Read Yucateco Colosenses 1 Bible Online

Colosenses 1 - Yucateco bible

Colosenses 1

¹Teen Pablo u apóstol Jesucristo, tumen bey tu yóoltilac Ku. Teen yéetel sucu'un Timoteoe' c dzíibtic le ju'una'

²ti' le chuca'an óol sucu'uno'ob ti' Cristo yano'ob tu caajil Colosas máaxo'ob u ti'alo'ob Kuo'. Kame'ex u siibal utzil yéetel u jéedzel óolal Ku c taata.

³Mantadz c dzáic nib óolal ti' Ku, u taata c Yuumtzil Jesucristoe', le quéen payalchi'inaco'on ta wo'olale'ex.

⁴Tumen dzo'oc u kuchul to'on u péectzilil a wocsaj óolale'ex ti' Cristo Jesús, yéetel le yaacunaj yaan te'ex u ti'al le máaxo'ob u ti'alo'ob Kuo',

⁵tu yo'olal le alab óolal yaan te'exo' ti' le ba'ax ta'aca'an a ti'al te'ex te j ca'ano'. Te'exe' j kuch yantal te'ex le alab óolala' le ca ta wu'uyaje'ex u jaajil le ma'alob péectzilo'.

⁶Le ma'alob péectzil tze'ecta'ab ti' te'exo' táan u ch'íijil yéetel táan u dzáic u yich ti' tuláacal tu'uxo'ob yóokolcaab, je'el bix úuchic ichile'exo' le ca ta wu'uyaje'ex yéetel ca ta kaj óoltaje'ex tu jaajil u siibal utzil Kuo'.

⁷Lela' leti' tu ca'ansaj te'ex c yaabilaj Epafras, máax meyajnaj t éetel ti' leti'e' yaan te'ex jun túul u meyaj Cristo chuca'an u yóol.

⁸Leti' taas to'on u péectzilil le Quili'ich Pixano'.

⁹Le o'olale' to'one', cáajic ti' le kiin t óoltaje', ma' xu'uluc c payalchi' ta wo'olale'exi' yéetel c káatic ca beeta'ac tumen Ku a kaj óoltique'ex ma'alob ba'ax u káat leti' yéetel ca u dzáa te'ex tuláacal kaj óolal yéetel pixanbe'en na'at.

¹⁰Beyo' cu páajtal a cuxtale'ex je'el bix unaj u cuxtalo'ob le máaxo'ob u ti'alo'ob Yuumtzilo', táan a beetique'ex mantadz le ba'ax utz tu t'aano', táan a wichamquile'ex ti' tuláacal u jejeláasil meyajo'ob, yéetel táan a kaj óoltique'ex mas ma'alob Ku.

¹¹C káat óoltic leti' ca u mu'ukinse'ex yéetel nojbe'en páajtalil, u ti'al ca páatac a mukyajtique'ex tuláacal ba'al yéetl ya'ab chuca'an óolal; yéetel qui'imac óolale',

¹²ca a dza'ex nib óolal ti' le taatao' tumen dzo'oc u nu'ucbesique'ex u ti'al a kamique'ex ti' le sáasilo', le jaatz ca ti'alintique'exo' ti' le ba'ax bíin u dzáa ti' le máaxo'ob u ti'alo'obo'.

¹³Kue' tu tocajo'on ti' u páajtalil le éekjoche'enilo', yéetel tu dzajo'on ti' u ajawil u yaabilaj u paal,

¹⁴ti' máax yaan to'on tocsajil: u sa'atsajil kebano'ob.

¹⁵Ku máax tu yila'ale', tu chíicbesubáa iquil taalic ti' u paal, máax u yáaxil ti' tuláacal ba'ax yaan.

¹⁶Tu yo'olal leti'e' Kue' tu beetaj tuláacal ba'ax yaan te j ca'ano' yéetel te j lu'umo', le ba'alo'ob ma' tu yila'alo'obo' bey xan le ba'alo'ob cu yila'alo'obo'. Bey xan le jalachilo'obo' yéetel le yuumtzililo'obo', le mu'ukanilo'obo' yéetel le pixanbe'en páajtalilo'obo', tuláacal j beeta'ab tu yo'olal leti' yéetel u ti'al leti'.

¹⁷Cristoe' yanili'e' ma'ili' yanac tuláacal ba'ale', yéetel ti' leti'e' tuláacal cu p'áatal tu tojil.

¹⁸Cristoe' leti' u pool le wíinclilo', lela' leti' le iglesiao'; leti'e' u yáax chuun, leti' máax ca'a púut cuxlaj ti' le quimeno'obo', u ti'al beyo' ti' tuláacal ba'al ca yanac le yáax cúuchil ti'o'.

¹⁹Tumen Kue' tu yóoltaj ca yanac ti' Cristoe', u chuca'anil leti',

²⁰tu yóoltaj xane', tu yo'olal Cristoe', u dzáa ti' jéedzel tu yéetele' tu túulisil u yóokolcaab, le ba'ax yaan te j lu'umo' bey xan le ba'ax yaan te j ca'ano', táan u beetic u yantal jéedzel tu yo'olal u ki'ikel Cristo.

²¹Te'ex ca'ache' táanxel lu'umile'ex yéetel enemigoex ti' Ku ta pucsi'ikale'ex, tu yo'olal le ba'alo'ob kaastac ca beetique'ex ca'acho'; ba'ale' beoraa' Kue' dzo'oc u dzáique'ex ti' jéedzel óolal tu yéetel,

²²tu yo'olal le quíimil tu mukyajtaj Cristo ti' u lu'umcabil wíinclilo'. Lela' tu beetaje' u ti'al u dzáique'ex tu táane' bey máaxe'ex jach a kubmaj a wóole'exe', mina'an te'ex kaasil mix si'ipil.

²³Ba'ale' u ti'al lela' unaj a p'áatale'ex jeedzel ti' le ocsaj óolo', yéetel taamcach mootzo'ob, yéetel ma' a tzelicaba'ex ti' le alab óolal yaan ti' te'exo' tu yo'olal le ma'alob péectzil ta wu'uyaje'exo'. Le péectzila' leti' le cu tze'ecta'al ti' tuláacal jejeláas tu'uxo'ob yóokolcaabo', bey xan teen Pabloe' táan in wáantaj u ti'al ca tze'ecta'ac.

²⁴Beoraa' cu qui'imactal in wóol tu yo'olal le ba'ax quin mukyajtic ta wo'olale'ex, tumen beya' táan in chúucbesic tin wíinclile' le ba'ax cu bineltic ti' u mukyajo'ob Cristo tu yo'olal le iglesiao' lela' u wíinclil.

²⁵Dzo'oc in kuchul béeytal jun túul ti' le máaxo'ob le iglesiao', tu yo'olal le kuben tu dzaj teen Kuo' u ti'al a wutzile'ex te'exo', ca in chuca'an tze'ect u ma'alob péectzil,

²⁶U káat u ya'ale', le mucbil ba'al u ta'acmaj Kuo' dzo'oc u máan ya'abcach kiino'ob yéetel ch'i'ibalo'ob, ba'ale' beora' dzo'oc u dzáic kaj óoltbil ti' le máaxo'ob u ti'alo'obo'.

²⁷Ti' leti'ob tu yóoltaj Ku u beetic u kaj óoltic ayikalil yaan ti' le mucbil ba'alo' u ti'al le máaxo'ob ma' judíobo'. Le mucbil ba'alo'ob ti' le lela': Cristoe' ti' yaan ti' te'exe', leti' u alab óolalil le nojbe'enil bíin yanac te'exo'.

²⁸To'one' táan c tze'ectic Cristo. C tzolic u xiquin tuláacal máac, yéetel c ca'ansico'ob xan u ti'al ca u na'ato'ob ma'alob, u ti'al ca páatac c taasic tuláacal máac utzil chuca'an ti' Cristo.

²⁹Tene' táan in meyaj u ti'al lela', táan in mukulmuuk yéetel tuláacal in muuk yéetel le páajtalil cu dzáic teen Cristo'.