Read Yucateco Colosenses 2 Bible Online

Colosenses 2 - Yucateco bible

Colosenses 2

¹In káat ca a wojéelte'exe' tene' táan in chich mukyaj ta wo'olale'ex, yéetel tu yo'olal le máaxo'ob yano'ob Laodiceao', bey xan tu yo'olal tuláacal le máaxo'ob ma' u kaj óolmeno'obo'.

²Quin muukulmuke' u ti'al ca dzabac tu yol u pucsi'ikalo'ob, nupa'ano'ob ti' le na'atilo', u ti'al u kaj óoltico'ob u muculbil ba'al Ku. Lela' Cristo,

³tumen ti' leti' kala'an tuláacal u ayikalil le kaj óolalilo' yéetel le na'atilo'.

⁴Lela' táan in wa'alic ti' te'exe' u ti'al ma' a tu'usule'ex tumen mix máac yéetel jadzutz t'aano'ob.

⁵Tumen quex mina'anen ta wéetele'ex yéetel in wíinclile', ti' yanen ta wéetele'ex yéetel in pixane', bey xan cu qui'imactal in wóol in wilic ma'alob nuuplil a wóole'ex yéetel jeedzel a wanile'ex ti' a wocsaj óolale'ex ti' Cristo.

⁶Le o'olale', je'el bix ta kamile'ex Yuumtzil Jeusucristoe' bey j unaj a cuxtale'ex nupa'ane'ex ti' leti',

⁷a dzaamaje'ex u mootz a cuxtale'ex ti' leti', chich paka'ane'ex ti' leti' yéetel jeedzel a wanile'ex ti' le ocsaj óolalo', je'el bix ca'ansa'abic te'exo', táan a dzáique'ex nib óolal ti' Ku mantadz.

⁸Canantaba'ex ma' a cha'ique'ex a bisa'ale'ex tumen le máaxo'ob u káat u tuse'exo'ob yéetel lu'umcabil tuuculo'obo' bey xan yéetel t'aano'ob chéen cunelo'obo'; tumen leti'obe' ma' táan u ch'a'ico'ob u muuk ti' Cristo, ba'ale' ti' u ca'ansaj máaco'ob yéetel ti' yóokolcaabil tuuculo'ob tu yóokol le ba'alo'oba'.

⁹Tumen tuláacal u chuca'anil Kue' ti' caja'an tu wíinclil Cristoe'.

¹⁰Te'ex túune' utzil chuca'ane'ex tumen nupa'ane'ex ti' Cristo. Leti'e' u pool tuláacal jalachil yéetel páajtalil.

¹¹Bey xan tu yo'olal nupa'ane'ex ti' Cristoe' te'exe' súutkupta'ane'ex, ba'ale' ma' yéetel le súutkuptaj cu beeta'al yéetel le wíinclila', ba'ale' iquil to'oquique'ex ti' u kebanilo'ob a lu'umcabil wíinclile'ex. Lela' leti' le súutkuptaj cu taal ti' Cristo'.

¹²Tumen le ca c ocja'anaje'ex te'exe' j mu'uque'ex yéetel Cristo, bey xan ca'a púut cuxquinta'abe'ex yéetel leti', tumen ta wocsaj óolte'ex le u páajtalilo Ku máax ca'a púut cuxquint ti' le quíimilo'.

¹³Te'exe' ti' le kiino'ob dzo'oc u máano'obo' quimene'ex ca'ach ti' a kebane'ex yéetel ti' a x ma' súutkuptaje'ex; ba'ale' beora' Kue' dzo'oc u dzáic te'ex cuxtal jun múuch' ti' Cristo, iquil u sa'atsilac tuláacal a kebane'ex.

¹⁴Kue' tu tupaj le p'aax yaan t contra ca'acho' yéetel cu xot kintico'on ca'ach tu yo'olal le ba'alo'ob cu dzáic ti' to'ono'. Tu xu'ulsaj le p'aaxo' iquil tu bajilac ti' le cruzo'.

¹⁵Cristoe' le ca j quíim ti' le cruzo', tu dzáancha'ataj le jalachilo'obo' yéetele' le páajtalilo'obo' yéetel tu cabalcuntaj u yóolo'ob tu táan máaco'ob, iquil u bisjilaco'ob tu paach.

¹⁶Bey túuno' mix máac ca u ya'al te'ex ba'al tu yo'olal ba'ax ca jaantique'ex wa ba'ax ca wukique'ex, wa tu yo'olal u kiinil kiinbesajo'ob, túumben lunaob wa u kiinilo'ob je'elel.

¹⁷Tuláacal lela' chéen u yoochel le ba'ax bíin taalaco', ba'ale' u jaajile' Cristo.

¹⁸Le ba'ax si'an ti' te'exe' ma' a cha'ique'ex u luksa'al te'ex tumen le máaxo'ob cu ye'esicuba'ob bey jach cabal u yóolo'obe' yéetel cu kultico'ob le ángelo'obo'. Leti'obe' cu yocsicuba'ob ti' ba'alo'ob ma' u yilmajo'obi' yéetel cu nojochquinticuba'ob yéetel ca'anal ichil tu yo'olal u lu'umcabil tuuculo'ob.

¹⁹Leti'obe' ma' tu p'áatalo'ob nupa'ano'ob ti' Cristo, lela' leti' le pool cu beetic u ch'íijil tuláacal le wíinclilo' le quéen u tzéent yéetel u nup ichil u jejeláas jaatzo'ob, je'el bix u tucultmaj Kuo'.

²⁰Te'exe' dzo'oc a quíimile'ex yéetel Cristo, iquil ta xúump'attile'ex le lu'umcabil tuuculo'obo' yaan tu yo'olal le ba'alo'obo'. ¿Ba'axten túun táan a cuxtale'ex bey yóokolcaabile'exe' táan a dzáicaba'ex tu yáanal a'almaj t'aano'ob,

²¹je'el bix lelo'oba': ma' machic lela', ma' a jaantic lelo', mix a péedzkabtic?

²²Tuláacal le a'almaj t'aano'oba' yaan ba'al u yilo'ob yéetel ba'alo'ob cu xu'upulo'ob tu yo'olal meyajo'obo', yéetel ma' u láak ba'al wa ma' chéen u tusbeel yéetel ca'ansaj máaco'ob.

²³U jaajile' le ba'alo'oba' cu páajtal u ye'esicuba'ob bey jach kambe'en ba'alo'obe', tumen cu dzáico'ob wa ba'ax ma'alob cuxtalil, cabal óolal yéetel u cananta'al yéetel muuk le wíinclilo'; ba'ale' mix ba'al u biilalo'ob u ti'al u dzáancha'ata'al le u kaakas dzíibolalo'ob le wíinclilo'.