bíin u canant a pucsi'ikale'ex yéetel a tuucule'ex ti' Cristo Jesús.

⁸Tu dzooque' sucu'une'ex, tuculte'ex tuláacal ba'ax jaaj, tuláacal ba'ax cu najmatic tziiquil, tuláacal ba'ax toj, tuláacal ba'ax sac, tuláacal ba'ax cu lúubul utzil, tuláacal ba'ax cu yúuchul t'aan ma'alob tu yo'olal. tuculte'ex le ba'ax utzo' yéetel le ba'ax cu najmatic u qui' t'anta'alo'.

⁹Dzo'ocbese'ex le ba'ax tin ca'ansaj ti' te'exo', le tzol xiquino'ob tin dzaj ti' te'exo', le ba'ax ta wu'uyaje'ex in wa'alico' yéetel le ba'ax ta wilaje'ex in beetico': beete'ex beyo' u Kuil jéedzel óolale' bíin yanac ta wéetele'ex.

¹⁰Jach cu qui'imactal in wóol ti' Yuumtzil tumen te'exe' dzo'oc a tucultiquene'ex tu ca'a téen. Ma' in káat in wa'al wa dzo'oc in tu'ubsiquene'exi', ba'ale' chéen ma' yanac te'ex tu'ux a wáantiquene'exi'.

¹¹Ma' táan in wa'alic tumen jach kabéet teen wa ba'axi' tumen dzo'oc in canic qui'imactal in wóol yéetel ba'ax yaan teno'.

¹²In wojel ba'ax u cuxtal máac ich óotzilil, in wojel xan ba'ax u cuxtal máac ich ayikalil. Dzo'oc in canic cuxtal je'el bixac in wanile', wa quex na'ajen, wa quex wi'ijen, wa quex yaan teen tuláacal ba'al wa quex mina'an teen mix ba'al.

¹³Tuláacal cu páajtal in beetic, tu yo'olal cu dzáic teen muuk.

¹⁴Ba'ale' te'ex ta beetaje'ex iquil ta wáantilene'ex ti' le ba'alo'ob kabéet teno'.

¹⁵Je'el bix a wojelile'ex xan le yane'ex Filiposo', le ca jo'op' in tze'ectic le ma'alob péectzilo', le ca j luken Macedoniae', te'ex le jun p'éelili' iglesia tu túuxtaj teen siibalo'ob u ti'al u ye'esic u qui'imac óolal tu yo'olal le áantaj dzo'oc u kamico'ob ti' u pixano'obo'.

¹⁶Tumen ca'aliquil ti' yanen Tesalónicae', te'exe' ta túuxtaje'ex wa jay téen siibalo'ob u ti'al le ba'ax kabéet teno'.

¹⁷Tumen tene' ma' táan in caxtic in kamic siibalo'obi', ba'ax quin caxtique' ca ya'abac u yich a wocsaj óolale'ex.

¹⁸Tumen tene' dzo'oc in kamic tuláacal, ya'ab yaan teni'. Yéetel le ta túuxtaje'ex teen yéetel Epafroditoo' yaan teen maanal ti' le kabéet teno'. Le ta túuxtaje'ex teno' bey jun p'éel siibal qui'iboc incienso, jun p'éel siibal kambe'en tu táan Ku.

¹⁹In Ku, túun, bíin u dzáa te'ex tuláacal le ba'ax cu bineltic te'exo', queet yéetel le nojbe'en ayikalilo'ob yaan ti'o' ti' Cristo Jesús.

²⁰¡Nojbe'enil mantadz ti' c Ku yéetel ti' c taata! Amén.

²¹Tziquil t'ante'ex tu kaaba' Jesucristoe' tuláacal le máaxo'ob u ti'alo'ob Kuo'. Le sucu'uno'ob yano'ob tin wéetelo' cu túuxtico'ob te'ex tziiquil t'aano'ob.

²²Tuláacal le yano'ob waya' máaxo'ob u ti'alo'ob Kuo', táanile' le u yotochnáalo'ob Cesaro', cu túuxtico'ob te'ex tziiquil t'aano'ob xan.

²³U siibal utzil c Yuumtzil Jesucristo ca yanac yéetel a pixane'ex.